Այսօր կենդանասերները շան դիակ էին տարել կառավարության շենքի մոտ եւ մեծ ցանկություն են ունեցել այն տեղադրել կառավարության շենքի աստիճաններին: Սակայն մինչ նրանք կհասնեին կառավարության շենք, այնտեղ հավաքվել էին մեծ թվով ոստիկաններ, որոնք ԶԼՄ-ներից տեղեկացված էին ակցիայի մասին: Նրանք թույլ չտվեցին կենդանասերներին իրականացնել նախապես ծրագրած գործողությունը: Կենդանասերներից Աննա Մանուկյանը պատմեց, որ երեկ, մարտի 26-ին Կորեայի ձոր է գնացել, կերակրելու իր խնամակալության տակ գտնվող դրսի շներին և նրանցից մեկին գտել է վիրավոր վիճակում: Շանը «Դինգո» թիմի ջանքերով տեղափոխել են կլինիկա, սակայն կենդանին գիշերը անկել է, քանի որ վնասված են եղել թոքերը, ոտքը: Ըստ կենդանապաշտպան Գոհար Տեր-Անտոնյանի, շան մարմնի մեջ բազմաթիվ փամփուշտներ կան: «Առ այսօր քննիչը լայաղ չի արել զանգահարել, ուղարկել դատաբժշկական փորձաքննության մարմինը», - ասաց նա:
Ակցիան ավարտվեց նրանով, որ ոստիկանները շան մարմինը կենդանասերներից մեկի ուղեկցությամբ տեղափոխեցին քննչակա կոմիտե:
Վերջերս կենդանիների սպանության, ոչնչացման, սպանդի դեպքերը հաճախակի են դարձել: «Կենդանիների հանդեպ դաժան վերաբերյունքի» մասին ՀՀ օրենքը չի գործում, իսկ քննչական մարմինները չեն քննում այս գործերը, կեղծ քննություններով «մաքրում» են հանցագործների ձեռքերը և ազատում նրանց պատասխանատվությունից:
