Վահրամ Բաղդասարյանը՝ «Հայկական վերածնունդի» և բարոյականության սահմանների մասին

ԱԺ ՀՀԿ խմբակցության ղեկավար Վահրամ Բաղդասարյանն այսօր ԱԺ ճեպազրույցների ժամին անդրադարձավ Վանաձորում «Հայկական վերածնունդ» կուսակցության և ՀՀԿ-ՀՅԴ կոալիցիայի միջև ստորագրված հուշագրին: Նրան հիշեցրինք, որ Հեղինե Բիշարյանը ժամանակին անբարոյական էր համարել նրանց, որոնք կհամագործակցեն ՀՀԿ-ի հետ: Հիմա, փաստորեն, իրենք համագործակցեցին: Ուստի ՀՀԿ-ի համար որքանո՞վ է նորմալ համագործակցության հուշագիր ստորագրել «անբարոյականների» հետ:

Անդրադառնալով այս հարցադրումներին՝ Բաղդասարյանն ասաց, որ կարող են քաղաքական գործընթացները զարգանալ այնպես, որ ամենասուր ընդդիմադիր ուժը հուշագիր ստորագրի իշխող կուսակցության հետ: «Դա չի նշանակում, որ նրանք ընտրությունների ժամանակ իրենց ձայները տվել են իշխանությանը: Ինձ թվում է, որ սա քաղաքական պրոցես է, և քաղաքականության մեջ կարող է ամեն ինչ փոխվել մի գիշերվա մեջ»,- ասաց Բաղդասարյանը:

Hraparak.am-ի հարցին, թե ինչով են վարձահատույց լինելու նախկինում «Օրինաց երկիր», այսօր «Հայկական վերածնունդ» կուսակցությանը՝ իրենց հերթական անգամ մատուցած ծառայության համար, Բաղդասարյանն ասաց. «Մենք որևէ մեկին որևէ ծառայություն մատուցելու կարիք չունենք, (երևի նկատի ունի՝ վարձահատույց լինելու), այն, ինչ որ պայմանավորված է, դրանք ամրապնդված են հուշագրում»:

-Պարոն Բաղդասարյան, կասե՞ք՝ ո՞րն է Ձեզ համար բարոյականության սահմանը քաղաքականության մեջ:

-Քաղաքականության մեջ չեմ կարծում, որ բարոյականությունը պետք է այս չափանիշներով համեմատել: Նորից եմ կրկնում, քաղաքականության մեջ շատ արագ կարող են փոփոխություններ լինել, գործընթացներ փոխվել, և որևէ մեկի ճակատին գրված չէ, որ նա անընդհատ պետք է լինի ընդդիմադիր կամ իշխանություն: Շատ հնարավոր է, որ լինեն վերաձևավորումներ, կոալիցիաներ, և ինձ թվում է՝ սա շատ նորմալ գործընթաց է:

-Մի ճշտում՝ բարոյականությունը կամ անբարոյականությունը սահմաններ ունի՞ քաղաքականության մեջ:

-Ինձ թվում է՝ քաղաքականության մեջ ամենաճիշտը քաղաքական դիրքորոշման և գաղափարախոսության պահպանումն է:

Վահե ՄԱԿԱՐՅԱՆ

Մեկնաբանություն
X