Օծանելիքների հայտնի խանութները, որպես կանոն, տոներին ընդառաջ ամեն տարի մեծ զեղչեր են հայտարարում: Սովորաբար զեղչերի սեզոնը սկսվում է Ամանորին, իսկ հետո արդեն սիրո տոն, մարտի 8, ապրիլի 7 և այլն: Մարդիկ բավականին ոգևորվում են` լսելով 50, 60, 70 տոկոս զեղչերի մասին, բայց երբեմն ոչ միայն հայտարարված զեղչերը չեն համապատասխանում իրականությանը, այլև պարզվում է, որ զեղչված ապրանքատեսակները պարզապես գոյություն չունեն: Մոտենում ես խանութ սրահ, կամ զանգահարում օպերատորին, պարզվում է` իքս բրենդի օծանելիքը կամ օծանելիքի հավաքածուն, որը գովազդում են որպես զեղչված ապրանքատեսակ, արդեն վաճառվել է:
Ամանորից ի վեր արդեն երկրորդ անգամ է նման դեպք պատահում ինձ հետ: «Մերի» օծանելիքի խանութը մեծ զեղչեր է հայտարարում` նշված տեսականու համար, սակայն երբ մոտենում եմ խանութ սրահ, կամ զանգահարում եմ ցանցի մասնաճյուղեր, պարզվում է, որ նշված ապրանքը սպառվել է: Հարց է առաջանում` եթե ապրանքատեսակը սպառվել է, ինչո՞ւ են ֆեյսբուքյան էջում և պաշտոնական կայքէջում վաճառված ապրանքը ներկայացնում որպես զեղչված ապրանք: Արդյո՞ք սա սպառողներին խաբելու համար չի արվում: Դե գնաս, հասնես խանութ, տեսնես քո ուզած ապրանքը չկա, բայց մի բան առնես` դուրս գաս:
