«Հրապարակի» զրուցակիցը Բաքվի բանտում ապօրինի կալանքի տակ գտնվող լիբանանահայ Վիգեն Էուլջեքչյանի կինը՝ Լինդա Էուլջեքչյանն է:
- Նոյեմբերի 10-ին լրացավ 5 տարին, ինչ Վիգենն Ադրբեջանում է գտնվում: Այս տառապալից տարիների ընթացքում նա 3 անգամ հացադուլ է հայտարարել՝ վտանգելով առողջությունն ու կյանքը՝ արդարության հուսահատ պահանջով։ Վստահ եմ՝ իր պայքարով նաեւ ձեզ է ուժ տալիս:
- Երեք տարի առաջ ես ներկայացա հեռուստատեսությամբ՝ ամուսնուս խնդրանքով։ Ես երկու տարի լռել էի, նույնիսկ այն բանից հետո, երբ ամուսնուս գործընկերուհին՝ ընտանիքի ընկերուհի Մարալը, ազատ արձակվեց Ադրբեջանում բանտից։ Նա ինձ պատմեց ամենասարսափելի մանրամասներն այն մասին, թե ինչ են կրել ինքն ու ամուսինս բանտում կալանքի ընթացքում։ Նա երկու տարի հոգեբանական բուժում է ստացել, որի ընթացքում ես նաեւ խոր դեպրեսիայի մեջ եմ ընկել։ Հիմա ես բժշկի կողմից նշանակված հանգստացնող դեղամիջոցներ եմ ընդունում։ Ես կարող եմ պատկերացնել այն ցավը, որը կրեց ամուսինս, այդ պատճառով այդքան քաշ կորցրի։ Ես զգում եմ, որ ապրում եմ նաեւ բանտից դուրս գտնվող բանտում։
- Վերջին անգամ ե՞րբ եք կապ հաստատել նրա հետ: Գիտենք, որ առողջական վիճակը բանտում վերջին օրերին կտրուկ վատացել է. չի կարողանում քայլել, անվասայլակի ու դեղորայքի կարիք ունի, որը չի տրամադրվում։ Այս հարցում դրական փոփոխություն կա՞:
- Ամսի 16-ին ես զանգ ստացա ամուսնուցս, որին սպասում էի գրեթե 45 օր։ Վերջին անգամ, երբ մենք խոսեցինք, նա հացադուլ էր անում։ Մենք չկարողացանք պարզել՝ դադարեցրե՞լ է, թե՞ ոչ։ Ես սպասում էի այս զանգին՝ նրա վիճակը ստուգելու համար։ Ոչ ոք չգիտի, թե որքան սրտխառնոց էինք զգում, հատկապես, երբ նրանից լսեցի, որ չի կարողանում քայլել, ցավեր ունի, դեղորայք չի ընդունում եւ լավ չի ուտում՝ միայն թեյ ու հաց։ Բոլորը հարցնում էին, թե ինչպես եմ համարձակվում բարձրաձայնել։ Պետք է լռեմ եւ լա՞ց լինեմ բարձիս վրա, թե՞ նայեմ աշխարհին ու ասեմ. «Այս բանտարկյալները մեր կարիքն ունեն։ Մենք նրանց ձայնն ենք»։
- Վիգենի ներկայացուցիչները նամակ են գրել ԱՄՆ նախագահ Դոնալդ Թրամփին` խնդրելով միջնորդել, որ նա ազատ արձակվի բանտից։ Ի՞նչ ներկայացուցիչների մասին է խոսքը, ովքե՞ր են, եւ ի՞նչ արձագանք կա նամակի հետ կապված:
- Մի քանի կազմակերպություններ, այդ թվում՝ ընտանիքի փաստաբան Լուսիանա Մինասյանը, նամակներ են ուղարկել միջազգային հանրությանը, նախագահ Թրամփին եւ նախագահ Իլհամ Ալիեւին: Մինչ օրս ես չեմ լսել գործով որեւէ առաջընթացի մասին, մասնավորապես՝ առողջական պատճառներով նրան ազատ արձակելու պահանջի վերաբերյալ:
- Օրեր առաջ էլ Վիգենի փաստաբաններից Լուսիանա Մինասյանը մեզ հետ զրույցում հաստատեց, որ ինքն ու իր իսպանացի գործընկերը դիմում են ներկայացրել ՄԱԿ-ին՝ Վիգենի անհապաղ ազատ արձակման պահանջով: ՄԱԿ-ից որեւէ կերպ արձագանքե՞լ են դիմումին:
- Շնորհակալության խոսքերը բավարար չեն Լուսիանայի համար։ Լուսիանան հետեւում է գործին եւ մի քանի իսպանացի փաստաբանների հետ միասին փորձում է ապացուցել ամուսնուս անմեղությունը եւ ճնշում է գործադրում նրա ազատ արձակման համար՝ առողջական վիճակի պատճառով։ Մենք սպասում ենք պատասխանի։
- Քանի որ Վիգենը ե՛ւ Հայաստանի, ե՛ւ Լիբանանի քաղաքացի է, արդյո՞ք դիմել եք նաեւ Լիբանանի կառավարությանը, լիբանանցի ազդեցիկ գործիչներին, որպեսզի նրանք եւս ջանքեր գործադրեն՝ Ձեր ամուսնուն ազատ արձակելու ուղղությամբ:
- Վերջին չորս տարիների ընթացքում մենք նրա գործը Լիբանանի արտաքին գործերի նախարարությունում ներկայացրել ենք պատգամավորներ Պաուլա Յակուբյանի եւ Հակոբ Բագրադունյանի խնդրանքով, քանի որ նրանք ներկայացնում են հայ համայնքը: Լիբանանի կառավարությունը որեւէ պատասխան չի ստացել՝ Բեյրութում Ադրբեջանի հյուպատոսին մի քանի նամակ ուղարկելուց հետո:
- Ձեր ընտանիքը Բեյրութում է բնակվում։ Որքան գիտեմ, փոքրիկ խանութ ունեք, որով հոգում եք ընտանիքի կարիքները: Հայաստանից պաշտոնապես որեւէ աջակցություն ստացե՞լ եք:
- Բեյրութի ներկայիս տնտեսական իրավիճակից ի վեր իմ ընտանիքը բազմաթիվ դժվարությունների է բախվել։ Ես դժվար ժամանակներ եմ անցել. որտեղ էլ որ աշխատեմ, աշխատավարձը չնչին է եւ անբավարար։ Կենդանիների հանդեպ իմ սիրո պատճառով որոշեցի Բուրջ Համուդում կենդանիների խանութ բացել՝ կենդանիների համար կեր վաճառելու համար, որպեսզի երեխաներս եւ ես կարողանանք ապրուստ վաստակել եւ շարունակել մեր կյանքը։ Մենք սպասում ենք, որ բոլորը հետ գան մեզ մոտ։ Իհարկե, մեր երկրում իրավիճակը սպառնում է պատերազմով, ուստի եկամուտս շատ քիչ է։ Շնորհակալություն տիկին Անահիտ Մանասյանին՝ Հայաստանի իրավապաշտպանին, որը ՀՀ կառավարության եւ փաստաբան Սիրանուշ Սահակյանի հետ միասին միջոցներ է հատկացնում՝ մեզ բնակարանով ապահովելու համար:
