Ձեռքը արնահոսում էր, ջիլը ոնց որ պոկված, կախված լիներ. «Սասնա ծռերի» գործով տուժողները հարցաքննվում են

Երեւանի ընդհանուր իրավասության դատարանի Շենգավիթի նստավայրում շարունակվում է «Սասնա ծռեր» խմբի 10 անդամի գործով դատական նիստին տուժողների հարցաքննությունը։ Տուժող ոստիկաններից Տիգրան Դանիելյանը դատարանին հայտնեց, որ հուլիսի 16-ի լույս 17-ի գիշերը «Ծռերը» ներխուժել են ՊՊԾ գունդ, եւ սկսվել է կրակահերթ. «Սեռական բնույթի հայհոյանքներ էին տալիս, կրակահերթ սկսվեց, զգացի, որ ուզում են խփեն ինձ։ Կրակահերթի ընթացքում վայր եմ ընկել, վնասվել է ուսս, երբ շտապօգնություն է եկել գնդի տարածք, բժիշկներն ասել են` եթե կես ժամ էլ էստեղ մնաս, կմեռնես։ Ես էլ վեր կացա, ասացի` կրակում եք կրակեք, ես գնում եմ ու գնացի, առանց խոչընդոտի դուրս եկանք, ու ինձ տարան «Էրեբունի» բժշկական կենտրոն»։

Տուժողը դատարանին նաեւ հայտնեց, որ ՊՊԾ գնդի ներսում գտնվելու ժամանակ օգնություն է ցուցաբերել այդ ժամանակ դեռ վիրավոր Գագիկ Մկրտչյանին. «Աջ ձեռքն էր վիրավոր, արնահոսում էր, ջիլը ոնց որ պոկված, կախված լիներ: Օգնեցի ձեռքը կապել: Հետո, որ իրավիճակը հանդարտվեց, իրանցից մեկը օգնեց ժգուտով կապել ձեռքը»։

Մեկնաբանություն
X