Արթիկցիները դժգոհ են նոր ոստիկանապետից․ Պետրոս Մակեյան

«Ժողովրդավարական հայրենիք» կուսակցության նախագահ, նախկին քաղբանտարկյալ Պետրոս Մակեյանը կարծում է, որ հասարակությունը շատ մեծ սպասելիքներ ունի հեղափոխությունից։ «Հասարակությունն առայժմ բավարարված է կառավարության գործունեությունից։ Շատ տրամաբանական է, որ իրավապահ մարմիններն ակտիվ են, որովհետեւ ավազակապետական ռեժիմը 20 տարի թալանել է երկիրը։ Եվ հիմա օրինաչափ է, որ պետք է հաստատվի օրինականություն»,- մեզ հետ զրույցում ասաց Պետրոս Մակեյանը։

Մակեյանին, սակայն, տարակուսանք է պատճառում, որ նոր իշխանությունների օրոք Ոստիկանության Արթիկի բաժնի պետ է նշանակվել Մինո Մխիթարյանը։ «Նա մարդ է, որը միշտ եղել է թալանի կենտրոնում եւ հակահեղափոխության առաջամարտիկներից է։ Նա ճնշում էր երիտասարդներին։ Եվ երբ նա նշանակվեց ոստիկանապետ, այդ տարածաշրջանի ժողովրդի դժգոհությունն է առաջացրել։ Դա լոկալ խնդիր է։ Մեծ հաշվով՝ պրոցեսը ընթանում է դրական ուղղությամբ»,- նշեց մեր զրուցակիցը։ Պետրոս Մակեյանը նկատում է, որ ժողովրդի կենսամակարդակի բարձրացում չի նկատվում, եւ նոր իշխանությունները, արդարությանը հետամուտ լինելուն զուգահեռ, պետք է մտածեն նաեւ տնտեսական ռեֆորմներ անցկացնելու մասին։

«Նախկին վարչախմբի օլիգարխները փորձում են խուսափել կամ սաբոտաժ անել, ինչը խնդիրներ է ստեղծում իշխանությունների համար։ Երրորդը՝ անհասկանալի է, թե ինչու են իշխանությունները հապաղում անդրադառնալ գազի եւ էլեկտրաէներգիայի սակագների իջեցմանը, քանի որ դրանք իրենց իրական արժեքից 40-50 տոկոս բարձր են։ Անապահով ընտանիքների համար սակագնի իջեցումը ընդամենը խաբկանք է։ Տնտեսական ոլորտում, ակնհայտ է, որ իշխանություններն ունեն լուրջ անելիքներ, որպեսզի մարդիկ իրենց մաշկի վրա զգան դրական փոփոխությունները»,- արձագանքեց Պետրոս Մակեյանը։

Թագուհի Հակոբյան

Մեկնաբանություն
X