Երեւանի ավագանու անդամներն այսօր «իրար էին ուտում» (ֆոտոշարք)

>

Այսօր Երեւանի ավագանու նիստը բավականին լարված մթնոլորտում անցավ։ «Երկիր Ծիրանի» խմբակցության ավագանու անդամները, բացառությամբ խմբակցության նախագահ Զարուհի Փոստանջյանի, oրակարգային գրեթե բոլոր հարցերի քվեարկություններից առաջ մայրաքաղաքի տարբեր խնդիրների վերաբերյալ տեսակետներ էին հայտնում, քննադատական ելույթներ ունենում: Այս լարված մթնոլորտում բազմաթիվ վիճաբանություններ տեղի ունեցան. միմյանց «բախվեցին» ԵԾ-ի ու ՀՀԿ-ի, ԵԾ-ի ու ԵԼՔ-ի, ԵԼՔ-ի ու ՀՀԿ-ի ավագանու անդամները, ինչպես ասում են՝ էլ գող փիսո, էլ քաչալ շուն։

Կրքերը թեժացան հատկապես, երբ «ԵԼՔ» խմբակցության ավագանու անդամ Ալեն Սիմոնյանի եւ ՀՀԿ-ից «Ծիտ» մականվամբ հայտնի Արմեն Սահակյանի միջեւ վիճաբանություն տեղի ունեցավ։ Բանն այն է, որ, ըստ Ալեն Սիմոնյանի, Սահակյանը վատ է խոսել «ԵԼՔ» խմբակցության անդամ Անահիտ Բախշյանի հետ։ «Լսի, Ծիտ, այ տղա չի քո համար»,- դիմելով Արմեն Սահակյանին՝ ասաց Ալեն Սիմոնյանը՝ նշելով Սահակյանի մականունը, վերջինս էլ հակադարձեց. «Ծիտը քեռիդ ա է։ Ձենդ իջացրու, արա»։

Այս լեզվակռիվը մի քանի րոպե տեւեց, Ալեն Սիմոնյանը, դիմելով Երեւանի քաղաքապետ Տարոն Մարգարյանին, որը վարում է նիստը, ասաց. «Մենք պետք է բոլորս էթիկայի կանոնները պահենք, չի կարելի, որ ձեր խմբակցության անդամը մեր խմբակցության անդամին, որը տարեց կին է, ամեն օր պարոն Բախշյանով դիմի, եթե նմանատիպ վերաբերմունք է լինելու, մենք իմանանք՝ մեզ ոնց ենք պահում։ Ո՞նց կարելի ա մեծ կնոջը դահլիճում ասի՝ լսի, Անո, պարոն Բախշյան։ Է՞դ ա, սե՞նց ենք վարվելու իրար հետ»։ Տարոն Մարգարյանն էլ խնդրեց միմյանց նկատմամբ լինել հարգանքով։

Խոսակցությանը խառնվեց ՀՀԿ-աական ավագանու անդամ Հովհաննես Ավանեսյանը, որը հայտնի է «Բլդի» մականվամբ՝ կոչ անելով Ալեն Սիմոնյանին հանդարտվել։ ԵԼՔ-ից Անի Խաչատրյանը եւս միջամտեց։ Ընդմիջումից հետո՝ միջանցքում, Հովհաննես Ավանեսյանը փորձեց հաշիվներ մաքրել Անի Խաչատրյանի հետ, վերջինս էլ ասաց՝ «2 մատով կխեղդեմ, օֆ չեմ անի»։

Նիստին վիճաբանություններն ու իրար վրա ցեխշպրտոցին շարունակվեց։ «Երկիր Ծիրանիի» ավագանու անդամները առաջին օրվանից, ինչ ոտք են դրել քաղաքապետարան, մշտապես բարձրացնում են էլեկտրոնային սարքերի չաշխատելու հարցը՝ նշելով, որ դրանց համար գումար է վճարվել: Այսօր եւս այդ հարցը բարձրացվեց Մարինա Խաչատրյանի կողմից եւ նա ավագանու նիստը համարեց գավառական ժողով։ Իսկ երբ Տարոն Մարգարյանը նրան ելույթի իրավունք չէր տալիս, «Երկիր Ծիրանիի» ավագանու անդամ Սոնա Աղեկյանն ասաց․. «Պարոն զեկուցող, սա Ձեզ համար ՍԱՍ-ի ժողովը չի»՝ նկատի ունենալով խորհրդարական ընտրություններից առաջ ԱԺ պատգամավոր Արտակ Սարգսյանին պատկանող ՍԱՍ սուպերմարկետների ցանցի աշխատակիցների հետ տեղի ունեցած հայտնի սկանդալային ժողովը։

ԵԼՔ-ի ավագանու անդամներն էլ պարբերաբար դժգոհում էին, որ ԵԾ-ն ոչ բովանդակային ելույթներ է ունենում, խանգարում իրենց։ «Երկիր Ծիրանին» էլ «տակ չմնաց»՝ ԵԼՔ-ին համարեց իբր ընդդիմադիր եւ շարունակեց իր թունդ ընդդիմադիր դիրքորոշումը՝ գրեթե բոլոր օրակարգային հարցերին դեմ քվեարկելով։

Միստիկա՞ էր, թե՞ պատահականություն, ԵԾ-ի ավագանու անդամի ելույթ ունենալու ժամանակ կոտրվեց նրա ջրի բաժակը, ինչին ՀՀԿ-ականներից ոմանք արձագանքեցին՝ չարը խափանվեց։

ՀՀԿ-ի ավագանու անդամ Լեւոն Իգիթյանը Տարոն Մարգարյանից ելույթի հնարավորություն խնդրեց եւ քարոզ կարդաց ԵԾ-ի գլխին, սակայն ինչպես ասում են՝ գելի գլխին ավետարան ես կարդում, ասում է՝ թող ոչխարս գնաց, նրանք շարունակեցին իրենց բուռն քննադատություններն ու սուր ելույթները, որն այս անգամ հունից հանեց ավագանու անդամ Նաիրա Նահապետյանին՝ ՀԷԿ-երի Նառային։ Նա, դիմելով «Երկիր Ծիրանիի» Մարինա Խաչատրյանին դիմելով, ասաց․ «Բերանդ փակի՛ մի քիչ, հիմա՛ ր», այն բանից հետո, երբ Խաչատրյանը սկսել էր տեղից խոսել։

3 խմբակցությունների թեժ բախումներին կողքից լուռ հետեւում էին «Երկիր Ծիրանիից» դեռ ամիսներ առաջ կռվով-դավով դուրս եկած Հայկ Պետրոսյանն ու Մնացական Պարակշիեւը, որոնք իրենց հռչակել են ավագանու անկախ անդամներ։ Նրանք մասնակցում են քվեարկությանը եւ սահմանափակվում միայն դրանով։

Նշենք, որ այսօրվա նիստում 19 օրակարգային հարցերն էլ ընդունվեցին։

Աննա ՊԱՊԻԿՅԱՆ

Մեկնաբանություն
X