ԵԱՏՄ առաջնորդները կարծում են, որ Հայաստանում պետք է ազգային հանրաքվե անցկացվի ԵՄ-ին միանալու կամ ԵԱՏՄ-ում մնալու վերաբերյալ։
ՌԴ նախագահի օգնական Յուրի Ուշակովն ավելի վաղ հայտնել էր, որ ԵԱՏՄ երկրների ղեկավարները Հայաստանի շուրջ ստեղծված իրավիճակի վերաբերյալ գործնական քննարկում են անցկացրել Եվրասիական տնտեսական բարձրագույն խորհրդի նիստում և հայտարարություն են ընդունել։
Կրեմլը հրապարակել է Ռուսաստանի, Բելառուսի, Ղրղզստանի և Ղազախստանի առաջնորդների հայտարարությունը, որում նշվում է` Եվրասիական միջկառավարական խորհրդի անդամները դեկտեմբերին կներկայացնեն ԵԱՏՄ պայմանագրի կասեցման հնարավոր հետևանքները Հայաստանի համար։
ԵԱՏՄ անդամ պետությունների ղեկավարների կարծիքով՝ Հայաստանում պետք է հանրաքվե անցկացվի հնարավոր սեղմ ժամկետում։
«Համակարծիք ենք, որ Հայաստանում հնարավոր սեղմ ժամկետում անհրաժեշտ է հանրաքվե անցկացնել Եվրոպական միությանն անդամակցելու կամ հետագայում Եվրասիական տնտեսական միության կազմում գտնվելու վերաբերյալ»,– ասված է հայտարարությունում։
«Մենք՝ Բելառուսի Հանրապետության, Ղազախստանի Հանրապետության, Ղրղզստանի Հանրապետության և Ռուսաստանի Դաշնության նախագահներս, հաշվի առնելով Եվրասիական տնտեսական միության անդամ պետությունների (այսուհետ՝ Միություն) տնտեսական անվտանգության համար զգալի ռիսկերը, որոնք առաջանում են Հայաստանի Հանրապետության՝ Եվրամիությանը միանալու նախապատրաստական աշխատանքների հետ կապված, ինչպես նաև Միության անդամ պետություններին հասցվող վնասը կանխելու անհրաժեշտությունը, որոշել ենք, որ Բելառուսի Հանրապետության, Ղազախստանի Հանրապետության, Ղրղզստանի Հանրապետության և Ռուսաստանի Դաշնության Եվրասիական միջկառավարական խորհրդի անդամները 2026 թվականի դեկտեմբերին կայանալիք Եվրասիական տնտեսական բարձրագույն խորհրդի հաջորդ նիստում կզեկուցեն Եվրասիական տնտեսական միության մասին պայմանագրի կասեցման հնարավոր հետևանքների մասին՝ կապված Հայաստանի Հանրապետության հետ», - ասվում է հայտարարության մեջ։
Հիշեցնենք` ՀՀ վարչապետ Նիկոլ Փաշինյանը հայտարարել է, որ Հայաստանը երջանիկ կլինի, եթե իրեն ընդունեն Եվրամիություն, բայց միևնույն ժամանակ նշել է, որ Հայաստանը շարունակում է մնալ ԵԱՏՄ լիիրավ անդամ, և երկու միավորումների միջև ընտրության հարցը որոշելու է ժողովուրդը, ոչ թե երկրի ղեկավարությունը:
Մայիսի 9-ին Ռուսաստանի նախագահ Վլադիմիր Պուտինն ասուլիսի ժամանակ ասաց՝ կարծում է, որ թե՛ ՀՀ քաղաքացիների, թե՛ Մոսկվայի՝ գլխավոր տնտեսական գործընկերոջ հանդեպ ճիշտ կլիներ, որ պաշտոնական Երևանը հնարավորինս արագ կողմնորոշվեր ԵՄ-ին անդամակցելու հարցում։
Փաշինյանը մայիսի 11-ին հայտարարեց, որ Հայաստանը մնում է ԵԱՏՄ լիարժեք անդամ, իսկ այդ հարցով հանրաքվեի անցկացումը հնարավոր է միայն «օբյեկտիվ անհրաժեշտության» դեպքում:
