Հունվարի 27-ը որպես հայրենիքի պաշտպանության համար զոհվածների հիշատակի օր սահմանելու հարցի շուրջ ընդդիմությունն ու իշխանությունն այդպես էլ համաձայնության չեկան: Նախագծի հեղինակ՝ ԱԺ փոխնախագահ Ռուբեն Ռուբինյանն ասաց․ «Մենք ուզում ենք սահմանել օր, երբ որ ՔՊ-ականը կխոնարհվի հայրենիքի պաշտպանության համար զոհված դաշնակցականի շիրիմի առաջ, դաշնակցականը կխոնարհվի հայրենիքի համար զոհված ՔՊ-ականի շիրիմի առաջ, եւ այսպես շարունակ», սակայն ընդդիմությունն անընդունելի համարեց օրվա ընտրությունը՝ Բանակի օրվա՝ հունվարի 28-ի նախորդ օրը, եւ դեմ քվեարկեց:
Ընդդիմադիր «Հայաստան» խմբակցության քարտուղար Արծվիկ Մինասյանը հունվարի 27-ը հայրենիքի համար զոհվածների հիշատակի օր սահմանելը ճիշտ չի համարում: Նրա համոզմամբ՝ այդկերպ իշխանությունը թիրախավորում է Բանակի օրը՝ հունվարի 28-ը․ «Այնուամենայնիվ, ենթատեքստը թիրախն է հայոց բանակի: «Զոհ» բառը զուգակցվում է բանակի հետ: Ավելի շատ փիառ ակցիա է»: ԱԺ փոխնախագահ Ռուբեն Ռուբինյանն արձագանքեց. «Ես իրոք չեմ հասկանում․ ասում եք՝ թիրախը բանակն է, ինչո՞վ է թիրախը բանակը: Պարոն Մինասյան, հայրենիքի պաշտպանության համար զոհվածների գերակշիռ մեծամասնությունը հայրենիքի պաշտպանության համար զովել է բանակում, ակնհայտ է, չէ՞, այդ կապը, ես իրոք չեմ հասկանում՝ ի՞նչն է փիառ ակցիա: Այսքան զոհեր ենք ունեցել, վերջապես խաղաղություն է հաստատվել, վերջապես շունչ քաշելու ժամանակ ունենք, ու ես կարծում եմ՝ դա ամենաքիչն է, ինչ կարող ենք անել՝ նման օր սահմանելը, մեր զոհերի հիշատակը հարգելու համար»: Դաշնակցական պատգամավորը կարծում է, որ իշխանությանը ոչինչ չէր խանգարում ընդդիմության հետ համաձայնությամբ ընտրել հիշատակի օրը: Մինասյանը հիշեցրեց, որ մինչեւ 2-րդ ընթերցմամբ քննարկումը Ռուբինյանն առաջարկել էր հայրենիքի պաշտպանության համար զոհվածների հիշատակի օր սահմանել Խաչվերաց տոնին հաջորդող օրը, ինչն ընդունելի է եղել ընդդիմության համար, սակայն իշխող ՔՊ-ն հետո դեմ է արտահայտվել այդ առաջարկին եւ հիշատակի օր սահմանել հունվարի 27-ը:
«Կա մի խմբի կողմից պարտադրանք, հետեւաբար՝ մեր խմբակցությունն այս վարքագծին դեմ է քվեարկելու, ոչ թե հիշատակմանը»,- ասաց Արծվիկ Մինասյանը: Ռուբինյանը բացատրեց՝ իշխանությունն ընտրել է հիշատակի այնպիսի օր, որը կապված չէ կոնկրետ ռազմական իրադարձության հետ, իսկ Խաչվերաց տոնին հաջորդող օրվան ՔՊ-ն դեմ է եղել, որովհետեւ այդ օրը շարժական է, եւ հետո՝ Խաչվերացին հաջորդող մեռելոցի օրը հիշատակի օր է բոլոր ննջեցյալների համար, ոչ կոնկրետ հայրենիքի պաշտպանության համար զոհվածների: «Ինձ դուր է գալիս՝ ինչպես է Գեղամ Նազարյանը ձեւակերպում. առաջին օրը կհիշենք մեր երկնային բանակը, հաջորդ օրը՝ մեր երկրային բանակը»,- ասաց Ռուբինյանը:
Արցախյան 44-օրյա պատերազմում նահատակված Ժիրայր Մարգարյանի մայրը՝ Նաիրա Մարգարյանն այս մասին ասում է. «Հունվարի 27-ը սգո օր սահմանելն իշխանության համար ձեւական մի բան է: Հա, գուցե նրանք նաեւ ինչ-որ միջոցառումների էլ են մասնակցում, Փաշինյանն էլ լավ եղավ` դերասանի նման, բայց այն ժամանակ, երբ մենք մեր տղաների մարմիններն էինք փնտրում, նրանք ֆեստիվառներ ու փառատոներ էին կազմակերպում: Իրականությունը սա է: Երբ ես իմ որդու սառած մարմինն էի փնտրում, իշխանությունները գինու փառատոնի ժամանակ զվարճանում էին, ուրախանում, երգում, պարում: Այս իշխանության ամեն ինչը կեղծ է, անգամ նրանց բերած խաղաղությունն է կեղծ, ոչ մի դեպքում նրանք չեն կարող մեր երկրին խաղաղություն բերել»:
