Ես չեմ սպասում, որ առաջիկայում բախումներ կլինեն

Ազգային ժողովի ԲՀԿ-ական փոխնախագահ Միքայել Մելքումյանը երեկ մեզ հետ զրույցում ասաց, որ նոր կառավարության վարած քաղաքականությունն իրենց համար ընդունելի է, իրենք կառավարության ծրագրին կողմ են քվեարկել եւ աջակցում են գործող կառավարությանը, որի մաս են կազմում նաեւ։ Այսինքն՝ ԲՀԿ-ն այս պահին ընդդիմություն չէ։ Այդ դեպքում ի՞նչ կարգավիճակով է մասնակցելու արտահերթ խորհրդարանական ընտրություններին, որտեղ իրենց մրցակից է լինելու նաեւ Նիկոլ Փաշինյանի «Քաղաքացիական պայմանագիրը», ո՞րն է լինելու ԲՀԿ-ի թիրախը։

«Նախեւառաջ՝ «Բարգավաճ Հայաստան» կուսակցությունն էն քաղաքական միավորն է, որն ինքն իր քաղաքական օրակարգը մշակողը եւ իրացնողն է։ Այսինքն՝ տենց չի, որ ինքն ազդված է տարբեր վայրիվերումներից, տարբեր գործընթացներից։ Այսինքն՝ ինքը հզոր ուժ է եւ, էդ առումով, ինքը կարողանում է ինքնուրույն ձեւավորել եւ իրականացնել։ Պատահական չի, որ պառլամենտում ինքն ունի էն ներկայացվածությունը, որ կա։ Երկրորդ․ մեր ծրագրերը բոլորին հայտնի են։ Ինչ պառլամենտական ընտրություն երբ էլ լինի, մենք մոտենում ենք արդեն մեր հռչակած ծրագրերի դրույթներն իրականացնելու տեսանկյունին»,- մեզ հետ զրույցում ասաց Միքայել Մելքումյանը։

- Բայց, փաստացի, պայքարելու եք իշխանության համար, չէ՞, այդ թվում՝ սեպտեմբերի 23-ին Երեւան քաղաքը վերցնելու։

-Մենք չենք դիտարկում թշնամիներ, ազատ, արդար, մրցակցային հարաբերություններ են։ Այո, մենք գնալու ենք մրցակցության։

- Եվ այսօր գործող իշխանության թերեւս ամենաուժեղ մրցակիցը հենց ԲՀԿ-ն է լինելու։ Եթե բախում առաջանա ձեր միջեւ, ի՞նչ եք անելու։

-Ուրեմն նոր իրավիճակում, երբ որ հռչակված են էն համերաշխության եւ սիրո գաղափարները, չեմ կարծում, որ… մենք եւ տարբեր գործիչներ հռչակել ենք, որ մենք գնում ենք փոխադարձ հարգանքի, մեր մրցակիցներին չնսեմացնելու ճանապարհով։ Ես չեմ սպասում, որ առաջիկայում բախումներ կլինեն։

- Բայց վերջին շրջանում որոշակի լարում էր առաջացել ԲՀԿ-ի եւ Նիկոլ Փաշինյանի միջեւ, թեպետ կարծես թե «վերեւների» մակարդակով արդեն կոմպրոմիսի են եկել։

-Չէ, չեմ կարծում, թե լարվածություն եղել է, կարող է տարբեր հարցերի վերաբերյալ այլ մոտեցումներ են եղել…

- Օրինակ՝ Էդուարդ Բաբայանի կալանավորումը եւ ազատ արձակումը թերեւս այդ մասին են վկայում։

-Տեսեք, մենք որեւէ երեւույթ ընդհանուր քաղաքական դաշտում էնպես չենք դիտարկում, որ դա էդ երեւույթի վրա էական ազդեցություն ունենա։ Դրանք իրավական գործընթացներ էին, մենք չէինք քաղաքականացնում։ Պետք չի դա բերել քաղաքական ընդհանուր դաշտ, ոնց որ հիշում եք, էն որ ասում էինք՝ խնամիությունը քաղաքական կատեգորիա չի։

- Չքաղաքականացրիք այնքան ժամանակ, մինչեւ որ ազատ արձակվեց Էդուարդ Բաբայանը, բայց կարող էր ավելի երկար մնալ, եւ պարզվեր, որ դրա տակ քաղաքական ենթատեքստ կա։

-Ուրեմն Դուք գիտեք, չէ՞, որ քաղաքականությունը հնարավորությունների արվեստ է։ Այսինքն, մենք «եթե»-ներով չենք խոսում, ինչ որ կա, ռեալ պոլիտիկ է, ռեալ կյանք է, մենք միայն դիտարկում ենք այդ Ձեր ասած գործընթացներն իրավական հարթության վրա։ Եթե մենք փորձենք երկրում տեղի ունեցող շատ-շատ գործընթացներ իրավականից դուրս դիտարկել, ուրեմն չենք կարող քաղաքականությամբ զբաղվել։

- Եթե ռեալ պոլիտիկում դիտարկենք հետեւյալ իրավիճակը, որ Նիկոլ Փաշինյանի իշխանության իրավապահ մարմինները հանկարծ հայտնաբերում են որոշակի խնդիրներ թե՛ Գագիկ Ծառուկյանի գործունեության հետ կապված, թե՛ ձեր մյուս գործընկերների, եւ դրանք հետո ծանր իրավական հետեւանքներ են ունենում ձեզ համար, ընդհուպ՝ քրեական հետապնդումներ…

-Ասեմ, ուրեմն, տասնյակներով ստուգվել են, չէ՞, թե՛ Գագիկ Ծառուկյանի, թե՛ մեր խմբակցության մյուս պատգամավորների բիզնես գործունեությունները, եւ մեկ անգամ չէ, դրանք միշտ բաց են եղել էդ ստուգումների համար։ Եվ ի՞նչ է պարզվել․ պարզվել է, որ կարգուկանոն կա, ամեն ինչ պարզ է։

- Դա Սերժ Սարգսյանի ժամանակ էր։

-Ոչ, ոչ, միշտ էլ պետական մարմիններն իրենց գործունեությունը կատարել են ծրագրային, դա հատուկ բնույթ չի կրել, որ հատուկ թիրախավորեն, գան ասեն՝ սենց ա։ Դե, հիմա ստուգել են, ստուգում են, ընթացքում ա, նորմալ, բնականոն աշխատանք ա։ Բայց մի բան պետք է հասկանանք, որ էսօրվա մեր իշխանությունը, կառավարությունը հեղափոխությունից հետո, այսինքն՝ մենք ո՞նց ենք ընկալում, որ օրենքի գերակայություն պիտի լինի, չէ՞։ Եթե օրենքի գերակայություն կա, մնացած բոլոր բաները բխում են դրանից, այսինքն՝ պետք չի քաղաքականություն իրականացնելիս երկյուղել, երկյուղած նայել, որ օրենքի գերակայությունն իմ անձի վրա էլ կտարածվի։ Այո, եթե անձերի վրա էլ ինչ-որ ազդեցություն կլինի անձնական, մարդիկ պետք է իրենց անձնական շահերը ստորադասեն պետական շահից։

- Հիմա այն, ինչ տեղի է ունենում Ռոբերտ Քոչարյանի հետ, դա զուտ իրավակա՞ն պրոցես է, թե՞ քաղաքական ենթատեքստ էլ ունի։

-Ուրեմն տեսեք, իր բնույթով, որը կապված է Մարտի 1-ի գործընթացի հետ, դա իրավական գործընթաց ենք մենք դիտարկել, վերջ։ Այսինքն՝ պետությանը պետք է, որպեսզի նախորդ բոլոր չպարզաբանված հարցերը պարզաբանվեն, որ առաջ նայենք, ասենք՝ էս հարցը լուծված է, Մարտի 1-ն է, Հոկտեմբերի 27-ն է եւ այլն։ Իրավական մասը նայենք, քաղաքական մասը թողնենք թող քաղաքական գործիչներն իրենց ճաշակին ու ոճին համապատասխան մեկնաբանություն տան։

- Հիմա Ձեր ճաշակին ու ոճին համապատասխան՝ ինչպիսի՞ քաղաքական գնահատական կտաք սրան։

-Ես ասել եմ, որ ես դիտարկում եմ սա իրավական գործընթացի մեջ։ Այսքանը։

- ԲՀԿ-ն՝ որպես Քոչարյանի հետ երբեմնի դաշնակից քաղաքական ուժ, Նիկոլ Փաշինյանին տվե՞լ է այն երաշխիքները, որ հակահեղափոխության ռիսկ առնվազն իր մասով չկա։

-Ո՞վ, «Բարգավա՞ճը»։ Ուրեմն էսպիսի բան ասեմ ես ԲՀԿ-ի տասը հիմնադիրներից մեկն եմ, 2006 թվականի հունվարի 24-ին։ Ու որեւէ անգամ ես տեսած չկամ, որ Քոչարյանը կամ իր շրջապատից ինչ-որ մեկը «Բարգավաճի» գործերին խառնվի։ Հիմա, եթե ես հիմնադիր եմ, կա՛մ դրա մասին պետք է լսած լինեի, կա՛մ տեսած լինեի, չէ՞։ Ուղղակի, նա երբ որ եղել է հանրապետության նախագահ, ինքն ասում էր, չէ՞, որ իմ կուսակցությունը ժողովուրդն է, այսինքն՝ էդ ռեժիմով… բայց ես, լինելով կուսակցության հիմնադրման ակունքներում, ոչ մի անգամ չեմ տեսել, որ Ձեր ասածով նա խառնվի…

- Կարճ ասած՝ Փաշինյանը ստուգե՞լ է ԲՀԿ-ին, որ նա «սպիտակ» է։

-Ուրեմն ես ասացի էն, ինչ որ Դուք ասացիք Քոչարյանի մասով։ Այսքանը։

Մեկնաբանություն
X