Կներեք, իսկ ապացույցներ կա՞ն, որ Նիկոլ Փաշինյանը բուժզննում է անցել «Նաիրի» ԲԿ-ում: Ապացույցներ՝ ինչպես բուժզննում անցնելու, այնպես էլ բուժզննումը հատկապես «Նաիրի» ԲԿ-ում անցնելու հետ կապված: Օրինակ, ես չեմ հավատում: Եթե ինձ ասեիք՝ Արարատ Միրզոյանը կամ Ալեն Սիմոնյանն են «Նաիրիում» բուժզննում անցել, գուցե հավատայի, բայց Նիկո՞լը… Ձեւ չի: Ոչ մի երկրի ղեկավարի այնպես չեն տանում հիվանդանոց, որ հետո էշ-էշ բռնվեն, տեսնող լինի եւ հազար ու մի բան մտածի իր երկրի ղեկավարի մասին:
Սիրտն ա վատ, ճնշումն ա բարձրացել, լուծ ա, թունավորվել ա… Լավ բանի համար հիվանդանոց հո չե՞ն գնում: Նազելին, թե՝ վարչապետը տարեկան բուժզննում է անցել, անալիզները մաքուր են, իրեն լավ է զգում, շարունակում է աշխատել իր ռեժիմով: Սուտ է: Հնարավոր է, որ իրեն լավ է զգում, բայց դա «Նաիրի» ԲԿ-ում բուժզննում անցնելու «սլիվի» հետ կապ չունի: Նիկոլի համար ուրիշ բան են նախապատրաստում: Ես դա զգում եմ: Հակառակ պարագայում Նիկոլի բուժզննումը կարող էին իրականացնել կառավարության դաչաներում (չար աչքից հեռու), կամ դա աներ նրա անձնական բժիշկը (չար ականջից հեռու): Երբեւէ լսե՞լ եք, որ հայտարարեն, թե Ալիեւը բուժզննում է անցել: Պուտինը, Լուկաշենկոն… Բրեժնեւը մինչեւ իր կյանքի վերջին օրը գոնե մեկ անգամ Սկլիֆոսովսկու անվան ԲԿ չի այցելել: Ստալինի ատամնաշարը (պրոթեզ) պատրաստել, հետո փորձարկել են նրա աշխատասենյակում: Այդ մասին ոչ ոք չէր իմանա, եթե Ստալինը չհրամայեր գնդակահարել իր անձնական ատամնատեխնիկին, որ նեղ շրջապատում պատմել էր, թե որքան քմահաճ ու անհասկացող պացիենտ է առաջնորդը: «Ես նրա համար թեթեւ նյութերից ատամնաշար էի պատրաստել, իսկ նա պահանջեց, որ ատամները պողպատից լինեն: Պիտի տեսնեիք, թե կզակն ինչպես կախվեց պողպատի ծանրությունից»,- ասել էր հարիֆն ու երկրորդ օրը հայտնվել մայրաքաղաքից ոչ այնքան հեռավոր վայրերում, որտեղ էլ գնդակահարել էին:
Հիմա եկել, ինձ պատմում եք, որ Նիկոլի նման մեկը օրը ցերեկով գնացել է հիվանդանոց եւ բուժզննո՞ւմ անցել: Կարող էիք ասել՝ «Նաիրի» ԲԿ-ի գլխին սեւ ամպեր են կուտակվել, կարող էիք ասել՝ իր աշխատակազմի եւ խոսնակի զգոնությունն է ստուգել, կարող էիք վերջապես ասել՝ մի ամիս հետո Մոսկվա պիտի գնա՝ պատճառ է փնտրում չգնալու… ամեն ինչ կարող էիք ասել, բայց երբ ասում եք` իր ոտով վեր է կացել գնացել բուժզննման՝ չեմ հավատում: Ե՞ս էի Արծրունի հետ հեծանիվ քշում… Եվ, ուրեմն, էդ ի՞նչ գրող կպավ նրան, որ վազեց բուժզննության:
Գյումրին ա ազդել… Գյումրու ընտրությունների արդյունքներից ով ասես՝ կվատանար: Բայց, արդյոք, այնքա՞ն վատ էր, որ չկարողացավ քաղաքական կամք դրսեւորել եւ պահել իր «շանսատակ» եղած թիմի պատիվը: Չգիտեմ, եղբայր, իմ ուղեղում չի տեղավորվում, որ երկրի վարչապետը վատանա, տանեն հիվանդանոց եւ այդ մասին հայտարարեն ամբողջ աշխարհին: Ով ասես՝ չիմացավ, որ Նիկոլը վատ ա: Պուտինն էլ իմացավ, Նիկոլի արեւմտյան տիկնիկավարներն էլ իմացան, Ալիեւը, Էրդողանը: Այս միջադեպով Նիկոլը մեսիջներ չի՞ հղում, արդյոք, ուր որ անկ է: Իմանալով Նիկոլի՝ հիվանդանոց ընկնելու մասին, անգլիացիներն իրենց քաղաքացիներին հորդորեցին չայցելել Ադրբեջանի արեւմտյան շրջաններ՝ Ֆիզուլի, Ջեբրայիլ, Լաչին… Ավելի ստույգ՝ Սյունիքի, Ջերմուկի, Վայքի հետ սահման, որը դեռ չի սահմանազատվել ու սահմանագծվել: «Նաիրի» ԲԿ-ում Փաշինյանը, պատահաբար, չի՞ խոստովանել, որ ինքնազգացողությունը վատացել է հայ-ադրբեջանական սահմանին լսվող կրակոցներից:
Մեկ էլ ինձ թվում է, որ Նիկոլ Փաշինյանը վերջերս «Ալմա-Աթայի հռչակագրով» հաստատված ՀՀ նոր քարտեզ է նվեր ստացել Ադրբեջանից: Խոսքն Արմավիրում «Կրթվելը նորաձեւ է» թոք-շոուի ժամանակ ցուցադրված քարտեզի մասին է, որի վրա Գեղարքունիքի մի մասը, Ջերմուկը, Վայքի մի հատված եւ ամբողջ Սյունիքը ներկված են տարօրինակ գույներով՝ ՀՀ մնացած մասի համեմատ շատ բաց, համարյա՝ սպիտակ: Կարո՞ղ էր, արդյոք, այդ քարտեզից վատանալ հայոց կրթապետ ռահվիրայի ինքնազգացողությունը: Կարող էր: Մարդ, որ զգում է՝ «աջալը եկել է», կվատանա էլ, կդիվոտի էլ, ումից ասես՝ փրկություն կաղերսի: Պարզապես խոսքն այստեղ սովորական մարդու մասին չէ, Նիկոլի մասին է՝ դավաճանի, կապիտուլյանտի, ստահակի, աճպարարի եւ համաշխարհային ստախոսի:
Իսկ դուք ասում եք՝ տարեկան բուժզննում… Չեմ հավատում: Վաղն էլ ասելու եք՝ մեկնել է արտասահման՝ հետազոտություն անցնելու... Կտանեք ու էլ չեք բերի: ԱԱԾ-ում կրթվելը միշտ նորաձեւ է: Ճիշտ չե՞մ ասում, պարոն Աբազյան: Դե կրթվեք, կրթվեք…
