Իրանը ստիպված է լինելու իրեն պատճառված վնասները հատուցել Հորմուզի նեղուցով նավագնացության դիմաց գանձվելիք գումարներից, եթե չստանա փոխհատուցում Միացյալ Նահանգներից եւ Իսրայելից։ Այս մասին հայտարարել է Կահիրեում Իրանի դեսպան՝ Մոջթաբա Ֆիրդուսի Փուրը։ Նա նաեւ ասել է, որ Միացյալ Նահանգների հետ բանակցություններում Թեհրանը մտադիր չէ քննարկել իր հրթիռային ծրագիրը, ինչպես նաեւ՝ «դիմադրության առանցքը»՝ այն զինված կազմավորումները, որոնք Թեհրանի կողմից աջակցություն են ստանում։ Նա նաեւ հավելել է, որ Միացյալ Նահանգները պետք է հարգի Իսլամական Հանրապետության բոլոր օրինական իրավունքները՝ միջուկային դոսյեի շրջանակում։ Իրանը, ըստ դեսպան Փուրի, անձնատուր չի եղել, ինչպես հայտարարել է նախագահ Թրամփը եւ բանակցություններ էլ չի վարելու ճնշման ներքո։ Թեհրանը թույլ չի տալու, որ իր հետ ուժի դիրքերից խոսեն, ամփոփել է նա։
