Մարդիկ առավոտյան ժամը 4-ին, 5-ին գալիս հերթագրվում են, որ դեղ ստանան․ բողոքում են թոշակառուները

Թելման Ներսիսյանն ու Գավրուշ Մնացականյանը թոշակառուներ են, օգտվում են Երեւանի թիվ 6 պոլիկլինիկայից, որը գտնվում է Երեւանի Հանրապետական հիվանդանոցի բակում։ «Ամիսը մեկ անգամ, ամսի տասին, մենք պոլիկլինիկայից անվճար դեղեր ենք ձեռք բերում։ Եթե այդ օրը հաջողվում է ձեռք բերել դեղերը, ուրեմն ստանում ենք, եթե չի հաջողվում, ապա այդ դեղերը չեն տալիս։ Դրա համար էլ հիվանդները, առավոտյան ժամը 4-ին, 5-ին, լուսադեմին, գալիս են, հերթագրվում, որ ստանան դեղերը։ Հատկապես դժվար է ձմռանը, երբ սառույցի վրա ընկնելով, թափառական շներից մի կերպ խուսափելով, հալածվելով գալիս են պոլիկլինիկա։ Այդ ճանապարհն անցնում է Մարզահամերգային համալիրից մինչեւ Ֆիզիկայի ինստիտուտ, Լենինգրադյան փողոցից մինչեւ 16-րդ թաղամաս։ Այդ տարածքի հաշմանդամություն ունեցող անձինք գալիս են, հերթագրվում, վեց ժամ է տեւում մինչեւ ստանում ենք այդ դեղը։ Հիմա պատկերացրեք, թե այդ հերթերում ինչքան վեճեր են առաջանում, մեկը կարող է ուշաթափվել, մյուսի հետ կարող է մեկ այլ բան պատահել։ Լինում է, որ մեկը գալիս է, մի երեք հոգու անուն միանգամից գրում է, դու գնում ես, տեսնում, որ ցուցակում հինգերորդն ես, երբ ավելի շուտ էիր հերթագրվել։ Հետո էլ ասում են, թե դեղերը վերջացել են, դեղ չկա։ Ժամանակին այդ պոլիկլինիկայում երեխաների մուտքն առանձին էր, հիմա նույն մուտքն է, նույն միջանցքը։ Հիմա, օրինակ, մեկը թոքերի հիվանդություն ունի, հազում, փռշտում է։ Մանկահասակ երեխան շնչում է նույն օդը, ինչ թոքերով հիվանդը, ո՞վ է տեսել այդպիսի բան»,- պատմում էին խմբագրություն այցելած քաղաքացիները։

«Արմենիա» բժշկական կենտրոնի պոլիկլինիկայի վարիչը նախ ասաց, որ 10 տարուց ավելի է, ինչ չկա թիվ 6 պոլիկլինիկա, այն այժմ կոչվում է «Արմենիա» բժշկական կենտրոնի պոլիկլինիկա։ Նա հրաժարվեց ասել իր անուն-ազգանունը, առհասարակ հեռախոսով մանրամասն պատասխանել մեր հարցերին։ Պատճառաբանությունը հետեւյալն էր՝ հեռախոսով նման օֆիցիալ զրույցներ ինքը չի ունենում։
«Ինչ որ բժիշկը նշանակում է, այդ բոլոր դեղերն էլ ստանում ենք, հասնում է իրենց»,- ասաց նա։

Առողջապահության նախարարության դեղերի եւ բժշկական տեխնոլոգիաների վարչության պետ Վարդուհի Գրիգորյանն էլ մեզ հետ զրույցում ասաց, որ կենտրոնացված դեղորայքը ձեռք է բերում նախարարությունը եւ դրանցով ապահովում բոլոր բժշկական կենտրոններում հաշվառված դիսպանսեր հիվանդներին։ Մյուս տարբերակն այն է, որ պետությունը առաջնային օղակին տալիս է գումար, իրենք էլ հիմնական դեղերի ցանկից կատարում են գնումներ։

Վարդուհի Գրիգորյանը մեզնից վերցրեց Թելման Ներսիսյանի եւ Գավրուշ Մնացականյանի հեռախոսահամարները, նաեւ խոստացավ կապ հաստատել «Արմենիա» բժշկական կենտրոնի պոլիկլինիկայի վարիչի հետ։ Ավելի ուշ նա մեզ տեղեկացրեց, որ «Արմենիա» բժշկական կենտրոնի տնօրինությունը խոստացել է պարտադիր լուծել այդ հարցը, որպեսզի թոշակառուները ստիպված չլինեն դեղ ստանալիս ժամերով հերթ կանգնել։

Թագուհի Հակոբյան

Մեկնաբանություն
X