Գյումրեցին, որ այսօր մտնի իմ շտաբ ու գումար ուզի… պատգամավորի թեկնածու Եղիշե Շարյան

Ավարտին է մոտենում խորհրդարանական ընտրությունների քարոզարշավի երկրորդ շաբաթը: Քաղաքական ուժերից յուրաքանչյուրը, ընտրելով քարոզչական գործունեության իր ձևաչափը, լծված է գործընթացին:

Հանրապետության երկրորդ քաղաքում նախընտրական եռուզեռ նկատվեց այս շաբաթվա սկզբից, երբ Գյումրիի փողոցներում վերջապես հայտնվեցին գովազդային վահանակներն ու թեկնածուների պաստառները, որին էլ հաջորդեց Գագիկ Ծառուկյանի այցը: Թեպետ նշենք, որ տարածքային վարկանիշային թեկնածուներից մի քանիսը մինչ այդ էլ ակտիվ քարոզչություն իրականացնում էին՝ հանդիպում ունենալով համայնքների բնակիչների հետ: Նրանցից շատերը, սակայն, սահմանափակվում են տեղական ԶԼՄ-ներով հանդես գալով: Այս օրերին հատկապես ակտիվ են ՀՀԿ ցուցակով առաջադրված թեկնածուներ Մարտուն Գրիգորյանն ու Ֆելիքս Ցոլակյանը:

Գյումրեցիները ևս մի քանի ակտիվ թեկնածուների են նշում, այդ թվում ՕՐՕ դաշինքով առաջադրված, Ժառանգություն կուսակցության անդամ Եղիշե Շարյանին: Նա քարոզարշավի մեկնարկն ազդարարել է մարտի 6-ից եւ, ինչպես մեզ հետ զրույցում նշեց, այն ավարտելու է վերջին օրը: Այն, որ Գյումրին այս ընտրությանը անսովոր պասիվ է, թեկնածուն մեզ հետ համաձայնեց: Գյումրեցիների նման պասիվությունը ընտրությունների նկատմամբ մտահոգում է նաև Եղիշե Շարյանին.

-Ոչ թե պասիվ, շատ պասիվ է: Գյումրեցին, որ այսօր մտնի իմ շտաբ ու գումար ուզի, պատկերացրեք, թե ուր է հասել:

-Ինչո՞վ է պայմանավորված այսօր գյումրեցու անտարբերությունը:

-Ասեմ՝ ինչու է այսպես: 2008թ-ին Լևոն Տեր-Պետրոսյանի ձախողվեց, 2013թ-ին մարդիկ ընտրել էին Րաֆֆի Հովհաննիսյանին, որի հետ հույսեր էին կապում, մտածում էին պիտի Սասունցի Դավիթը գար ու Մըսրա Մելիքին ոչնչացներ: Խոսքը՝ Ժառանգության առաջնորդի եւ նախագահի մասին է:Դա էլ չեղավ: Մեր ժողովուրդը Սասունցի Դավթի սպասում ունի,բայց չկա: Վերջին թևաթափ անողը եղավ Գագիկ Ծառուկյանը, երբ 2015թ-ին փողոցները լցրեց ու անակնալ ասաց՝ կներեք արյունահեղության չեմ տանելու, թողեց, գնաց: Մի խոսքով Գյումրեցու անտարբերության պատճառը 2008, 2013, 2015 թվականներն են:

-Շիրակի մարզի վարկանիշային թեկնածուներից ովքե՞****ր են այսօր մրցակցության մեջ:

-Շատ ակտիվ է Մարտուն Գրիգորյանը, քարոզարշավի առաջին օրվանից փայլուն աշխատում է, հաջորդը Ֆելիքս Ցոլակյանն է: Այս երկու հանրապետականները ակտիվ են շատ:Իսկ ավելի կոնկրետ՝ արդյունքը կտեսնենք ապրիլի 3-ին: Ես վստահ չեմ, որ իմ ուզած թիվն եմ ստանալու ապրիլի 3-ին:

-Ինչո՞ւ եք կասկածում;

-Ժողովրդի մեծ մասը դեռևս անիրազեկ է: Շատերը քվեարկելու ձև չգիտեն, շատերն էլ վախենում են: Հիմա ասում են՝ ծրարը ծալվեց-դրվեց, հանկարծ փող տվողը չտեսնի, որ ինձ է քվեարկել եւ այսպիսի մի շարք հարցեր կան, որոնք անդրադառնալու են ընտրության արդյունքների վրա:

-Ինչպե՞ս կմեկնաբանեք Ժառանգություն կուսակցության ամենավառ ներկայացուցիչներից մեկի՝ Զարուհի Փոստանջյանի կուսակցությունը լքելու եւ նոր կուսակցություն հիմնելու փաստը: Ձեզ համար որևէ բան փոխվեց, թե ոչ:

-Զարուհի Փոստանջյանը իմ լավ ընկերն է եւ այն մարդը, որը երբեք քաղաքականությունը չէր թողնի: Նա կուսակցության լիդերներից էր եւ իր խոսքի ծանրակշիռ լինելը ապացուցեց: Հենց սկզբից ասում էր, եթե դաշինքով գնացիք ընտրության, ես չեմ գա:Ասում էր՝ մեզ հետ համատեղվող ուժ ես չեմ տեսնում: Ժառանգության 50 անդամից ավել խորհրդի կազմը որոշեց գնալ դաշինքով, ինքն էլ իր ընտրությունն արեց՝ մտածելով, որ այլևս առանձին Ժառանգություն եւ Զարուհի Փոստանջյան չկա, լքեց կուսակցությունը, ստեղծեց իր քաղաքական միավորը: Իմ դեպքում ամեն ինչ այլ է: Ես կուսակցության շարքային անդամ եմ, երիտմիության նախագահ, ես բարոյական իրավունք էլ չունեի այս պահի դրությամբ կուսակցությունից դուրս գալու:

-Հաց բերողի՝ Արթուր Սարգսյանի մահը պատճառ դարձավ նոր բողոքի ակցիաների, երթերի, նույնիսկ Ծառուկյան դաշինքը մեկ օրով դադարեցրեց քարոզարշավը, իսկ նախորդ օրը ՕՐՕ դաշինքի հետ կապված ԶԼՄ-ներում քննարկվեց, թե նրանց հանդիպումների ընթացքում դհոլ-զուռնա էր հնչել:

-Ծառուկյան դաշինքը ընդամենը մահվան օրը դադարեցրեց, իսկ առաջին արձագանքողը ՕՐՕ-ն է եղել:Դհոլ-զուռնայի հետ կապված նույնիսկ կասկածներ ունեմ, որ դա որոշ մարդկանց գործն էր, հատուկ էին ուղարկել: Մենք մեկ օր ամբողջությամբ չիրականացրեցինք ոչ մի քարոզարշավ, իմ շտաբների դռները այդ օրը փակված են եղել: Ես՝ որպես մտահոգ քաղաքացի այդ խնդիրով, եղել եմ Թատերական հրապարակում, որտեղ հավաքվածներով մի քանի հարց ենք մշակել: Հանրային քննարկման արդյունքում Արթուր Սարգսյանի մահվան եւ հուղարկավորության հետ կապված երեք հարց ենք մշակել, որը երկուշաբթի հասցեատերերին կփորձենք հասցնել:

-Որո՞նք են այդ հարցերը:

-Նախ, որ նա որպես ազատամարտիկ պետք է հուղարկավորվի Եռաբլուրում՝ իր ընկերների կողքին: Երկրորդ կարևորագույն պահանջը արդար դատաքննություն իրականացնելն է: Նրա մահվան համար բոլոր մեղադրվողները պետք է պատժվեն:Լինի դա արդարատության նախարարը, թե Հանրապետության նախագահը:Եւ երրորդ՝ այսօր Արթուրի նման շատ հիվանդ դատապարտյալներ կան, որոնք գտնվում են պատժախցերում, որը հիվանդության հետ անհամատեղելի է:Այդ մարդկանց անուն-ազգանունները պետք է ճշտվի եւ ազատ արձակվեն:

Արևիկ ՀԱԿՈԲՅԱՆ

Մեկնաբանություն
X