Ո՞ր «Մանչեսթերը»

Անգլիայի Պրեմիեր լիգայի 7-րդ տուրում Ժոզե Մոուրինյոյի սաները սեփական խաղադաշտում հյուրընկալել էին Քրիստալ Փելեսին: Ռոյ Հոջսոնի արծիվները վատագույն ցուցանիշով եզրափակում են մրցաշարային աղյուսակը՝ մեկը մյուսի հետեւից պարտություններ կրելով: Այս անգամ եւս Օլդ Թրաֆորդում նրանց դառը ճակատագիր էր սպասվում:

Մանկունյանցիները, կարելի է ասել, չհանդիպեցին լուրջ դիմադրության․ ունենալով խաղային մեծ առավելություն՝ արդեն, ավանդույթի համաձայն, խփեցին իրենց հանապազօրյա չորս գնդակը՝ անառիկ պահելով սեփական դարպասը: Գոլերի հեղինակ դարձան․ 3-րդ րոպեին՝ Խուան Մատան, 35-րդ րոպեին՝ Մարուան Ֆելաինին, 49-րդ րոպեին Ֆելաինին իր հաշվին դուբլ գրանցեց, եւ 86-րդ րոպեին՝ «Յունայթեդի» գլխավոր ռմբարկու Ռոմելու Լուկակուն: Այս հաղթանակից հետո «Յունայթեդը» վաստակեց 19 միավոր եւ Մանչեսթեր քաղաքը ներկայացնող մեկ այլ թիմի՝ «Սիթիի» հետ գլխավորեց մրցաշարային աղյուսակը:

Ահա 7 տուր, եւ հստակորեն ընդգծվեցին Պրեմիեր լիգայի այս մրցաշրջանի երկու գլխավոր առաջատարները:

Ներկա պահին տպավորությունն այնպիսին է, որ այս տարի չեմպիոնության համար պայքարելու են հենց Մանչեսթեր քաղաքի երկու հանրահռչակ ակումբները՝«Յունայթեդը» եւ «Սիթին»: Երկու թիմերի համար էլ, միանշանակ, սա կենաց-մահու պայքար է լինելու: «Յունայթեդը» եւ «Սիթին» սկզբունքային, ինչու չէ՝ նաեւ մոլեգին հակառակորդներ են, ուստի յուրաքանչյուրն իր հերթին կանի ամեն ինչ, որպեսզի թույլ չտա հակառակորդին հաջողության հասնել: Պեպ Գվարդիոլայի թիմը ֆանտաստիկ մարզավիճակում է եւ մի փոքր հիշեցնում է նախորդ մրցաշրջանի չեմպիոն «Չելսիին»:

7-րդ տուրում «Սթեմֆորդ Բրիջ» մարզադաշտում Անտոնիո Կոնտեի սաները, հյուրընկալելով «Սիթիին», պարտվեցին 0։1 հաշվով, միակ գոլի հեղինակ դարձավ Քեւին դե Բրույնեն:

Երբ 2006 թվականին Պեպ Գվարդիոլան եկավ Անգլիա եւ գլխավորեց «Մանչեսթեր սիթի» ակումբը՝ կառուցելով, նաեւ պարտադրելով իր խաղը, խաղային իր մասնահատուկ հարձակվողական փիլիսոփայությունը, շատերը վերապահումներով մոտեցան՝ ասելով, թե Պրեմիեր լիգայում նմանօրինակ մոտեցումն ուղղակի ձախողման է դատապարտված, եւ Գվարդիոլան կտապալվի: Այնուհանդերձ, աշխարհի լավագույն մարզիչներից մեկը հակառակն է ապացուցում, «Սիթին» գրոհում է, գոլեր խփում, քաղաքայինները, թերեւս, այս մրցաշրջանում ամենագեղեցիկ հարձակվողական ֆուտբոլն են ցուցադրում, ինչն էլ աչք է շոյում, անչափ դուր է գալիս առհասարակ գեղեցիկ, գոլառատ ֆուտբոլի համայն աշխարհի երկրպագուներին:

Այս մրցաշրջանում Ժոզե Մոուրինյոյի «Մանչեսթեր Յունայթեդը» կարծես վերագտավ իր ամբողջական խաղը, Մխիթարյանը վերջնականապես հաստատվեց հիմնական կազմում, գտավ իր համար առավելապես լավագույն դիրքը: Թիմի նորեկ, գլխավոր ռմբարկու Ռոմելու Լուկակուն խաղից խաղ արդարացրեց հույսերը, սերբ Նեմանյա Մատիչն էլ ավելի ամրակուռ դարձրեց կենտրոնը: Հետաքրքիր է, որ անգամ Պոլ Պոգբայի վնասվածքն ու բացակայությունը ոչ մի կերպ բացասաբար չանդրադարձավ «Յունայթեդի» խաղի վրա, ընդհակառակը՝ այժմ Կարմիր սատանաները գործում են առանց ավելորդ հապաղումների, գրոհների անհարկի ու չարդարացված կասեցումների:

Այսպիսով, այս գերլարված, երկրպագուների համար խիստ հաճելի մրցապայքարում ո՞ր «Մանչեսթերը» հաղթանակած դուրս կգա՝ «Սիթի՞ն», թե՞ «Յունայթեդը»: Իսկապես դժվար է հավաստի կանխատեսումներ անել, երկու թիմերն էլ այսպիսի խաղով արժանի են չեմպիոնության: Սակայն, իհարկե, մենք շատ կուզեինք, որ Հայաստանի ֆուտբոլի ազգային հավաքականի ավագ Հենրիխ Մխիթարյանն ի վերջո դառնար Պրեմիեր լիգայի չեմպիոն, ինչն էլ մաղթում ենք նրան:

Զավեն ՄԽԻԹԱՐՅԱՆ

Մեկնաբանություն
X