Կոտայքի նախկին մարզպետ` Ռոմանոս Պետրոսյանը նախարար նշանակվելուց հետո որոշել է, որ իր «թիմը» իր հետ Կոտայքի մարզպետարանից կտեղափոխվի ՀՀ շրջակա միջավայրի նախարարություն: Նախարար Պետրոսյանը սկսեց իր հավատարիմ ընկերոջից՝ Կոտայքի մարզպետարանի Ֆինանսական և սոցիալ-տնտեսական զարգացման վարչության արդեն նախկին պետ Գրիգոր Գուլյանից:
Երեկ վարչապետ Նիկոլ Փաշինյանի նոր որոշում է ստորագրել, որում նշվում է․ «Ղեկավարվելով «Քաղաքացիական ծառայության մասին» Հայաստանի Հանրապետության օրենքի 10-րդ հոդվածի 16-րդ մասով, 16-րդ հոդվածի 1-ին մասով և հիմք ընդունելով Հայաստանի Հանրապետության կառավարության 2018 թվականի դեկտեմբերի 27-ի N 1554-Ն որոշման 147-րդ և 151-րդ կետերը՝ Գրիգոր Արարատի Գուլյանին նշանակել Հայաստանի Հանրապետության շրջակա միջավայրի նախարարության գլխավոր քարտուղար»։
Ըստ մեզ հասած տեղեկությունների՝ մարզպետարանի առողջապահության և սոցիալական ապահովության վարչության պետ Անի Չիլինգարյանը եւս այլ աշխատանքի կանցնի: «Մարզը ժամանակավորապես կղեկավարի Առնակ Ավետիսյանը, մինչեւ հարմար թեկնածու գտնելը: Հիմա փնտրտուքի մեջ են, եթե այլ մարզպետի թեկնածու չգտնեն, չի բացառվում, որ Առնակ Ավետիսյանին էլ նշանակեն մարզպետ»,-ասաց զրուցակիցս:
