ՀԱԿ փոխնախագահ Լևոն Զուրաբյանը Ֆեյսբուքի իր էջում նախօրեին գրել էր, որ դեկտեմբերի 21-ին` կիրակի օրը Հանրային ռադիոյին հարցազրույց է տվել, որը տեղադրվել է ռադիոյի յութուբյան էջում, սակայն որոշ ժամանակ անց հեռացվել է բոլոր հարթակներից: Հարցազրուցավարը լրագրող Սարգիս Հարությունյանն է, որից նախ փորձեցինք մեկնաբանություն խնդրել, թե ինչպես է ստացվել, որ իր հեղինակած հաղորդաշարի հերթական թողարկումն անհետացել է համացանցից, սակայն նա մեր հեռախոսազանգերին չպատասխանեց: Զրուցել էինք Հանրային ռադիոյի տնօրեն Արմեն Քոլոյանի հետ, որը մեզ հետ զրույցում ասել էր, որ հարցազրույցն անպայման նորից կլինի իրենց պաշտոնական կայքէջում, նաև Յութուբում, ընդգծել էր, որ այն ժամանակավորապես հեռացվել է` ընդամենը մեկ բառի խմբագրման համար: Այդ մեկ բառը մոտնաժվելու է եւ նորից հեռարձակվի: Քոլոյանը համառորեն այդպես էլ չէր նշել, թե ինչ բառի մասին է խոսքը, սակայն նրա տոնից, բարկությունից կարելի էր, կարծել, թե Զուրաբյանը առնվազն սեռական հայհոյանք է հնչեցրել, ինչն այդքան զայրացրել է Ռադիոյի ղեկավարին: Լևոն Զուրաբյանը մեզ հետ զրույցում ասաց, որ խոսքն «անմեղսունակ» բառի մասին է: Հարցրինք` նայե՞լ է հարցազրույցի մոնտաժված տարբերակը, գուցե էլի՞ ինչ-որ հատվածներ կրճատել են և զրույցի միտքը աղճատել: Նա մեզ հետ զրույցում ասաց. «Անկեղծ ասած, երևի սխալվել եմ, որ դեռ չեմ նայել, սակայն մտածել եմ, որ նման ստորության չեն գնա»: Զուրաբյանին նաև հարցրինք` այս դեպքից հետո կգնա՞ կրկին Հանրային ռադիո, նա ասաց. «Կգնամ, այո, մեկ բառ են ընդամենը գրաքննել ու դրա ձեռքը կրակն են ընկել»:
