Որքան կարելի է հասկանալ երկուշաբթի ամերիկյան մամուլում հայտնված եւ Պետդեպի կողմից չմեկնաբանված տեղեկություններից առաջիկա ուրբաթ, հոկտեմբերի 23-ին Վաշինգտոն են հրավիրված ՀՀ ԱԳ նախարար Զոհրաբ Մնացականյանը եւ Ադրբեջանի նրա կոլեգան: Պետքարտուղար Պոմպեոն ուրբաթ առավոտյան հանդիպելու է Ադրբեջանի ԱԳ նախարարին, այնուհետ Մնացականյանին: Երկու նախարարների միջեւ երկկողմ կամ Պոմպեոի մասնակցությամբ եռակողմ հանդիպում կկայանա թե ոչ դեռ հստակ չէ, բայց հավանական է: Politico-ի հրապարակումից այն տպավորությունն է, որ Թրամփը կարծես մտադիր է միջազգային ասպարեզում իր առաջնորդելու կարողությունը ի ցույց դնել Հայաստանի եւ Ադրբեջանի ԱԳ նախարարների հետ Պոմպեոյի հանդիպման կոնտեքստում, ինչը համարյա վստահաբար նշանակում է, Վաշինգտոնում բեկումնային զարգացում է արձանագրվելու: Դժվար թե ընտրություններից ընդամենը օրեր առաջ միջազգային անլուծելի խնդիրներից մեկին Դոնալդ Թրամփը խառնվեր, եթե այն իրեն PR-ի հնարավորություն չապահովեր:
Ենթադրելի է ղարաբաղյան խնդրի քաղաքական կարգավորման մասով ինչ-որ բան կհայտարարվի կամ կստորագրվի Վաշինգտոնում, որը կողմերի համար այլեւս կսահմանի պարտավորություններ: Հասկանալիորեն միջնորդությունը կլինի եռանախագահներինը, բայց փաստաթղթի կյանքի կոչման երաշխավորությունը` ԱՄՆ-ինը, ինչը միակ ռեալ երաշխիքն է ղարաբաղյան հարցում, քանի որ միայն ԱՄՆ-ն է ի զորու տեղը ցույց տալ Անկարային եւ ինչ-որ բան թելադրել Ադրբեջանին: Ինչպես հույներն են ասում ինչ աղետ էլ լինի Թրամփն առհասարակ, միջազգային ասպարեզում նա երեւի միակ առաջնորդն է, որին էքսցենտրիկ Էրդողանը ձայնը կտրած լսում է: Հնարավոր է առաջիկա օրերին հրադադարի հաստատմամբ զբաղվի Մոսկվան, իսկ քաղաքական կարգավորման շրջանակով Վաշինգտոնը, հավանաբար ջանքերի համակարգմամբ էլ Փարիզը:
