UFC-ի թեթև քաշային կարգի գործող չեմպիոն Իլիա Թոփուրիան բացահայտել է, որ ապագայում մտադիր է ուժերը փորձել նաև բռնցքամարտում։ 28-ամյա մարզիկը խառը մենամարտերում ունի տպավորիչ արդյունք՝ 17 հաղթանակ և ոչ մի պարտություն։
Թոփուրիայի խոսքով՝ բռնցքամարտը միշտ եղել է իր հետաքրքրությունների շրջանակում, սակայն նա երբեք չի ցանկացել միաժամանակ կենտրոնանալ երկու տարբեր մարզաձևերի վրա։ Նրա համոզմամբ՝ փորձել միաժամանակ հաջողության հասնել երկու ուղղությամբ՝ պրոֆեսիոնալ մոտեցում չէ։ Այդ պատճառով էլ նա նախընտրել է ամբողջությամբ նվիրվել MMA-ին և միայն կարիերան ավարտելուց հետո տեղափոխվել բռնցքամարտ։
Չեմպիոնը նշում է, որ բռնցքամարտը պահանջում է բոլորովին այլ պատրաստվածություն, մտածելակերպ և մարզումային գործընթաց։ Տարբեր են ոչ միայն կանոնները, այլև միջավայրը:
Իլիա Թոփուրիան ընդգծում է, որ ներկայումս ամբողջ ուշադրությունը կենտրոնացած է խառը մարտարվեստների վրա, սակայն այդ փուլն ավարտելուց հետո նա չի պատրաստվում երկար մնալ MMA-ում։ Նրա խոսքով՝ բռնցքամարտում հանդես գալու դեպքում նա պատրաստ է զարմացնել շատերին և նոր էջ բացել իր մարզական կարիերայում։
