Աբու Դաբիում Ալիևի հետ հանդիպումից հետո, իսկ հետո նաև իր ասուլիսին Փաշինյանը ևս մեկ անգամ փաստացի հաստատեց, որ միջանցքի գործարկման պարագայում դրա վերահսկումը հայկական կողմը չի իրականացնելու, այսպես ասած` արտապատվիրակվելու է այլ ընկերության, այլ պետության: Արտակարգ և լիազոր դեսպան Ձյունիկ Աղաջանյանը «Հրապարակի» հետ զրույցում նկատեց, որ Թուրքիայում ԱՄՆ դեսպան Թոմ Բարաքի հայտարարությունը` միջանցքը վարձակալելու հավանականության մասին, կարծես թե տեսական քննարկումների շարքից է:
«Ես կարծում եմ, դա ավելի նպատակ ուներ շոշափելու դաշտը և հասկանալու, թե որքանով է ընդունելի, բայց ենթադրում եմ, որ իրենք վաղուց են նման համաձայնության հասել մեր իշխանությունների հետ, որպեսզի ամերիկյան կողմը վերահսկի այդ ճանապարհը և դա էր պատճառը, որ նոյեմբերի 9-ի հետ կապված մենք տեսանք 2022 թվականից, կամ` 2021-ի վերջից սկսած բարդություններ, և հետո ամբողջությամբ բանակցային գործընթացի` դեպի արևմտյան հարթակ տեղափոխում: Հետաքրքիր էր, այն տրամադրվածությունը, որով դեսպանը նման հայտարարություններ էր անում: Որևէ մեկը նրան իրավունք չի տվել հայ ազգին պատկանող տարածքի վրա խաղադրույքներ անել, բայց տվյալ պարագայում նրա արտահայտությունն այնպիսին էր, կարծես երկնքից մանանա են իջեցնելու, եթե ամերիկյան կողմը համաձայնի ինչ-որ ճանապարհ վերահսկել՝ առանց հասկանալու, որ այս տարածաշրջանում ևս մեկ գերտերության ներթափանցումը ուղղակի քաոս է ստեղծելու այստեղ»,-ասաց դիվանագետը:
Աղաջանյանը նկատեց, որ ամերիկյան կողմն ինքն իրենով չի գալու, միանշանակ է, որ ամերիկյանի անվան տակ տեսնելու եք թուրքերի առաջխաղացումը: Սակայն, պետք է հասկանալ, որ որևէ արևմտյան ներկայություն այստեղ ոչ Ռուսաստանը, որը ցավոք սրտի, այս կառավարությունների օրոք ռազմավարական դաշնակցից վերածվել է ուղղակի չակերտավոր գործընկերոջ, ոչ էլ մեր հարևանը՝ բարեկամ Իրանը, բացարձակապես ընդունելի չի համարի՝ անկախ նրանից, թե դա ինչ տեսքով կլինի: Կլինի ՆԱՏՕ-ի, ամերիկյան ընկերության, թե ամերիկյան ընկերությունների անվան տակ տարբեր ծառայությունների և հետախուզական կազմակերպությունների մասնակցությամբ, որոնց հիմնական նպատակը լինելու է այստեղ բացառապես խառնակչի դերակատարում իրականացնելը: Եւ նմանատիպ մոտեցումներով իրենք շատ ավելի բարդացնում են հնարավոր լուծման ուղիները և փոխանակ իրենք ճնշում գործադրեն Ադրբեջանի վրա, որ ուղղակի հաղորդակցության ուղիները բացի, ազատ փոխանակման միջոցով հնարավորություն կտա պետությունները զարգացնել՝ նրանք իրավիճակն ավելի են բարդացնում նմանատիպ առաջարկներով և էլ ավելի քաոտիկ իրավիճակ ստեղծում, կարծում է դեսպանը:
Իրանական կողմը թույլ չի տալու այդ միջանցքը կյանքի կոչել, որովհետև դա իրենց պետության անվտանգային համակարգն ամբողջությամբ փլուզող գործընթացի սկիզբ է լինելու: Իսկ մենք շատ հաճախ թերագնահատում ենք այն լծակները, որ Իրանն ունի և տուրք ենք տալիս արևմտյան լրատվամիջոցների կողմից քարոզչական այս հեղեղին, որը պատերազմի տեսքով փորձում է լվանալ ուղեղները և տրամադրությունները շեղելով` բերել մի իրավիճակի, որ թվա, թե իրենց առաջարկը դա միակ ճիշտ ելքն է, որ կարող է լինել:
«Չմոռանանք, որ մեր այսօրվա վիճակում գերագույն մեղավորների շարքում է նաև այդ Արևմուտքը, որի ծրագրի իրականացման համար է Արցախը նվիրաբերվել Ադրբեջանին: Իրենց ձեռամբ և իրենց գաղափարներով է Արցախն այսօր հայաթափվել և հայ ժողովուրդը քսանմեկերորդ դարում կրկին Ցեղասպանության է ենթարկվել: Մենք չմոռանանք դրանք և եթե նրանք փորձում են իրենց անոտք ոտքերով հրեշետակների տեսք տալ, դա ամենևին չի նշանակում, որ մենք պետք է ամեն ինչ մոռանանք և կուլ տանք գեղեցիկ այն հաբերը, որ փորձում են մեզ ներկայացնել՝ լինի դա Թրամփի կողմից որպես լավություն` իբրև թե ճանապարհն իրենց վերահսկողության տակ վերցնելը, այնպես էլ այս երկու օրը անընդհատ հնչող ինչ-որ թվային ներկայացմամբ օժանդակության ամենաբազմազան խոստումներ, որով փորձում են վարդագույն հեռանկար պատկերել մեր ժողովրդի համար, որը երբեք իրականություն չի դառնա»:
