Իմ հոդվածներում բազմիցս եմ անդրադարձել «Այիբս քո վրա կդնեմ, դու ցավից կմղկտաս» թուրքական ասացվածքին: Եվ դա կապված է եղել գործող իշխանության ներկայացուցիչների հետ: Կարծում եմ, որ այն անբարոյականության դրսևորումներից է՝ վայրագ քոչվոր ցեղերին բնորոշ: Որովհետև քաղաքակրթված լինելը ենթադրում է սեփական «այիբը» իրեն պահելը և ոչ թե դրանով ինչ-որ գործողություն կատարելը: Որ մի հատ էլ դրանից ուրիշները մղկտան: Ու երբ վարչապետի աթոռից կառչած անձն ու նրա կենակիցը դիմում են այդ ասացվածքի իմաստից բխող միջոցների, մտածում ես, որ այլ տարբերակ լինել, ուղղակի, չէր կարող: Եթե ռուսական, այսպես ասած, ֆորպոստից այդ անձինք մեզ հանում ու տանում են թուրք-ադրբեջանական բարեկեցության «դրախտ», ապա այդ զույգի մտածողությունն էլ պետք է համապատասխանի վերը նշված ասացվածքին: Ինչի հերթական վկայությունը ՀՀ ժողովրդական արտիստ Հասմիկ Պապյանի՝ Շիրակի թեմի առաջնորդ Միքայել Սրբազանի վերաբերյալ գրառմանը Նիկոլի կնոջ արձագանքն է:
Արձագանքելով այդ տիկնոջ գրառմանը՝ ասեմ, որ Հայաստանում, նախ, միայն մեկ անգամ է տեղի ունեցել հեղաշրջում՝ թեկուզ ոչ ռազմական, ու դա կազմակերպել է Նիկոլը, և որին մասնակցել է նրա կենակիցը: Եվ այդ ընթացքում մեքենաներ են այրվել ու մարդիկ են սպանվել: Եվ այդ ամենի համար պետք է առնվազն ամաչեր գրառման հեղինակը: Բայց ինքը երբեք ամոթ չի զգացել, քանի որ այդ զգացումը ծանոթ չէ իրեն: Որովհետև եթե այն իր տեղում լիներ, ապա չեղած բանի համար Հասմիկ Պապյանի նման անձին ոչ թե հազար ամոթ կտար, այլ ուղղակի կլռեր: Որովհետև կյանքում թեկուզ մեկ անգամ ամոթի զգացում ունեցածն ամոթից կկարկամեր: Եվ ոչ թե կմեղադրեր այն անձին, ով ողջ աշխարհում բարձր է պահել և պահում հայ ժողովրդի պատիվը: Ի տարբերություն իրեն ու իր կենակցի, որոնք զրոյացրում են մեր ժողովրդի արժանապատվությունը: Եվ ողջ աշխարհի առջև ամոթով են թողնում մեզ:
Իսկ եթե վերանանք զուտ բարոյականությունից, ապա պետք է ընդունենք, որ այդ զույգն ուղղակի հիանալի է աշխատում: Հիանալի, իհարկե, իրենց տեսակետից, քանի որ այն, ինչ օգուտ է այդ զույգին, վտանգավոր վիրուսի նման հակացուցված է մեր ժողովրդին և մեր պետականությանը: Ինչևէ, դեռևս մեկ տարի կա մինչև հերթական խորհրդարանական ընտրությունները, սակայն այդ զույգը փորձում է հայաստանցիների ուղեղում դաջել այն կեղծ համոզմունքը, որ մեր իրավապահ համակարգը բացահայտել է ծայրահեղ վտանգավոր ռազմական հեղաշրջման փորձ: Որովհետև այն ուղղված էր ոչ թե միայն ընդդեմ իշխանությունների, այլև շարքային մարդկանց: Որովհետև ավտոբուսներով, որ իբր թե պետք է վառեին հեղաշրջում կազմակերպողները, երթևեկում են հենց շարքային քաղաքացիները: Պատկերացնո՞ւմ եք, դա պետք է կազմակերպեր Բագրատ Սրբազանի նման մաքուր և հայրենասեր անձնավորությունը: Ու այն էլ մի քանի որսորդական հրացաններով: Այստեղ են ասել՝ խելքներիդ ձյուն գա: Միայն այդ գաղափարը բավարար է, որպեսզի գրագետ մարդը բացարձակ չհավատա այդ ձայնագրություններին: Ու մտածի, որ դրանք գեներացվել են արհեստական բանականության (ԱԲ) միջոցով:
Եվ երկրորդ, եթե նման բան է եղել, ապա ինչու դա չի բացահայտվել 2024-ին՝ երբ իբրև թե մշակվել է այդ ծրագիրը: Չի բացահայտվել, քանի որ նման բան չէր կարող լինել: Եվ դա այն պարզ պատճառով, որ անցյալ տարի ԱԲ-ն դեռևս չուներ այն մակարդակը, որպեսզի որևէ անձի ձայնի նմանությամբ տեքստեր արտաբերեր: Ինչը նշանակում է, որ ամոթ պետք է զգա Հակոբյան Աննան, ով գիտակցելով հանդերձ, որ այդ ողջ պատմությունը կեղծ է, փորձում է ամոթով տալ Հասմիկ Պապյանի նման անձին: Բայց այդ կեղծիքը երկար կյանք ունենալ չի կարող, և այն բացահայտվելուց հետո… Այստեղ ստիպված եմ նախադասությունը կիսատ թողնել, որովհետև այն բացահայտվելուց հետո զույգի առումով ոչինչ չի փոխվի: Ճիշտ այնպես, ինչպես երբեք կաշի չի փոխում կարմիր կովը:
