«Հրապարակ»․ Ես չեմ հավատում, որ որեւէ սրբազան հայր կարողանա գնալ իր խղճին դեմ

Հարցազրույց իշխող խմբակցության պատգամավոր Սերգեյ Բագրատյանի հետ

- Գիտեմ, որ դիմել եք՝ ՔՊ-ին անդամակցելու համար, բայց Ձեզ դեռեւս չեն ընդունել կուսակցության շարքերը, հնարավոր է մերժվե՞ք։

- Ես նոր եմ դիմել, վարչության նիստում պետք է որոշում ընդունեն, չեմ կարող ոչինչ ասել՝ կընդունեն, թե ոչ։ Ես աշխատել եմ այս տարիներին, ե՛ւ ժողովուրդն է դա տեսել, ե՛ւ քաղաքական ուժը, եթե նպատակահարմար կհամարեն․․․

- Պարոն Բագրատյան, գուցե ուզում եք պատգամավոր դառնալ, բայց քանի որ վստահ չեք, որ ցուցակի անցողիկ տեղերում կհայտնվեք, ուստի որոշել եք փոքր-ինչ շահած դուրս գալ եւ կուսակցական եք դառնում, որ ոչ թե մեկուկես, այլ կես միլիոն դրամ վճարեք։ Կամ էլ` գուցե մտածում եք, որ կուսակցական դառնալուց հետո Ձեր շանսերն ավելի կմեծանան։

- Չեմ կարծում, որ դա լուրջ խոսակցություն է։

- Իսկ լո՞ւրջ է, որ պատգամավորի թեկնածու դառնալու համար պետք է գումար մուծվեք։ Դա իրավական, անգամ բարոյական հարթության մեջ չի տեղավորվում։

- Ընդհանրապես, նման նվիրատվությունների, անդամավճարների ինստիտուտը չի կարող օրենսդրորեն հիմնավորված չլինի։

- Այո, օրենքը նվիրատվությունների եւ անդամավճարների մասին է սահմանում, բայց ոչ առաջադրման համար մուծվող «լեւի» փողի, որը կարծես մանդատի գինը լինի։

- Դա նույնպես ձեւակերպվում է օրինական եւ մուտք է արվում նախընտրական հիմնադրամում, եւ ծախսերն էլ ներկայացվում են հասարակությանը, թե ինչպես է ծախվել։

- Ենթադրվում է, որ ամբողջովին համաձայն եք ՔՊ գաղափարախոսություններին, քաղաքականությանը․․․

- Ես նշեցի, որ այն արժեքները, որոնք դավանել եմ եւ դավանում եմ՝ ազատություն, մրցակցություն, հավասարություն, պետության նկատմամբ վերաբերմունքը, հնարավորի քաղաքականությունը եւ այլն, արժեհամակարգեր են, որ յուրաքանչյուրս տարբեր է դիտարկում, բայց ինձ համար հոգեհարազատ ճանապարհ է։

- Իշխանության՝ Եկեղեցու նկատմամբ քաղաքականությունն է՞լ է Ձեզ համար հոգեհարազատ, այս «խաչակրաց արշավանքները»։

- Պետությունից հետո համար մեկ արժեքն ինձ համար Հայ առաքելական սուրբ եկեղեցին է։ Այն պրոցեսները, որ Դուք նկարագրում եք, կապ չունի եկեղեցու հետ, հոգեւոր արժեքների աղճատումը կարող է հիվանդացնել ե՛ւ ինձ, ե՛ւ ձեզ, եւ դա պետք է լինի թափանցիկ, տեսանելի, որպեսզի հայ մարդն ընդունի դա, եթե հայ մարդը չի ընդունում, ընդհանուր չեն ընդունում, ուրեմն խնդիր կա։ Հոգեւորականների վարքի հետ կապված շատ խնդիրներ ուղղակի պարզ, թափանցիկ է պետք ներկայացվեն։ 

- Լավ կլինի՝ քաղաքական իշխանությունն իր վարքով զբաղվի, հատկապես որ Սահմանադրությունը թույլ չի տալիս միջամտել եկեղեցու գործունեությանը։ Այլ ոչ թե ԱԱԾ-ի միջոցով ինչ-ինչ կոմպրոմատներով սրբազաններին իր կողմը բերի եւ եկեղեցին փորձի ներսից քանդել։

- Տեսեք, որոշ եպիսկոպոսներ իրենց անհամաձայնությունն արտահայտեցին, կարծեմ՝ 9 հոգի, եթե չեմ սխալվում՝ 20 հոգուց է բաղկացած տվյալ մարմինը։ Այսինքն, սա նույնպես ցույց է տալիս, որ ներսում էլ կա դժգոհություն։ Ես չեմ հավատում, որ որեւէ սրբազան հայր կարողանա գնալ իր խղճին դեմ, հետեւաբար, այս իրավիճակը մտածելու տեղիք է տալիս։

- Ձեր թիմակից պատգամավորներն են անգամ հրապարակավ խոստովանում, որ ԱԱԾ-ն աշխատում է հոգեւորականների վրա․․․

- Իրենց կրթական մակարդակը շատ բարձր է, չեմ հավատում, որ ԱԱԾ-ն կարողանա չեղած բան իրենց համոզել, իսկ եթե եղած բան կա, լավ կլինի՝ բոլորս էլ իմանանք այդ մասին։

- Իշխանությունն ուզում է հեռացնել մի քանի պինդ հոգեւորականի, Դուք, ինչ է, չգիտե՞ք Կճոյանի, Քյարամյանի հոր՝ Առաքել եպիսկոպոսի եւ մյուսների մասին, որոնցով հիմա փորձում եք իբր նորոգել եկեղեցին։

- Իհարկե՝ ոչ, իրենց միջոցով չենք անում, մենք ասում ենք, որ եկեղեցին՝ ինքը պետք է գնահատական տա, եկեղեցականները պետք է իրենք գնահատական տան, այդ իմաստով վստահ եմ, որ ճնշման տակ չեն կարող «ցուցմունքներ» տալ։ Ես կարդացի, որ այդ հոգեւորականներն ավելի վաղ ներկայացրել են իրենց դիրքորոշումը՝ Արշակի հետ կապված, ու սպասել, որ դիրքորոշում կայացվի, երբ չի կայացվել, նոր մտել են այս հարաբերության մեջ։

- Ձեր խնդիրն Արշակ սրբազա՞նն է կամ որեւէ այլ անձ․․․

- Ես բոլորի դեպքում եմ պատրաստ լսել, եթե խախտել են կուսակրոնության ուխտը, ուրեմն պետք է չշարունակեն, դա չի նշանակում հանցագործություն, դա նշանակում է, որ ընդունելի չէ։

- Չե՞ք կարծում, որ այս ճղճիմ թեմայով քանդում եք եկեղեցին` որպես ինստիտուտ, կամ առնվազն վնասում։

- Աստված չանի, որ մենք կառույցին վնաս տանք։