Նախկին նախարարն ու փոխնախարարը մրցույթն իրենցով են արել

Օրերս «Հրապարակ»-ը անդրադարձել էր մշակույթի նախարարության կողմից վերջին ամիսներին մի քանի ընկերությունների հետ կնքած պայմանագրերին, ըստ որոնց՝ նախարարությունը մոտ 23 մլն ՀՀ դրամ արժողությամբ խոշոր գործարքներ էր կնքել՝ գիրք ձեռք բերելու նպատակով, որից մոտ 8 մլն միայն «ԱՌԵԴԻՏ» ՍՊԸ-ի հետ։ Ընկերության անունը մամուլին հայտնի է, քանի որ վերջինիս հետ մշակույթի նախարարությունը պարբերաբար խոշոր գործարքներ է կնքել տարբեր տարիներին։ «Հրապարակ»-ը փորձեց պարզել, թե իրականում ո՞ւմ է պատկանում նախարարության «սիրելի» «ԱՌԵԴԻՏ» ընկերությունը։ Պետական ռեգիստրում, որպես վերոնշյալ ընկերության հիմնադիրներ, նշված է 2 անուն՝ Մարգարյան Գոհար, Գոռ Դավթյան։

Անցյալ տարի «Հետք»-ը գրել էր, որ Գոռ Դավթյանը «ԱՕԿՍ» ՍՊԸ-ի տնօրենն է, որի հիմնադիրներից է նաև մշակույթի նախկին նախարար Հասմիկ Պողոսյանը։ Դավթյանը Պողոսյանի մերձավորներից է, նրանց գործընկերը: Մշակույթի նախարարությանը մոտ կանգնած մեր աղբյուրը նշեց, որ վերոհիշյալ «ԱՌԵԴԻՏ» ՍՊԸ-ն պարզապես Գոռ Դավթյանի անունով է գրանցված, իսկ իրականում այն պատկանում է մշակույթի նախկին նախարար Հասմիկ Պողոսյանին։ Ընդ որում, Պողոսյանը միայնակ չի տնօրինում ընկերության բյուջեն։ Նրան այդ հարցում «օգնում» է մշակույթի փոխնախարար Ներսես Տեր- Վարդանյանը։ Վերջինս Հասմիկ Պողոսյանի կադրերից է և նախկին նախարարի՝ ԱՕԿՍ- ի ղեկավար լինելու տարիներին աշխատել է հետը, օգնել նրան։ Այնուհետև, երբ Պողոսյանը նշանակվել է նախարար, Ներսես Տեր-Վարդանյանին դարձրել է իր խորհրդականը։ Իսկ արդեն նախկին վարչապետ Տիգրան Սարգսյանի 2014 թվականի որոշմամբ՝ նշանակվել է փոխնախարար ու մինչ օրս շարունակում է պաշտոնավարել։

Ուշագրավ է նաև այն, որ մեր նախորդ հրապարակմանն ի պատասխան՝ մշակույթի նախարարությունը հաղորդագրություն տարածեց, որտեղ նշվում էր, թե ինչ սկզբունքներով են ձեռք բերվում այդ գրքերը։ Ըստ այդ հայտարարության՝ մշակույթի նախարարին կից գրականության պետական պատվերի և աջակցության ցանկերը ձևավորող խորհուրդն է սահմանում ուղղություններ, որոնցով հրատարակչությունները ներկայացնում են համապատասխան հայտեր: Իսկ խորհրդի կազմում եղել են մշակութային մի շարք գործիչներ, ինչպես նաև ՀՀ մշակույթի փոխնախարար Ներսես Տեր-Վարդանյանը։ Եվ բնական է, որ փոխնախարարը մրցույթում նախապատվությունը կտար իր ընկերությանը։

Փորձեցինք մեկնաբանություն ստանալ նախկին նախարարից և ներկայիս փոխնախարարից, սակայն մեր զանգերը մնացին անպատասխան։ Կապ հաստատեցինք մշակույթի նախարարության խոսնակ Ռուզաննա Խաչատրյանի հետ։ Խոսնակը ճառ կարդաց, հորդորեց, որ իրեն իրավական նման թեմաների մեջ չներքաշենք, որովհետև ինքը նախարարի խոսնակն է ընդամենը, այնուհետև նշեց, որ տվյալ հարցը իրեն ներկայացնելիս հարկավոր է փաստերի «մի ամբողջ տրցակ» ունենալ։

Մեկնաբանություն
X