Դրական միտում կլինի, երբ վիճակագրությունը ցույց տա արտագաղթի կանգը

Ուկրաինայում գործող «Հայկական նախաձեռնություն» բարեգործական հիմնադրամի հիմնադիր եւ գործադիր տնօրեն, Ուկրաինայի հայ համայնքի ներկայացուցիչ Հայկ Աղվանյանը Հայաստան-Սփյուռք 6-րդ համաժողովին ներկայացել եւ մասնակցել է Սփյուռքի նախարար Հրանուշ Հակոբյանի հրավերով։

Հիմնադրամը գործում է գրեթե մեկ տարի եւ նրա հիմնական նպատակը, ըստ Հայկ Աղվանյանի, ոչ միայն հայերի համախմբումն է հայապահպան գործունեության համար, այլեւ բարի կամքի մարդկանց ներգրավվելը։

«Հիմնադրամի անդամներ են ուկրաինացիները, ռուսները, լեհերը, հունգարացիները։ Իրենք հստակ գործի ջատագով են, իրականացնում են փոքր նախագծեր։ Մեր նպատակն է համախմբել Ուկրաինայում ապրող այն հայերին, որոնք հասարակական կյանքից դուրս են։ Նրանք հիմնականում Ուկրաինայում ծնված հայերն են, որոնցից շատերը հայերեն չգիտեն։ Մենք համախմբում ենք բիզնեսմեններին, ակտիվ հայերին երկու նպատակների շուրջ։ Առաջին նպատակն այն է, որ նրանք օգտվեն հայկական կազմակերպություններից, երկրորդն այն է, որ օգնենք երիտասարդներին բիզնես սկսելու, հասարակական գործունեություն ծավալելու հարցում։ Երրորդն նպատակն էլ հայերի հետ սերտ հարաբերություններ ունեցող ազգերի ներկայացուցիչներին՝ հույներին, բուլղարացիներին, եզդիներին համախմբել մեր ֆոնդի շուրջ։ Մենք ուզում ենք կամուրջ դառնալ Հայաստանում եւ Սփյուռքում գտնվող բարերարների միջեւ, որպեսզի սփյուռքահայ գործարարներն օգնեն Հայաստանին, գումարներ ներդրում անեն Հայաստանում։ Մենք բարեգործական ֆոնդ ենք եւ իրավունք չունենք զբաղվելու բիզնեսով, բայց պետք է աջակցենք հայկական բիզնեսին։ Կան շատ գործարարներ, որոնք Հայաստանը լքել են փոքր տարիքում եւ չեն պահպանել հայրենիքի հետ կապերը։ Մենք ուզում ենք հաստատել կապերը։ Ես այստեղ գտնվելով՝ ուզում եմ ծանոթանալ Հայաստանի պետական համակարգի աշխատակիցների հետ, որպեսզի նրանք մեր օգնությամբ համագործակցեն»,- ասաց Հայկ Աղվանյանը։

Հարցին, թե որքանով էր համաժողովն արդյունավետ, Հայկ Աղվանյանն ասաց․ «Առաջին հերթին մենք երկրի նախագահից լսեցինք, որ պետք է վերադարձ, ներգաղթ լինի Հայաստան։ Որքան հասկացա՝ երկրի նախագահը պլան ունի մինչեւ 2040թ․ ՀՀ-ի բնակչությունը հասցնի 4 միլիոնի եւ մեխանիզմներ պետք է ստեղծի հայերի վերադարձի համար»։ Մեր զրուցակցի կարծիքով՝ այս փուլում դա բարդ խնդիր է, բայց եթե երկրում ստեղծվի վստահության մթնոլորտ, ապա հնարավոր է։

Հայկ Աղվանյանը վկայակոչում է, որ վարչապետ Կարեն Կարապետյանը ստեղծել է Հայաստանի զարգացման ֆոնդ, որի նպատակներից մեկն էլ բիզնեսմեններին աջակցելն է Հայաստանի տարածքում։

«Մեր բարեգործական ֆոնդը ստեղծել է կայք՝ Հայկական նախաձեռնության ֆոնդ, որը նպատակ է դրել դառնալու թիվ 1 տեղեկատվական ռեսուրսը Ուկրաինայի սփյուռքում։ Մենք այդ ամենը հանրայնացնելու ենք, որպեսզի մարդիկ ստանան անհրաժեշտ տեղեկատվությունը»,- ասաց մեր զրուցակիցը։

Ամփոփելով Հայաստան-Սփյուռք համաժողովից ստացած իր տպավորությունները՝ Հայկ Աղվանյանը նշում է, որ Հայաստանի վիճակն իրենք դրական կգնահատեն, եթե վիճակագրությունը ցույց տա արտագաղթի կանգը, եւ լինի ներգաղթ։
«Քանի կա արտագաղթ, դա բացասական միտում է։ Մենք սպասում ենք ներգաղթի մասին վիճակագրության»,- ասաց Հայկ Աղվանյանը։

Թագուհի Հակոբյան

Մեկնաբանություն
X