Սերժ Ավետիքյանի «ժամանակակից հեքիաթի» պրեմիերան Խաչիկ գյուղում (լուսանկարներ)

>

Այն, ինչին սպասում էին

Սահմանամերձ Խաչիկ համայնքի միակ դպրոցի ֆուտբոլի դաշտը երեկ վերածվել էր մի մեծ բացօթյա կինոդահլիճի։ Խաչիկցիները երկար են սպասել այս ֆիլմի պրեմիերային՝ երկու տարի, չէ՞ որ իրենք ևս մասնակցել են ֆիլմի ստեղծման աշխատանքներին։ Երկար սպասված ֆիլմի ցուցադրությունը երեկ վերջապես տեղի ունեցավ՝ ռեժիսորի, գլխավոր դերասանների, նույնիսկ Ֆրանսիայի դեսպանի մասնակցությամբ։

Նա, ում սպասում էին

Հայ-ֆրանսիական համատեղ արտադրությամբ ֆիլմը՝ «Նա, ում սպասում էին» վերտառությամբ, ֆրանսահայ ռեժիսոր Սերժ Ավետիքյանի ստեղծագործությունն է։ Մինչ ֆիլմի ցուցադրությունը, նա լրագրողների հետ զրույցում ընդգծեց, որ ֆիլմը համամարդկային է՝ ունիվերսալ․ «Ես կոմեդիա այդքան չէի նկարել, իմ կարճամետրաժ ֆիլմում կային մի քանի այդպես աբսուրդ մոտեցումներ, հումոր, որը ոչ կլասիկ ոճով մատուցված հումոր էր, բայց մեր ցանկությունն էր շփվել այնպիսի թեմաների հետ, որոնք տրագիկ թեմաներ են։ Իսկ տրագիկ թեմաները կոմեդիայի միջոցով կարողանում են ապրել ավելի թեթև ձևով, բայց չի նշանակում ոչ ավելի խորը։ Ես համարում եմ, որ ֆիլմը ժամանակակից հեքիաթ է»։

Պատահականորեն Ադրբեջանից Հայաստանում հայտնված ֆրանսիացի դերասանին գյուղացիները նախ համարում են լրտես, ապա ուսումնասիրելով վերջինիս անձնագիրը՝ հայտնաբերում, որ ֆրանսիացի է, ավելին՝ դեռ կարծում են, թե երկար սպասված այն անձնավորությունն է, որը պետք է ներդրումներ կատարի իրենց գյուղում, որտեղ 21-րդ դարում դեռ էլեկտրաէներգիայի խնդիր կա։

«Իսկ այդ ֆրանսիացի դերասանը կարծես առանց հասկանալու իր ամենամեծ դերն է խաղալու՝ իր ամենակարևոր դերը, այն մարդու դերը, որ պետք է փրկի մի գյուղի ժողովուրդ, որը վատ վիճակում է, վերանորոգի ամբողջը, եկեղեցին, վերանորոգի դպրոցը, ստադիոնը և այլն և այլն»,- ասաց Սերժ Ավետիքյանը։

Ինչպես նշել էինք, ֆիլմի նկարահանումները տեղի էին ունեցել 2 տարի առաջ, այնպես որ դերասանական կազմը մեծ կարոտով էր վերադարձել սահմանամերձ Խաչիկ․ «Ես կարոտով վերադարձա Խաչիկ գյուղ։ Այդ մի ամիսը մենք մեր տանն էինք, մեր շրջապատում էինք, և ինչ հերոսաբար է տանում իր վրա դրված․․․ իրենք իրենց պարտքն են համարում լինել այնպիսին, որ սահմանը լինի կանգուն։ Մի հպարտ ժողովրդի հետ հանդիպեցի ես այստեղ, իմ կարոտը գալիս էր դրանից»։

Գյուղի խարխլված գյուղապետարանի դահլիճում երեկ ասուլիսին մասնակցում էր նաև Հայաստանում Ֆրանսիայի դեսպան Ժան-Ֆրանսուա Շարպանտիեն, ով հայերենով ողջունեց բոլորին և ընդգծեց, որ անպայման ցանկություն է հայտնել էլի լինելու Խաչիկ գյուղում և որ ֆիլմը շատ է սիրել։

Ֆիլմն արդեն հասցրել է «շրջագայել»

Ռեժիսոր Սերժ Ավետիքյանը պատմեց, որ մինչ հայաստանյան պրեմիերան, ֆիլմն արդեն հասցրել են դիտել Ֆրանսիայում, մոտ 30 հազար հանդիսատես է ունեցել, նույնիսկ հասցրել է Մինեապոլիսի փառատոնում շահել հանդիսատեսի համակրանք մրցանակը․ «Ես 30 քաղաքում եմ եղել և կարող եմ ձեզ իսկապես ասել, որ ոչ մի անգամ ֆրանսիացի հանդիսատեսը ոչ դժգոհ, ոչ էլ գանգատվելով մոտեցավ ֆիլմին, ընդհակառակը։ Ֆրանսիացիների համար ֆիլմը շատ հետաքրքիր է, որովհետև օտարը ֆիլմում ֆրանսիացին էր։ Ինձ հարցնում էին՝ մեր հայկական հումորը կհասկանա՞ն, իհարկե, եթե ֆիլմը ճիշտ է մատուցված, ճիշտ է արտահայտում հանդիսատեսի համար։ Եվ ի վերջո, խաչիկցիները ներկա են եղել այդ ֆիլմում այնտեղ, և դա է մեծ հպարտությունն ինձ համար»։

Ե՛վ սահմանն են պաշտպանում, և՛ մշակույթը

Երեկ Խաչիկում էր նաև կանադահայ դերասանուհի Արսինե Խանջյանը, նա շնորհակալություն հայտնեց գյուղի բնակիչներին, որ և՛ սահմանն են պահում, և՛ մշակույթը․ «Հայաստանը շատ վատ վիճակի մեջ է, մշակույթ առաջացնելու կարելիությունները և նյութական բոլոր օժանդակցություններն իշխանության կողմից և որևէ մեկ այլ հաստատությունների կողմից վատանում են, դուք ձեր օրինակով մասնակցեցիք զարգացնելու մեր Հայաստանի մշակույթը։ Ոչ թե միայն սահմանն եք պաշտպանում, նաև մեր մշակույթը»։

Մեկնաբանություն
X