«Լիվերպուլի» հարձակվող Մոհամեդ Սալահը բացահայտ հայտարարել է, որ իրեն դուր չի գալիս այն դերը, որն այժմ ունի թիմում։ Ֆուտբոլիստը նկատել է, որ վերջին երեք հանդիպումները սկսել է պահեստայինների նստարանից, ինչն իր համար անսովոր է՝ նման իրավիճակ նա նախկինում չի ունեցել։ Այդ խաղերի ընթացքում նա ընդհանուր առմամբ հանդես է եկել միայն մեկ խաղակես։
Սալահի կարծիքով՝ ստեղծված իրավիճակը անարդար է։ Նա ընդգծում է, որ տարիներ շարունակ մեծ ներդրում է ունեցել ակումբի հաջողությունների մեջ և իր կատարած աշխատանքը պետք է արժևորվի։ Ֆուտբոլիստը համոզված է, որ իր տեղը մեկնարկային կազմում պետք է լինի բնական , ոչ թե մշտական պայքարի արդյունք։
Նա հիշեցնում է, որ Պրեմիեր լիգա տեղափոխվելու պահից ի վեր ամենաարդյունավետ խաղացողներից մեկն է եղել՝ խփած գոլերի ու գոլային փոխանցումների քանակով։ Սալահը համեմատում է նաև իր նկատմամբ վերաբերմունքը այլ ֆուտբոլիստների հետ՝ նշելով, որ իր յուրաքանչյուր անհաջող խաղի դեպքում քննադատությունն ավելի սուր է դառնում։
Եգիպտացի հարձակվողը չի բացառել թիմից հեռանալու հնարավորությունը:
