Ազգային ժողովի արտահերթ նիստում «Հայաստան» խմբակցության պատգամավոր Աղվան Վարդանյանը քննադատել է ընտրական օրենսդրության քննարկվող փոփոխությունները՝ դրանք կապելով արտաքին քաղաքական ազդեցությունների հետ։
Պատգամավորը հայտարարել է, որ գործող իշխանությունները, իր գնահատմամբ, նախկինում ստանձնել են պարտավորություններ Ադրբեջանի առաջ՝ կապված սահմանադրական փոփոխությունների հետ։ Նրա խոսքով՝ առաջարկվող կարգավորումները, որոնք վերաբերում են ընտրական գործընթացներին և մասնավորապես արտերկրում չբնակվող քաղաքացիների մասնակցությանը, ուղղված են ընտրողների թվի սահմանափակմանը։
Վարդանյանը նաև պնդել է, որ նման քայլերը կարող են ունենալ քաղաքական նպատակներ և չեն բխում միայն տեխնիկական կամ կազմակերպչական անհրաժեշտություններից։ Նրա կարծիքով՝ իշխանությունը փորձում է վերաձևավորել ընտրական համակարգը այնպես, որ դա փոխի քաղաքական ուժերի միջև հավասարակշռությունը։
Ընդդիմադիր պատգամավորը իր ելույթում հարցադրում է արել՝ ընդգծելով, որ եվրոպական շատ երկրներում, իր գնահատմամբ, նման սահմանափակումներ չեն կիրառվում արտերկրում բնակվող քաղաքացիների ընտրական իրավունքների նկատմամբ։ Նա նաև քննադատել է իշխանության մոտեցումները՝ դրանք համարելով անհամաչափ և ընտրողների շրջանակը արհեստականորեն նեղացնող։
Ելույթի ավարտին Վարդանյանը անդրադարձել է Երևանում գտնվող Եվրոպական հանձնաժողովի նախագահ Ուրսուլա ֆոն դեր Լայենի այցին՝ այն կապելով Հայաստանում ընթացող քաղաքական գործընթացների հետ։
«Եվրոպա վազողներին հարց տամ` եվրոպական քանի՞ երկիր գիտեք, որ նման սահմանափակում ունի, եվրոպական քանի երկիր գիտեք, որ արտասահմանում ընտրատեղամաս չի բացում։ Այս ընտրություններով իշխող վարչախումբը չի ստացել Սահմանադրություն փոխելու համար անհրաժեշտ մանդատներ, հիմա շուստրիություն է ուզում անել իշխող վարչախումբը, իբր այլ պետությունների ազդեցությունը մեղմելու, ընտրողի և պետության մեջ կենսական կապը կարևորելու սղոց տակ նվազեցնում է ընտրողների ընդհանուր թիվը»,- ասել է նա:
