Որ ասում եմ՝ Հայաստանն ապուշ երկիր է, ինձնից նեղանում են՝ լավ, անհարմար չի՞, ասում են, մա՞րդ էլ իր երկիրն այնքան չսիրի, որ ասի՝ ապուշ երկիր է: Բայց ես ավելին ասեմ՝ հիմար երկիր է, ոչ ոք մեզ չի սիրում, չի հարգում, բանի տեղ չի դնում: Սո՞ւտ եմ ասում: Իսկ դուք, ինչ է, մտածում էիք, որ Նիկոլի նման վարչապետ ունեցող երկիրը կարող էր լա՞վը լինել: Միայն թե չասեք՝ Նիկոլից առաջ էլ մի բան չէր: Կարգին երկիր էինք այն ժամանակ: Նիկոլը չգար, չոչնչացներ ամեն ինչ, հիմա էլ մի բանի նման կլինեինք: Կարելի էր, չէ՞, Արցախի հարցով բանակցություններն այնքան ձգել, մինչեւ Մինսկի խմբի համանախագահների գլուխներն ուռչեին: Այդ մարդիկ արդեն խոսում էին Արցախի կարգավիճակի մասին, Ալիեւը մազերն էր պոկում, թե կուլիսներում իրեն ստիպում են ճանաչել Արցախի անկախությունը: Իսկ ի՞նչ արեց Նիկոլը…
Թույլ տվեք չպատմել, որովհետեւ դուք ամեն ինչ շատ լավ գիտեք, ինձնից էլ լավ: Ազգովի մեզ դրեց կոտրած տաշտակի առաջ, հիմա էլ կանգնել է, թե՝ խաղաղություն եմ բերել: Սուտ է ասում: Խաղաղությունը խելացի մարդիկ կարող են բերել ու պահել: Բա պայմանավորված պատերազմով երկիրդ տաս, հետո վեր կենաս հայտարարես, որ Արցախն Ադրբեջա՞ն է, բա հայ ժողովուրդն այդքան զոհ տա պատերազմում, ու դու ասես՝ հայ ժողովուրդը համաձայն էր Արցախի գնով այս խաղաղությա՞նը: Դուք ասեք՝ ո՞վ է այս բանն ասողը, մա՞րդ: Նորմալ մարդը, ղեկավարը, երկրի սահմանները չճշտած, գերիներին չվերադարձրած, թշնամու նորանոր պահանջների բեռի տակ կքած՝ կհայտարարի՞, որ այդ թշնամու հետ այլեւս խաղաղություն է հաստատել: Տո դուռակ, որ էդ միջանցքից ԱՄՆ-ն հրաժարվի մի օր, ի՞նչ ես անելու, կարողանալո՞ւ ես վերահսկողություն սահմանել այնտեղ կամ չեղյալ հայտարարել միջանցքը: Դու էլի հող ես տվել, դու խաղաղություն չես բերել, դու հերթական զիջումն ես արել թուրքին: Եվ մի ասեք, թե դա անխոչընդոտ անցում է Ադրբեջանից Նախիջեւան: Դա անցում է Ադրբեջանից Թուրքիա եւ հակառակ ուղղությամբ, եւ դուք որեւէ վերահսկողություն չունեք այդ «ճանապարհի» վրա:
Հա, ինչի՞ մասին էինք խոսում: Ես ասում էի, որ Նիկոլի Հայաստանը հիմար երկիր է, ու սա դեռ վերջը չէ: Երբ թուրքերի պահանջով սահմանադրությունը կփոխենք, Հայաստանում եղած ադրբեջանական տարածքները ոչնչի դիմաց կվերադարձնենք Նիկոլի եղբայրներին, երբ «Հայաստան» անունն անգամ կփոխեն այս հացկատակ իշխանությունները, այն ժամանակ կտեսնենք, թե ինչպիսին է լինում հիմար երկիրը, ինչպիսին է լինում մուրացիկ խաղաղությունը: Այդ ժամանակ էլ ասելու է՝ դուք հեղափոխություն չարեցիք, դա նշանակում է՝ ինձ հետ համաձայն էիք, որ սահմանադրությունը փոխելով էր միայն հնարավոր խաղաղություն հաստատել:
Հեղափոխության մասին… Ինչո՞ւ է Նիկոլն իրեն թույլ տալիս այսքան անհարգալից խոսել մեզ հետ: Հանկարծ չզարմանանք, բայց մենք «չմո» ենք: Գոնե իր համար այդպիսին ենք որպես ժողովուրդ, որպես հասարակություն, որ չգիտի իր դժգոհությունն արտահայտել, իր վախերը հաղթահարել, ընդվզել, ռադ անել մի իշխանության, որ այսքան ավերներ է բերել իրեն: Մենք մեր երկրում ժամանակավոր կենվորի կարգավիճակում ենք այսօր: Այստեղ ինչ կա-չկա, Նիկոլինն է ու ՔՊ-ինը՝ ուժային բոլոր կառույցները, իրավապահ ողջ համակարգը, բոլոր դատարանները… մենք ոչինչ չունենք, մեր ոչ մի իրավունք պաշտպանված չէ այստեղ: Վաղը եթե թուրքը պահանջի՝ հայերին «սիկտիր» անել Հայաստանից, Նիկոլը չի հակառակվելու այդ պահանջին: Գալու է ասի՝ գիտե՞ք ինչ, դա է հիմա խաղաղության գինը… Կա՛մ հեղափոխություն արեք, կա՛մ «սիկտիր» եղեք: Հեղափոխությո՞ւն եք անելու: Ես խիստ կասկածում եմ: Մենք կասենք՝ «զատո՞ նախկինները հետ չեկան», ու ճանապարհ կընկնենք:
