«Հրապարակ»․ Նայել են` կայացած թիմ, որ քվե ունի, փորձում են պառակտում մտցնել

Վաղարշապատի ավագանու «Հաղթանակ» խմբակցության ղեկավար Սեւակ Խաչատրյանն օրեր առաջ հայտնել էր, որ բռնաճնշումներ են սկսվել Վաղարշապատի ընդդիմադիր հայացքներ ունեցող տարբեր անձանց նկատմամբ: Ավելի ուշ Քննչական կոմիտեից հայտնեցին, որ «Հաղթանակ» դաշինքի անդամները եւ աջակիցները «խոչընդոտել են մի շարք անձանց ընտրական իրավունքի ազատ իրականացմանը», մեղադրանք է առաջադրվել, եւ 6 անձ ձերբակալվել է՝ կալանքը որպես խափանման միջոց կիրառելու նպատակով դատարան ներկայացնելու համար: Այնուհետեւ հրապարակվեցին ձայնագրություններ, իբրեւ թե այդ անձանց միջեւ խոսակցություններ են եղել, որտեղ լսվում է, թե ինչպես են, օրինակ, «քֆուր դնում» Սեւակ Խաչատրյանին չընտրելու համար։ Ձայնագրություններից չէր հասկացվում, թե որն է այդտեղ կրիմինալը, բայց մարդկանց վրա դրանք վատ տպավորություն էին թողնում:

Սեւակ Խաչատրյանը «Հրապարակ»-ի հետ զրույցում երեկ ասաց՝ իրենց 7 աջակիցներից մեկի նկատմամբ խափանման միջոց ընդհանրապես չի ընտրվել, մյուս 6-ն էլ տնային կալանքի տակ են՝ գրավի համակցությամբ։ 

«Քրեական վարույթում 14 հոգի է, բայց 7-ին էին ներկայացրել։ Մեղադրանքում նշված է․ օգտագործելով իրենց հեղինակությունը՝ մարդկանց դրդել են գնալ քվեարկել, բա եթե ավագանու թեկնածուն իր հեղինակությունը չպետք է օգտագործի, ի՞նչն է օգտագործելու։ Էդ նույն հոդվածով կարելի է բոլորին ձերբակալել, եթե ընտրության հետ կապ ունի»,- ասաց նա։ Խաչատրյանը նաեւ նշեց՝ ամեն վայրկյան սպասում է, որ իրեն էլ կարող են ձերբակալել։

- Անդրադառնանք 2026-ի ընտրություններին, այս իրադարձությունները շատերը կապում են առաջիկա ընտրությունների հետ: Դուք, ձեր կուսակցությունը քննարկումներ ունենո՞ւմ եք ընդդիմության տարբեր ուժերի հետ, ինչպե՞ս եք մասնակցելու ընտրություններին, ի՞նչ ձեւաչափով։

- Այո, քննարկումներ կան, բայց այս պահին ոչինչ չեմ կարող ասել, երբ կոնկրետություն լինի, կասենք։

- Բանակցությունները ո՞ր ուժերի հետ են։

- Այս պահին այլ ընդդիմադիրների հետ շփումներ կան, բայց բոլորը գիտեն` ես նախագահ Քոչարյանի հետ եմ։ Բայց այս պահին, երբ կոնկրետություն չկա, ճիշտ չէ ասելը։ 

- Այնուամենայնիվ խոսում են, որ Դուք ՀՅԴ-ի, Ռ. Քոչարյանի թիմակիցների հետ եք մասնակցելու, Ձեր հակվածությունն ինչպիսի՞ն է։

- Ես հակված եմ, որ ընտրություններին աջակցելու եմ նախագահ Քոչարյանի գլխավորած թիմին։

- Իշխանությունն ամբողջ թափով ներգրավել է իրավապահ համակարգը, կանխատեսվում է, որ առաջիկայում նոր քաղաքական-քրեական վարույթներ կլինեն․․․

- Հիմա Վաղարշապատի օրինակի փաստը կա, նայել են` կայացած թիմ, որ քվե ունի Վաղարշապատ համայնքում, փորձում են պառակտում մտցնել, մարդկանց ճնշել, բայց չեմ կարծում, թե դա օգուտ է տալիս, ամեն դեպքում` կլինեն մարդիկ, որ, այսպես ասած, կվախենան, կփորձեն ավելի պասիվ լինել։ Բայց, ընդհանուր առմամբ, կարծում եմ՝ ազդեցություն չի ունենա։

- Իշխանությունը վերարտադրվելու ինքնավստահությունի ունի, ընդդիմությունն էլ վստահ է, որ դա չի լինելու, ո՞րն է Ձեր կանխատեսումը։

- Իմ կարծիքով, եթե խոշոր ընդդիմադիր ուժեր ձեւավորվեն, յուրաքանչյուրն աշխատի իր ընտրազանգվածի հետ, բնականաբար, հասնելու ենք ցանկալի արդյունքի: Ցանկալի արդյունքը Նիկոլ Փաշինյանի հեռացումն է։