Գործելու շյուղեր, նավակի թիեր, սրեր, թրեր. ի՞նչ իր է արգելված բերել դատարանի շենք

Քաղաքական 2 դատավարությունների՝ «Սասնա ծռերի» եւ Ժիրայր Սեֆիլյանի եւ մյուսների գործով մեկնարկի առաջին իսկ օրվանից այս գործերով փաստաբանները կանգնեցին նորահայտ խնդրի առաջ՝ մինչ դատական նիստերի դահլիճ մտնելը պետք է զննության ենթարկվեն, ինչ իրենից ներկայացնում է դատարկել ամբողջությամբ պայուսակը, քանի որ մետաղաորսիչը ֆիքսում է անգամ դատարկ պայուսակը։ Այս ամենը փաստաբանները անվանեցին խուզարկություն, ինչին չէին պատրաստվում ենթարկվել։ Նրանցից շատերը, չենթարկվելով դատական կարգադրիչի պահաջին, մնում էին դատարանի շենքի դիմաց։ Հաճախ փաստաբանները կարգադրիչներից պահաջում էին ներկայացնել արգելված իրերի ցանկ, որ իրենք հստակ իմանան՝ ինչն էլ կարելի դատարան բերել, ինչը՝ ոչ։

Եվ, ահա, ՀՀ դատարանների նախագահների խորհուրդը, անսալով փաստաբանների հարցերին, որոշել է հրապարակել արգելված իրերի ցանկ, որոնք չի կարելի բերել դատարան։ Նշենք, որ ներկայացված ցանկը բավականին զվարճալի է, օրինակ՝ արգելավել է դատարան բերել սրեր, թրեր, գործելու շյուղեր, բեյսբոլի մականներ, գոլֆի թիեր, հոկկեյի թիեր, նավակի թիեր, բիլյարդի կիեր, ձկնորսության կարթեր, մահակներ։

Ներկայացնում ենք արգելված իրերի ամբողջական ցանկը.

Զենք՝ ա) ցանկացած առարկա, որն ի վիճակի է կրակ արձակելու և վնաս պատճառելու, այդ թվում՝ բոլոր հրաձգային զենքերը (ատրճանակ, ռեվոլվեր, հրացան, կարճափող զենք և այլն),

բ) հրազենային զենքի կրկնօրինակներ կամ նմանակումներ)

գ) հրազենային զենքի առանձին մասեր,

դ) ազային զենք, ե) պնևմատիկ ատրճանակներ, հրացաններ և գնդիկավոր հրացան,

զ) ազդանշանային ատրճանակ,

է) մեկնարկային ատրճանակներ,

ը) բոլոր տիպի խաղալիք ատրճանակներ

թ) գնդակ նետելու հարմարանքներ,

ժ) մեխ և պտուտակ ամրացնելու արդյունաբերական սարքեր,

ժա) արբալետներ, նիզակներ,

ժբ) բթացնող կամ հարվածող սարքեր,

ժգ) հրազենային զենքի տեսքով պատրաստված կրակայրիչներ,

ժդ) էլեկտրոշոկային սարքեր: Կտրող, ծակող զենք և սուր առարկաներ ա) կացիններ, նետեր, մաչետեներ,

բ) ցանկացած երկարության շեղբով բացովի կամ ծալովի դանակներ,

գ) ցանկացած երկարության սայրով մետաղյա կամ որպես պոտենցիալ զենք օգտագործվելու համար բավարար ցանկացած այլ ամուր նյութից պատրաստված դանակներ,

դ) բաց ածելիներ և շեղբեր,

ե) սրեր, թրեր,

զ) մկրատներ,

է) մետաղյա աստղեր,

ը) արդյունաբերական ապրանքներ, որոնք կարող են օգտագործվել որպես ծակող, կտրող զենք, օրինակ՝ գայլիկոններ, սպասքի դանակներ, սղոցներ, պտուտակահաններ, լինգեր, մուրճեր, հարթաշուրթեր, խցանահանիչներ,

թ) ենթամաշկային ներարկման ասեղներ,

ժ) գործելու շյուղեր:

Բութ գործիքներ՝ ա) բեյսբոլի մականներ,

բ) գոլֆի թիեր, հոկկեյի թիեր,

գ) նավակի թիեր,

դ) բիլյարդի կիեր,

ե) ձկնորսության կարթեր,

զ) մահակներ:

Պայթուցիկ և դյուրավառ նյութեր․ ա) զինամթերք,

բ) պայթուցիկ նյութեր,

գ) պայթուցիկ սարքեր,

դ) պայթուցիկ նյութերի կամ պայթուցիկ սարքերի կրկնօրինակներ կամ նմանակումներ,

ե) արկեր և այլ պայթուցիկ ռազմամթերք, բոլոր տիպի նռնակներ,

զ) գազեր և գազային կոնտեյներներ, օրինակ՝ բուտան, պրոպան, ացետիլեն, թթվածին,

է) հրավառության նյութեր,

ը) ինքնահրկիզվող լուցկիներ,

թ) հրավառ հեղուկ վառելիք, օրինակ՝ բենզին, դիզելային վառելիք, կրակայրիչ լիցքավորող հեղուկ, սպիրտ, էթանոլ, այլ սպիրտ պարունակող տեխնիկական հեղուկներ, ժ) աէրոզոլային ներկեր. սկիպիդար և ներկեր,

ժա) ալկոհոլային հեղուկներ:

Քիմիական և թունավոր նյութեր՝ ա) թթուներ և հիմքեր,

բ) կոռոզիոն և սպիտակեցնող նյութեր, օրինակ՝ սնդիկ, քլոր,

գ) •ազային բալոններ, որոնք նախատեսված են մարդկանց վնասազերծելու համար, օրինակ՝ արցունքաբեր գազ,

դ) ռադիոակտիվ նյութ, օրինակ՝ բժշկական կամ կոմերցիոն իզոտոպներ,

ե) թույներ, ինֆեկցիոն կամ կենսաբանական վտանգավոր նյութեր, օրինակ՝ բակտերիաներ և վիրուսներ,

զ) ինքնահրկիզվող նյութեր,

է) կրակմարիչներ:

Ցանկացած տեսակի թմրանյութեր և թմրադեղեր:

Ցանկացած տեսակի կենդանիներ․ ձկներ, սողուններ, միջատներ և թռչուններ:

Փակ տուփեր, արկղեր, փաթեթներ և պայուսակներ, բացառությամբ անձնական օգտագործման համար նախատեսված թղթապանակների, պայուսակների և այլն:

Եթե պահպանվող տարածք մուտք գործող անձանց և նրանց իրերի զննության ժամանակ հայտնաբերվում են հիշյալ կարգում չնշված այնպիսի իրեր կամ առարկաներ, որոնք կարող են մարդու կյանքինկամ առողջությանը վնաս հասցնելու միջոց հանդիսանալ, կարգադրիչի կողմից վերցվում են, որի մասին կազմվում է արձանագրություն, իսկ այն իրերը կամ առարկաները, որոնք կարող են առերևույթ հանցագործության առարկա հանդիսանալ, կարգադրիչի կողմից վերցվելուց հետո հանձնվում են համապատասխան իրավասու մարմիններին, որի մասին ևս կազմվում է արձանագրություն:

Նշենք, որ 183 փաստաբաններ ապօրինի զննությունների, խուզարկությունների դեմ բողոքի ակցիա են կազմակերպել՝ գործադուլ, որը մեկնարկելու է վաղվանից։

Մեկնաբանություն
X