«Շնորհակալություն» ասեք Նիկոլին՝ «բանակցային ներքնազգեստի»  ցուցադրության համար. Մինվալ 

Կառավարության ղեկավարի նախաձեռնությամբ «դարի բացահայտում, գաղտնազերծումն է արվել»․ հրապարակվել են մինչև Փաշինյանի պաշտոնավարումը տեղի ունեցած բանակցությունների՝ ԼՂ հարցով, մանրամասները։ Բնականաբար, լուրը չէր կարող անտարբերության մատնվել Բաքվում: Այսինքն՝ դա հենց այդ նպատակով էր արվել, պարզ ասած՝ Փաշինյանը նախ Ադրբեջանին հաճոյանալու համար էր կազմակերպել այդ «թողարկումը», մյուս կողմից իր հայտնի սցենարն է առաջ տանում՝ թուրք-ադրբեջանական տանդեմին սպասարկելու, բայց նաև նախընտրական «դիվիդենտներ շահելու» առումով։ 

«Ղարաբաղը մնում է Հայաստանի ներքաղաքական գերակա խնդիրը. Հայաստանի կառավարության կողմից Ղարաբաղի վերաբերյալ բանակցային փաստաթղթերի վերջերս հրապարակումը ևս մեկ անգամ հաստատեց դա: Այսպիսով, Փաշինյանը անդրադառնում է զուտ ներքաղաքական հարցերին: Բանակցային փաստաթղթերը հրապարակելով՝ Հայաստանի ներկայիս վարչապետը փորձում է ցույց տալ, որ Ադրբեջանի հետ Հայաստանի համար բարենպաստ պայմաններով համաձայնության գալու բոլոր հնարավորությունները վատնվել են իր առջև, և որ պատերազմը, ըստ էության, անխուսափելի է դարձել նախորդ կառավարության օրոք»,-գրում է Ադրբեջանի իշխանական կայքերից մեկը` Մինվալ.ազ-ը։ Հոդվածագիրը նկատում է. «Սա, իհարկե, հարմար առիթ է հիշելու, թե ինչպես 44-օրյա պատերազմի նախօրեին Փաշինյանն արդեն սպառնացել էր հրապարակել բանակցությունների մանրամասները՝ ակնարկելով, որ դա կպայթեցնի Ադրբեջանի ներքաղաքական իրավիճակը: Հայաստանը բազմիցս փորձել է «պայթեցնել» մեր երկրում ստեղծված իրավիճակը, այդ թվում՝ պատերազմից առաջ և ընթացքում, բայց բանակցային փաստաթղթերը երբեք չեն հրապարակվել: Փաշինյանը դա արեց հիմա, երբ նախորդ բոլոր փաստաթղթերն ու առաջարկները արդեն կորցրել էին իրենց քաղաքական և դիվանագիտական ուժը՝ հույս ունենալով հարված հասցնել նախկին նախագահներին և իր ամենալուրջ քաղաքական հակառակորդներին՝ Ռոբերտ Քոչարյանին և Սերժ Սարգսյանին»։

«Հաջողվե՞լ է արդյոք Փաշինյանին հասնել այս նպատակին, մնում է բաց հարց: Ընդդիմադիր շրջանակները անմիջապես հիշեցին իր սեփական «սխալների» մասին: Ստեփանակերտում նա անցկացրեց զանգվածային հանրահավաք և վանկարկեց. «Արցախը Հայաստան է, և վերջ»։ Ալիևը օգտագործեց դա բանակցային գործընթացը դադարեցնելու համար՝ մեղադրելով Հայաստանին ապակառուցողական գործողությունների մեջ»,-ասվում է հոդվածում, հավելելով, որ «Եւ Սերժ Սարգսյանի, և՛ Փաշինյանի օրոք Երևանում մշակվել էին նոր տարածքների համար նոր պատերազմի ծրագրեր»։ «Եվ հիմա միջնորդները կարող են միայն «շնորհակալություն» ասել Նիկոլ Վովաևիչին «բանակցային ներքնազգեստի» այդքան անկեղծ ցուցադրության համար»,-հայտարարում է Մինվալը։