Արգամ Աբրահամյանն այցելել է Ալիկ Սերգեյիչին

Վաղը ՀՀԿ Արտաշատի կառույցում նիստ կգումարվի, եւ կորոշեն, թե նոյեմբերին Արտաշատ քաղաքում կայանալիք ընտրություններին ում թեկնածությունն է ներկայացվում ՀՀԿ-ում։ Չնայած օրերս ՀՀԿ-ում արդեն որոշել են թեկնածուին, նիստի ժամանակ պարզապես կներկայացվի շարքերին։ Թեկնածուն երիտասարդ Կարեն Բենիամինյանն է՝ մոտ 35-40 տարեկան, Արարատի ՀՀԿ երիտթեւի ղեկավարը։ Կարենի հայրը ՀՀԿ շրջանային կառույցի ղեկավարն է, իսկ ամենակարեւորը՝ թեկնածուն Գազի Հովոյի սանիկն է, «Էյ-Ի-Ջի» գազի ներտնային սպասարկման ծառայության մարզային պատասխանատուն։

Հիշեցնենք, որ Արտաշատի քաղաքապետի պաշտոնը թափուր մնաց այն բանից հետո, երբ Հովիկ Աբրահամյանի քաղաքապետ որդին՝ Արգամ Աբրահամյանը, աներոջ՝ Գագիկ Ծառուկյանի նախընտրական դաշինքի ռեյտինգային ցուցակով դարձավ ԱԺ պատգամավոր:

Ի սկզբանե Աբրահամյանները տրամադրված էին կենաց-մահու պայքարի արդյունքում Արտաշատը պահել ու չհանձնել իշխանությանը, վերջինն էլ քաղաքական գրոհ ձեռնարկեց մարզում Աբրահամյանի կողմնակիցների դեմ՝ դպրոցի տնօրեններ, քաղաքապետարանի եւ մարզպետարանի աշխատակիցներ ազատվեցին աշխատանքից եւ այլն։ Արգամ Աբրահամյանը նախկինում մի առիթով հայտարարել էր, թե հայրն ազգուտակի շրջանում ասել է, որ Արտաշատի քաղաքապետի պաշտոնի համար թեկնածու առաջադրելու որոշում են կայացրել, իսկ թե ում, դեռ չի հստակեցրել: Թեպետ ամենահավանական թեկնածուն Գագիկ Պողոսյանն էր՝ Արգամի տեղակալը քաղաքապետության շրջանում, որն այժմ էլ շարունակում է քաղաքապետարանում իր աշխատանքը։ Արգամ Աբրահամյանը նաեւ ֆեյսբուքյան լուսանկարներ հրապարակեց Արտաշատի բակերում կատարած ասֆալտապատումից՝ ասելով, թե, չնայած քաղաքապետի պաշտոնը թողել է, բայց միշտ լինելու է արտաշատցիների կողքին: Սակայն վերջին շրջանում Հովիկ Աբրահամյանի եւ Սերժ Սարգսյանի հարաբերությունների կարգավորման լուրերին զուգահեռ, Արտաշատում Աբրահամյանների պասիվությունն էլ է ակնհայտ դարձել։ Հովիկ Աբրահամյանի շրջապատից տեղեկացնում էին, որ նախկին վարչապետը երկու քարի արանքում է, ներիշխանական վերադասավորումների փուլում չի ցանկանում ծանրացնել նժարի եւ ոչ մի կողմը։ Քանի դեռ չեն լուծվել Սերժ Սարգսյան, թե Կարեն Կարապետյան դիլեման եւ 2018-ին վարչապետի հարցը, Հովիկ Աբրահամյանը չի ցանկանում ռիսկի գնալ, քանի որ քաղաքական հավակնություններ ունի եւ ցանկանում է ապագայում գոնե փոխվարչապետի պաշտոն զբաղեցնել՝ լինի դա Սերժ Սարգսյանի, թե Կարեն Կարապետյանի վարչապետության դեպքում։ Ավելին՝ տեղեկություններ կան, որ Աբրահամյանները մինչեւ անգամ պատրաստ են աջակցություն հայտնել այն թեկնածուին, որին կընտրի ՀՀԿ-ն, բայց որը նաեւ իրենց համար ընդունելի թեկնածու կլինի։ Սակայն այս պարագայում ստացվում է, որ ՀՀԿ-ի ընտրությունը կայացել է, եւ ընտրվել է մեկը, որն Աբրահամյանների վաղեմի հակառակորդ Գազի Հովոյի սանիկն է։ Երեկ Արգամիչի շրջապատից մեզ վստահեցնում էին, որ եթե ՀՀԿ-ի ընտրությունը կանգնի Կարեն Բենիամինյանի վրա, ապա, ամենայն հավանականությամբ, Աբրահամյանները թեկնածու կառաջադրեն։ Ուշագրավ է, որ երեկ խորհրդարանում Արգամ Աբրահամյանն այցելել է Ալիկ Սարգսյանին եւ քննարկել թեկնածուի հարցը․ Ալիկ Սերգեյիչն է ՀՀԿ-ից նշանակվել Արտաշատում ընտրությունների պատասխանատու։

Ալիկ Սարգսյանից փորձեցինք ճշտել Արգամի հետ զրույցի բովանդակությունը։ «Մեր խոսակցությունը տեւել է երկու րոպե, այո՝ քննարկել ենք Արտաշատի քաղաքապետի թեկնածուի հարցը։ Ինքը հարցրեց՝ ճի՞շտ ա, որ Բենիամինյան Կարենին եք որոշել, ասացի՝ հա, հարցրեցի իր կարծիքը, ասեց՝ պրինցիպի՝ նորմալ է։ Ուրիշ թեմա՝ իրանք դնելու, են թեկնածու, չեն դնելու եւ, առհասարակ, ոչ մի այլ հարց չի քննարկվել»,- ասաց Սարգսյանը։ Միեւնույն ժամանակ հավելեց, թե երկու թեկնածու կա, վաղը տարածքային խորհրդի նիստում կորոշեն, թե ում են վերջնական ընտրում։ Թե ով է երկրորդ թեկնածուն, չասաց, ճշտմանը՝ առավել հավանական է Բենիամինյանի՞ թեկնածությունը, Սարգսյանը դրական պատասխան տվեց։ Հետաքրքիր է, թե ինչ որոշում կկայացնեն Աբրահամյանները։

Լուսինե ՇԱՀՎԵՐԴՅԱՆ

Մեկնաբանություն
X