«Հրապարակ». Մարտուն Գրիգորյանն ասաց, որ միայն ընտրությանն է աջակցելու, հետագա պրոցեսներում աջակցելու մասին չի հայտարարել

Հարցազրույց ՔՊ-ական պատգամավոր Կարեն Սարուխանյանի հետ։

- Գյումրու ընտրություննե­րի արդյունքները ՔՊ-ի համար նպաստավոր չէին, իսկ Մարտուն Գրիգորյանի հայտարարությունից հետո, երբ ասաց, որ ապահովելու է բավարար քվեներ Վարդան Ղուկասյանի  քաղաքապետ դառնալու համար, ՔՊ-ականներդ նյարդային, վրդովված հայտարարություններ արեցիք, որից տպավորություն կա, թե իշխանությունը պատրաստվում է խափանել Վարդան Ղուկասյանի ընտրությունը։ Դուք էլ երեկ գրառում էիք արել, թե Վարդան Ղուկասյանը սկզբի համար պետք է կարողանա դառնալ համայնքի ղեկավար, գրել էիք, թե «Ժամանակից առաջ չընկնենք, դեռ ամեն ինչ առջեւում է...»: Ի՞նչ եք ակնարկում, ի՞նչ սցենարով կարող են զարգանալ իրադարձությունները, որ Ղուկասյանը չկարողանա քաղաքապետ ընտրվել։

- Բայց ես չեմ ասել, որ ինքը չի ընտրվելու։

- Բայցեւ հորդորում եք, որ ժամանակից առաջ չընկնեն, ակնարկում եք, որ հնարավոր է՝ չընտրվի։

- Այո, պետք չէ ժամանակից առաջ ընկնել, իմ իմանալով՝ փակ-գաղտնի քվեարկություն է, եւ ոչ մեկ չգիտի, թե այդ փակ-գաղտնի քվեարկության արդյունքում ինչ է լինելու։

- Բայց փակ չէ քվեարկությունը, ինչո՞ւ եք ենթադրում, որ չպիտի ընտրեն։

- Եկեք՝ ես որեւէ ենթադրություն չանեմ, բայց քանի որ դիմացը կա նման պրոցեսներ՝ համայնքի ղեկավարի ընտրություն, դրանից հետո աշխատելու հնարավորություն, քանի որ, եթե Վարդան Ղուկասյանն ընտրվի քաղաքապետ, այնտեղ մեծամասնություն կազմող ՔՊ խմբակցություն գոյություն ունի՝ 14 մանդատ ունեցող, որն ամենաշատ մանդատները կունենա, եւ իր հետ պետք է կարողանան աշխատել։

- Ճիշտ եք, որ ամենաշատ մանդատները ՔՊ-ինն են, բայց դուք չունեք մեծամասնություն, մեծամասնություն ընդդիմադիրներն են կազմում` միասին։

- Փաստացի, մյուս ուժերը կոալիցիա չեն կազմել պարոն Ղուկասյանի հետ, այսինքն՝ իրենք էլ մեծամասնություն չեն, իրենք ուղղակի ընտրում են, ասել են, որ ընտրում ենք։
Բայց ընտրությունն ընդամենը առաջին քայլն է, բա հետո՞։ Ցանկացած որոշում մեծամասնության ձայնով պետք է ընդունվի։

- Հետո էլ Մարտուն Գրիգորյանի հետ կհամագործակցեն, ինչո՞ւ եք մտածում, որ ՔՊ-ի ձայնը որոշիչ է լինելու։

- Այ, այդ դեպքում Մարտուն Գրիգորյանն ասաց, որ միայն աջակցելու է, որ ընտրվի համայնքի ղեկավարը, Մարտուն Գրիգորյանը չի հայտարարել, որ հետագա պրոցեսներում իրենք աջակցելու են։ Այսինքն, Ռոբերտ Քոչարյանն ու Սերժ Սարգսյանը՝ այդ երկու ուժերի հովանավորները, մշտապես իրար հետ պետք է պայմանավորվածություն կայացնեն Գյումրու հարցում։

- Հա, բայց ի՞նչ խնդիր կա, Մարտուն Գրիգորյանն ինչո՞ւ պիտի դեմ լինի Գյումրու, ասենք, բյուջեն կամ այլ ծրագրեր հաստատելուն։

- Լավ կլինի, որ դա հարցնեք իրենց, ես վստահ եմ, որ իրենք` չորս քաղաքական ուժեր, իրենց հովանավորներով, լցվելու են պրոցեսների մեջ եւ ունենալու են թե՛ անձնական, թե՛ տարբեր շահագրգռվածություններ, դրա արդյունքում Գյումրին չի շահելու։ Դրա համար ես ասել եմ՝ ժամանակը ցույց կտա։

- Ձեր գրառումից կարելի է հասկանալ նաեւ, որ իշխանական կուլիսներում քննարկվում է իրավական ճանապարհով իշխանություն զավթելու սցենար, ինչպես այլ համայնքներում եք արել։

- Ես նման որեւէ բան չգիտեմ… ոչ, չկա նման բան, բայց փաստ է, չէ՞, որ Վարդան Ղուկասյանն անցնում է ապօրինի գույքի մասին օրենքով, եւ դա արդեն իրավական հարթության մեջ է։

- Տարիներ առաջ Մամիկոն Ասլանյանի հետ էլ այդկերպ վարվեցիք, ի՞նչ գիտեք, որ դրա հետեւանքը չէ, որ այսօր Գյումրիում նույն պատկերը ստացաք: Չե՞ք կարծում, որ դա քաղաքական հետապնդում կլինի, եթե հիմա իրավական գործընթացներ սկսվեն։

- Իսկ Վարդան Ղուկասյանն արդյո՞ք հենց դրա համար չի մտել քաղաքականություն, նա ինքն է բառացի հայտարարել, որ առաջադրվում է, որովհետեւ իր դեմ քրեական գործեր են հարուցվել՝ ապօրինի գույքի հետ կապված։ Արդյոք Վարդան Ղուկասյանը չի՞ մտել այս պրոցես, որպեսզի ժամանակը երբ գա, եւ այդ գույքի մասին օրենքով գործերը հասնեն վերջնանպատակին, ելնի ու ասի, որ տեսեք, ժողովուրդ ջան, ինձ բռնաճնշման են ենթարկում։

- Իսկ գուցե այն մտքով է ասել, որ առաջադրվում է, որպեսզի Գյումրուց սկսվի իշխանության հեռացումը, որը շինծու գործեր է սարքում մարդկանց գլխին:

- Ի՞նչ է նշանակում՝ գործ սարքել, եթե ինքն անցնում է ապօրինի գույքով ու բազում այդպիսի գույքեր ունի, դա սարքե՞լ է։

- Այդ օրենքն ընդունելուց հետո տասնյակ նախկինների նկատմամբ գործեր են հարուցվել, բայց էժանագին «Ռենջ ռովեր» ու դրա մակարդակի գույք է վերադարձվել ընդամենը։

- «Ռենջ ռովերը» մի օրինակ էր, դա այն տրամաբանության մեջ էր, որ ամեն ինչ հատիկ-հատիկ է վերադարձվելու։

- Վերադառնանք Գյումրուն․ Դուք թեկնածու առաջադրելո՞ւ եք, եթե առաջին նիստին Վարդան Ղուկասյանը չընտրվի, ի՞նչ է լինելու։

- Ես չեմ կարող ավագանու անունից ասել, բայց հետեւյալն է․ ՏԻՄ օրենքն ասում` եթե մեկից ավելի թեկնածու է առաջադրվում, առաջին փուլով ոչ մեկը չի ընտրվում, երկրորդ փուլ է լինում, ընտրվում է քաղաքապետ` շատ ձայներ հավաքածը, բայց ավագանու անդամների 40 տոկոս եւ ավելի քվե ստացած թեկնածուն, իսկ երրորդ տարբերակը` եթե հավասար ձայներ են ստանում, ամենատարեցն է դառնում համայնքապետ։ Իսկ եթե ավագանու առաջին նիստին  որեւէ թեկնածու չի ընտրվում, ավագանին լուծարվում է, գնում ենք արտահերթ ընտրությունների։

- Գյումրիում ձեր ստացած ձայներից ի՞նչ հետեւություններ եք արել թիմում, կարծես սպասում էիք 50+1-ի։

- Ոմանց համար՝ պարտություն, ոմանց համար՝ հաղթանակ, ՔՊ-ն ստացել է 17 հազար 188 քվե, ամենաշատ ձայներն ենք ստացել Գյումրիում` մյուս ուժերի համեմատ, երբեւէ համամասնական ընտրակարգով որեւէ ուժ այդքան ձայն չի հավաքել, 14 մանդատ ենք ստացել, բնականաբար, պառլամենտական երկրում ենք աշխատում, եւ այդ պառլամենտարիզմն աշխատում է, բայց ոմանց համար կարող է դա պարտություն լինել, ոմանց համար՝ հաղթանակ։

- Ձեր ուժի համար պարտությո՞ւն էր, թե՞ հաղթանակ։

- Երկու տեսակետից կարելի է նայել, մի մասով հաղթանակ էր, որ 2021 թվականից հետո 3 մանդատ ավել ենք ստացել, դիրքերի բարելավում է եղել, ընտրողների թիվը համարյա 10 հազարով ավելացել է, այո, դա հաղթանակ է, բայց նաեւ պարտություն է, որովհետեւ մենք չկարողացանք միանձնյա իշխանություն ձեւավորել։

- Հիմա գլուխներ թռնելո՞ւ են, պատժվողներ լինելո՞ւ են՝ ձախողման համար, ի վերջո, բոլոր իշխանություններն էլ այդքան քվե հավաքում են՝ շնորհիվ ադմինիստրատիվ ռեսուրսի։

- Ձեր ձեւակերպման հետ համամիտ չեմ, մնացածը կապրենք՝ կտեսնենք։