Նիկոլն ասում է, որ իր «քվեները 100 տոկոսով օրգանիկ են, մյուսներինը՝ 100 տոկոս փողով»: Ես հայտարարում եմ, որ Նիկոլը հերթական անգամ սուտ է խոսում: Ես ձայն եմ տվել «Ուժեղ Հայաստան» դաշինքին, ու ինձ ոչ ոք փող չի տվել: Ընտրություններին այս կամ այն ուժին քվե տալու համար երբևէ ո՛չ փող եմ պահանջել ու ո՛չ էլ ինձ փող են առաջարկել՝ իմանալով, որ չեմ ընդունելու: Ընդհակառակը, ավելի քան մեկուկես տասնամյակ դիտորդություն եմ արել, որպեսզի մարդիկ խղճի կամոք ընտրություն կատարեն և ոչ թե փողով: Ուրիշ հարց՝ դա հաջողվել է, թե ոչ: Ի դեպ, 2021-ին ընտրել եմ «Հայաստան» դաշինքին: Որի ղեկավարին քեզ նման ընդդիմադիր եմ եղել հին, բարի ժամանակներում: Բարի, քանի որ Արցախ չէինք կորցրել, բազմահազար զոհեր չէինք ունեցել ու մեր արժանապատվությունն իր տեղում էր:
Բայց դու, Նիկո՛լ, հաստատ կաշառատու ես: Որովհետև տարվա սկզբին ասում էիր՝ մարդկանց թոշակները 10 հազարով բարձրացնենք՝ որ ի՞նչ անեն: Իսկ երբ հասկացար, որ թոշակառուները քեզ չեն ընտրելու՝ հենց այդքանով բարձրացրիր թոշակները: Միաժամանակ, օրենք խախտելով, քանի որ պետբուջեում նման ծախս նախատեսված չէր: Այսինքն, օրենք խախտեցիր, նախ, թոշակները բարձրացնելով: Դրանով թոշակառուներին կաշառելով՝ կատարեցիր կրկնակի հանցագործություն: Դրանով չբավարարվելով՝ երրորդ անգամ օրենք խախտեցիր՝ նախօրոք պետական բյուջեով չնախատեսված՝ առողջապահության ապահովագրություն մտցնելով ու 65+ տարիքի անձանց համար այն դարձնելով անվճար: Ու դա արեցիր կրկին ընտրություններին թոշակառուների ձայները ստանալու նպատակով: Ի՞նչ էր այդ ամենը՝ եթե ոչ թոշակառու ընտրողների ձայները պետական միջոցներով գնելու գործընթաց: Ու երբեմնի, քո ասելով, հպարտ քաղաքացիների մի մասին փողով ընտրության գնացող դարձնելով: Չնայած ընդդիմադիր կյանքում դրա դեմ կռիվ էիր տալիս:
Քեզ ձայն տալու համար թոշակառուների փող տալով՝ դու նրանց անուղղակի սովորեցրիր, որ եթե փողով իրենց ձայնն են վաճառում, ապա փողով կարելի է նաև հայրենիք վաճառել: Այնպես որ, քո քվեների ինչ-որ մասն իսկապես կարող են վերածվել «օրգանիկի», սակայն հայրենիք վաճառելու առումով: Ի դեպ, հայրենիքի պոտենցիալ վաճառողներ են նաև նրանք, ովքեր շրջանառում են մեկ պետության մեջ ադրբեջանցիների հետ կողք-կողքի ապրելու գաղափարը: Որովհետև դրանք այնքան անմեղսունակ չեն, որ չհասկանան, որ դրա վերջը լինելու է Հայաստանի կործանումը: Թեկուզ ո՛չ անմիջապես և ո՛չ ռազմական ճանապարհով, այլ խաղաղության անվան ներքո և 2-3 սերնդի ընթացքում: Իսկ դրանց թվում նաև այն քվեներն են, որ հունիսի 7-ին տրվել են քեզ, Նիկո՛լ: Հիմա ո՞ւմ քվեներն են իրապես բնական՝ նրանց, ում ձայն եմ տվել ես ու ինձ նմանները: Թե՞ քոնը, որ ստացել ես այն անձանցից, ովքեր հայրենիքի վրա թքած ունենալով՝ քո շնորհիվ վաղը պատրաստ կլինեն վաճառել այն:
Այս ընտրություններով դու, Նիկո՛լ, մխտռեցիր այն ամենը, հանուն ինչի պայքարել ես ընդդիմադիր տարիներիդ: Եվ եթե քո մեջ արժանապատվության նշույլ մնացած լիներ՝ դու կթողնեիր այդ անիծյալ պաշտոնը ու կհեռանայիր: Սակայն քանի որ այն բացակայում է՝ դու պատրաստ ես ատամներով պահել քո պաշտոնը՝ չգիտակցելով, որ դրանով երկիրը կործանման ես տանում: Ինչի հետևանքով կորցնելու ես նաև պաշտոնդ: Այդ վերջաբանից չեն փրկելու նաև «Բարգավաճ Հայաստան»-ի մանդատների առումով ԿԸՀ-ի միջոցով արվող հանցագործ գործողություններդ: Եվ վերջապես, ընդդիմությանը մեղադրելով պատերազմ հրահրելու մեջ՝ դու ինքդ ես ստանալու այն, քանի որ չես կարողանալու կատարել քո երբեմնի «կիրթ ու կառոցողական» գործընկերոջ պահանջները: Եվ այդ ամենի չեղարկման միակ տարբերակը քո հրաժարականը կլիներ:
