Ոմանք կողմ են ընտրությունների օրը փոխելուն, ոմանք էլ այն համարում են ոչ արդիական հարց

Կոնգրես-ՀԺԿ դաշինքը մարտի 19-ին տարածել էր հայտարարություն՝ կոչ անելով ընտրություններին մասնակից դաշինքներին եւ կուսակցություններին համաձայնության գալ եւ առաջարկել իշխանությանը ԱԺ ընտրությունները ապրիլի 2-ից տեղափոխել ապրիլի 9-ը։

Կոնգրես-ՀԺԿ-ն հիշեցրել էր, ավելի վաղ՝ հունվարի 21-ին, տարածած իր հայտարարությունը Ազգային ժողովի ընտրությունների օրը ապրիլի 2-ից տեղափոխելու եւ ապրիլի 21-30-ի միջակայքում նշանակելու անհրաժեշտության մասին՝ նկատի ունենալով երկու հանգամանք. իրավական՝ դրա հակասահմանադրականությունը եւ բարոյական՝ ապրիլյան պատերազմի զոհերի հիշատակի օրվա հետ դրա համընկնումը։

«Քանի որ դա տեղի չունեցավ, Կոնգրեսի խորհրդարանական խմբակցությունը Ազգային ժողովում ստորագրահավաք կազմակերպեց այս հարցով Սահմանադրական դատարան դիմելու համար, սակայն, ցավոք, հնարավոր չեղավ հավաքել պատգամավորների՝ անհրաժեշտ թվով ստորագրություններ։ Մյուս կողմից, սակայն, իշխանությունը հնարավոր համարեց ընտրությունները «մի քանի օրով» տեղաշարժելը, եթե այդ հարցում լինի մասնակից քաղաքական ուժերի համաձայնությունը։

Ապրիլյան պատերազմի զոհերի հիշատակի առաջին տարելիցը միայն նրանց հարազատներին ու մտերիմներին չի վերաբերում։ Ինչպես մեկ տարի առաջ, դրա արժեւորումն ու վերաբերմունքը համազգային ընդգրկում է ունենալու։ Այդ օրը բոլորս ենք մասնակցելու զոհերի հիշատակի հարգման արարողություններին, ուստիեւ նույն օրը համապետական ընտրությունների անցկացումը, մեղմ ասած, անպատեհ է»,- նշված է Կոնգրես-ՀԺԿ հայտարարության մեջ։

Մենք փորձեցինք ԱԺ ընտրություններին մասնակցող մի քանի քաղաքական ուժերից, որոնց հետ հաջողվեց կապ հաստատել, պարզել, թե ինչպես են արձագանքում Կոնգրես-ՀԺԿ-ի հայտարարությանը։

«Ելք» դաշինքը ներկայացնող «Հանրապետություն» կուսակցության քաղխորհրդի անդամ, իրավապաշտպան Արտակ Զեյնալյանը մեզ հետ զրույցում նշեց, որ դեռ պետք է քննարկեն, նոր կարծիք հայտնեն։

«Ինքնին օրը փոխելը պրոբլեմատիկ է, տեխնիկապես խնդրահարույց։ Մարդիկ տարածել են քարոզչական նյութեր։ Այդ օրը նշանակելը հակասահմանադրական է, բայց մենք չկարողացանք դիմել Սահմանադրական դատարան»,- արձագանքեց Արտակ Զեյնալյանը։

«Օհանյան-Րաֆֆի-Օսկանյան» դաշինքից ԱԺ պատգամավոր Էլինար Վարդանյանը ժամանակին հայտարարել էր, որ ապրիլի 2-ին ԱԺ ընտրությունների օր նշանակելը հակասահմանադրական է։

Ինչ վերաբերում է Կոնգրես-ՀԺԿ դաշինքի հայտարարությանը, ապա Էլինար Վարդանյանը կարծում է, որ այն առաջարկ է, որը պետք է քննարկել։ Նա տեղեկացրեց, որ դաշինքն այդ հարցը կքննարկի եւ կտեղեկացնի այդ մասին։

«Ազատ դեմոկրատներ» կուսակցության փոխնախագահ Անժելա Խաչատրյանն էլ հիշեցնում է, որ ընտրությունների օրը տեղափոխելու համար ԱԺ -ում կազմակերպվել էր ստորագրահավաք, որի տակ ստորագրել էր կուսակցության նախագահ Խաչատուր Քոքոբելյանը։

«Այժմ էլ որեւէ խնդիր չենք տեսնում։ Եթե օրենքը թույլ է տալիս, ապա ԱԺ ընտրությունների օրը կարող է հետաձգվել»,- ասաց Անժելա Խաչատրյանը։
«Ծառուկյան» դաշինքի անդամ, տնտեսագետ Վարդան Բոստանջյանը չի ողջունում այդ հայտարարությունը։ Նա կարծում է, որ այդ թեման այսօր արդիական եւ հրատապ չէ։
«Մեկ անգամ այդ հարցը արծարծվել է, հետո ԿԸՀ-ն նպատակահարմար չգտավ օրը փոխել, եւ մեկ անգամ այդ հարցն արծարծելը նոր բան չի հետապնդում»,- ասաց Վարդան Բոստանջյանը։

ԱԺ ՀՅԴ-ական պատգամավոր Աղվան Վարդանյանի արձագանքը լակոնիկ էր․ «Մենք ՀԱԿ-ի առաջարկին չենք արձագանքում, ընտրություններին մնացել է տասն օր, կա ժամանակացույց»։

ՀՀԿ կազմակերպչական խորհրդի նախագահ Ռուբեն Թադեւոսյանն էլ հարց ուղղեց․ «Ինչքանո՞վ է տրամաբանական այդ հարցը հիմա նորից քննարկելը, արդյոք դրա մեջ այլ ելեւէջներ չկա՞ն»։ Երբ նկատեցինք, որ ավելի վաղ էլ են այդ հարցն արծարծել, մեր զրուցակիցը հիշեցրեց, որ այն ժամանակ եղել է երկրի նախագահի հայտարարությունը, սակայն քաղաքական ուժերը ընդհանուր մոտեցում չունեցան։

Մեկնաբանություն
X