Գործող ընտրակարգով ընտրություններին մասնակցելը նման է մատնոց խաղալուն․ Տիգրան Առաքելյան

ՀԱԿ ակտիվիստ Տիգրան Առաքելյանն երեք անգամ ազատազրկվել է, երկու անգամ՝ իր ընդդիմադիր գործունեության համար, երրորդ անգամ՝ ԱԺ ՀՀԿ-ական պատգամավորների վերաբերյալ ինտիմ տեսանյութեր տարածելու համար մեղադրանքով։
Ազատության մեջ հայտնվելուց հետո էլ նա զբաղվում է կաշվեգործությամբ եւ շարունակում է հարաբերություններ պահպանել «Հայ ազգային կոնգրես» կուսակցության հետ։ Տիգրան Առաքելյանի հետ բլից-զրույցը ներկայացնում ենք ստորեւ։

-Տիգրան, ըստ Ձեզ՝ ինչո՞ւ տարիներ շարունակ ընդդիմադիր գործունեության փորձ ունեցող ՀԱԿ-ը պարտություն կրեց ԱԺ վերջին ընտրություններում։
-ՀԱԿ-ը պարտություն չի կրել։ Էս իրավիճակում որեւէ մեկին չի կարելի համարել պարտված։ Եթե հաղթող չի եղել, ապա նշանակում է, որ պարտվող էլ չի եղել։ Դուք կարծո՞ւմ եք, որ ՀՀԿ-ն հաղթել է։ Եթե լինի այդպիսի կարծիք, ապա նշանակում է, որ հակառակ կողմը պարտվել է։ Բայց այստեղ պարտություն չկա։

-Նախորդ խորհրդարանում ՀԱԿ-ն ուներ յոթ պատգամավոր, իսկ այսօր՝ ոչ մեկը, դա պարտություն չէ՞։
-Ես շատ ուրախ եմ, որ այս դաշտում ՀԱԿ-ը չկա։ Դաշտն այնքան է պղտորվել, որ այնտեղ լինելով օգուտը շատ չէր լինելու։ Գոնե այս դեպքում ներկա իրավիճակի համար որեւէ մեղադրանք չի լինի։

-Իսկ ԱԺ ՀԱԿ պատգամավորների անցած հինգ տարիների գործունեությունն ինչպե՞ս եք գնահատում։
-Գերազանց, փայլուն։

-Բայց ինչո՞վ էր գերազանց, երբ խմբակցությունը պառակտվեց ԱԺ-ում, միասնական չէր։
-Այդ պառակտումները դետալներ են, նույնիսկ պառակտման եզրին գտնվելով եւ պառակտվելով էլ՝ ԱԺ-ում ամենաարդյունավետ գործունեությունը ՀԱԿ խմբակցությունն է ծավալել։

-Բոլո՞ր պատգամավորները։
-Կարելի է ասել՝ բոլոր պատգամավորները։ Ինչ-որ շրջանում մարդիկ ակտիվ են եղել, պասիվացել են, բան չունեմ ասելու, բայց ընդհանուր արդյունքը, հանրագումարը համարում եմ գերազանց։

-«Ելք» դաշինքը բոլոր դեպքերում ԱԺ մուտք գործեց՝ առանց ընտրակաշառք բաժանելու, որպես ընդդիմադիր ուժ։
-Ես կարծում եմ, որ իրենք յոթ տոկոս քվե չպետք է ստանային, կարող է իրականում քառասունինը տոկոս են հավաքել, բայց չի ֆիքսվել։ Բայց քանի որ իրենք համաձայն են արդյունքներին, ես չեմ ուզում այդ թեմայով ծավալվել։ Իրենք համաձայն են այդ յոթ տոկոսին։ Ես եղել եմ հանձնաժողովի անդամ եւ կարող եմ ասել, որ մեր տեղամասում «Ելք»-ը քսան տոկոս քվե էր ստացել։ Համատարած իրենք ավելի շատ քվեներ են ստացել, քան ֆիքսվել է։

-«Ելք» դաշինքի հետ ունե՞ք հարաբերություններ։
-Հարաբերություններ ուղղակի չունեմ։

-Նիկոլ Փաշինյանն էլ, Սասուն Միքայելյանն էլ եղել են քաղբանտարկյալ։
-Հարգում եմ իրենց։ Երբ ընդունվեց նոր Ընտրական օրենսգիրքը, հասկացա, որ նոր ընտրակարգով ընտրություններ, քաղաքականություն գոյություն չունեն։

-Նկատի ունեք ռեյտինգայի՞ն ընտրակարգը։
-Միայն ռեյտինգայինը չէ, նկատի ունեմ եւ՛ սարքավորումները, եւ՛ մնացած դետալները։ Ես այս ընտրակարգը համարում եմ ամենավատը, որ կարող էր լինել։

-Բայց ՀԱԿ-ը իր համաձայնությունն էր տվել այդ նոր Ընտրական օրենսգրքի ընդունմանը։
-Դե պետք է փորձարվեր, չէ՞։ Ամեն ինչ արվեց, որ կեղծիքները հնարավորինս նվազեցվեն, բայց իրականում ամեն ինչ դուրս եկավ հակառակը։ Այս ընտրակարգով անհնար է ընտրվել։ Այս ընտրակարգը վերարտադրվելու ընտրակարգ է։ Ինչպես ռեժիմը ցանկանա, այնպես էլ այս ընտրակարգը գործելու է։ Կհիշեք, ժամանակին ԳՈԻՄ-ի մոտ մատնոց կար, մատնոց էին ֆռցնում, պետք է գուշակեիր, թե որի տակ է։ Իրականում այն խաղացնողի բռի մեջ էր։ Որն ուզում ես գուշակիր՝ շարիկն այդտեղ չկա։ Հետո ինքը տեղադրում էր մեկ ուրիշում, որ բացի, ասի՝ տես, այստեղ էր։ Հիմա այն երեք սարքերը, որոնցով գործում է ընտրակարգը, ոնց որ ժամանակակից մատնոցներ լինեն։ Թող բոլորն անխտիր գնան, քվեարկեն ընդդիմության, Պողոսի օգտին, միեւնույնն է, եթե վարչախմբի ղեկավարը Սերժ Սարգսյանն է, ապա իր թիմն է անցնելու։

-Իսկ ապագայում քաղաքական գործունեություն իրականացնելու նպատակ ունե՞ք։
-Ես երբեք նման հավակնություններ չունեմ։ Ես, որպես Տիգրան, պայքարում եմ, որ իմ շրջապատում չլինեն կեղծիքներ, կաշառք չբաժանվի։

-Իսկ Երեւանի ավագանու ընտրություններից ի՞նչ տպավորություն ստացաք։
-Ոչ մի տարբերություն չկար։ Իշխանությունները փորձարկմամբ էին զբաղված։ Եթե «Ելքն» ու «Երկիր ծիրանին» միավորվեին, ապա միգուցե մի քիչ ավելի տոկոսներ ստանային։ Երբ ընդդիմությունը պառակտված է լինում, ընտրողը չի իմանում, թե ինչպես վարվի։

Թագուհի Հակոբյան

Մեկնաբանություն
X