Պարզ հարց: Պարոնայք և տիկնայք ՔՊ-ականներ, հարցն ուղղում եմ ձեզ, բայց ցանկության դեպքում կարող է պատասխանել նաև ձեր առաջնորդը՝ Նիկոլ Փաշինյանը: Ինձ հետաքրքրում է, թե դուք ինչո՞ւ եք ընկնում պրիպադկի մեջ, երբ որևէ ընդդիմադիր ուժի կամ գործչի եք տեսնում Սամվել Կարապետյանին սատարողների շարքում: Ահա այսպիսի պարզ հարց: Կամ, եթե հարցի ձևակերպումը ձեզ դուր չեկավ, կարող եմ այլ կերպ ձևակերպել նույն հարցը: Այսպես՝ ինչո՞ւ այդպես էլ քաղաքական դաշտում չհայտնվեց որևէ խելքը գլխին քաղաքական ուժ, որ հայտարարեր ՔՊ-ին ու Նիկոլին սատարելու մասին: Խոսքը 44-օրյա պատերազմից հետո ընկած ժամանակաշրջանի մասին է: Սա ձեզ չի՞ մտահոգում:
Պարզ պատասխան: Պարոնայք և տիկնայք ՔՊ-ականները, վստահ եմ՝ նաև Նիկոլը, իրենց չգիտեմ որ զգայարանի շնորհիվ հասկանում են, որ Հայաստանի քաղաքական կյանքում սկսել է միս ու արյուն ստանալ «կոնսենսուս -1» բանաձևը, որի մեջ իրենք հաստատ «կոնսենսուսը չեն»: Նրանք տեսնում են, որ բոլոր քաղաքական ուժերը, կրկնում եմ՝ բոլոր ուժերը, գտնվում են քաղաքական բեմի մի կիսադաշտում, իսկ ՔՊ-ն ու Նիկոլը՝ մյուս: Ոչինչ որ քաղաքական ընդդիմադիր կիսադաշտում ամեն ինչ դեռ խառն է, աղմուկներ կան, իրար դեռ լավ չեն հասկանում, բայց փաստ է, որ նրանք արդեն հավաքված են այդ կիսադաշտում և ոչ մեկը չի պատրաստվում անցնել ՔՊ-ի ու Նիկոլի կիսադաշտ:
Իշխանափոխության բանաձև: Իրենց կիսադաշտում միայնակ մնացած ՔՊ-ն ու Նիկոլը, բնականաբար, քանի գնում, այնքան նյարդային են դառնում: Այս մեկուսացված վիճակը նրանց արդեն խելագարության է հասցնում: Ներսում աջակցություն չունեին, դրսից եկողներն էլ իրենց կողքին չեն կանգնում: Մաշվել, հալից ընկել է «մեզ ժողովուրդն է ընտրել» կարգախոսը, լեգիտիմության դեֆիցիտը հասել է մինչև կոկորդները: Զգում են, որ շատ քիչ է մնացել «կոնսենսուս -1» բանաձևի ամբողջացմանը, մի փոքրիկ նյուանս, ընդամենը մի գումարելի՝ «կոնսոլիդացիա», որպեսզի բանաձևն այս վերջնական տեսքն ունենա՝ «քաղաքական կոնսենսուս + հանրային կոնսոլիդացիա -1»:
Հանրային (հասարակության) կոնսոլիդացիա: Որտե՞ղ փնտրել այն: Դրա համար հեռու գնալ պետք չէ: ՔՊ-ն ու Նիկոլը ստեղծել են բոլոր պայմանները, որ այդ կոնսլիդացիան տեղի չունենա իրենց շուրջ: Իշխանության շուրջ կամ ավելի ճիշտ իշխանության կիսադաշտում հանրային կոնսոլիդացիայի որևէ հնարավորություն նրանք չեն թողել: Պատերազմ և համապարփակ պարտությունների մի երկար շղթա՝ սա է այն ամենը, ինչի վրա դեռ փորձում է իշխել ազգակործան պատուհասների այս խմբակը: Հանրային կոնսոլիդացիա այս խմբակի շո՞ւրջ: Ձեռ եք առնո՞ւմ: Սրանց կողքին իսկի շուն չի կանգնում այս օրերին, էլ ուր մնաց՝ քաղաքական ուժ կամ ընտրազանգված:
