Լսեցի, որ ԱԺ նախագահ Ալեն Սիմոնյանն ընդդիմադիր լրատվամիջոցներին առաջարկել է հարցազրույցներ անել իր հետ: ՔՊ-ի պատմության մեջ սա աննախադեպ բան է: Ոնց որ ասի՝ եկեք ինձ կերեք: Ալեն, ախր քո ինչի՞ն է պետք՝ մատդ մտցնում ես բզեզի բույնը: Սա ի՞նչ ինքնավստահություն, սա ի՞նչ անպատասխանատու հայտարարություն է: Բա որ ոչ մի ընդդիմադիր լրատվամիջոց չարձագանքի կամ, ավելի ճիշտ, բոլոր ընդդիմադիր լրատվամիջոցները մի մարդու պես արհամարհեն քո հանդուգն առաջարկը… Ի՞նչ ես անելու:
Ալեն, 7 տարի է՝ իշխանության մեջ «պեռվի կռուգ» ֆռֆռում ես, բայց շատ հասարակ բաներ դեռ չես սովորել: Զորօրինակ այն, որ մամուլի, լրագրողների և լրատվամիջոցների հետ, անկախ նրանց իշխանական, թե ոչ իշխանական լինելու հանգամանքից, պետք է միշտ լավ հարաբերություններ ունենալ: Իսկ դու մինչ օրս ի՞նչ ես արել այդ ուղղությամբ: Քանի կար, օրենք էիր բերել խորհրդարան, որ «անդուր» լրագրողներին քրեական պատասխանատվության և տուգանքների ենթարկեն: Բերածդ օրենքը երկու օր գործեց՝ չեղարկեցիք, որովհետև խայտառակություն էր: Տեսար ոչինչ չի ստացվում, սկսեցիր գործ տալ լրագրողների, լրատվամիջոցների, բլոգերների դեմ: Հենց հիմա երկու հոգի հանցագործության մասին քո տված հաղորդումի պատճառով նստած են: Էլ չեմ ասում, որ այդ լրագրող-բլոգերներին սադրողն էլ դու էիր եղել: Եվ ուրեմն, քո հայտարարությունը, թե պատրաստ ես ընդդիմադիր լրատվամիջոցներին հարցազրույց տալ, ի՞նչ է, եթե ոչ՝ քաղաքական կապիկություն:
Դու ուզում ես հարցազրույց տալ՝ ուրիշ լրատվամիջոց չկա՞, Պետրոսը մեռե՞լ է, «ՀԺ»-ն փակվե՞լ է, Արայիկ Հարությունյանի ֆեյք ստուդիաները ամբիոն չե՞ն տրամադրում: Սաֆարյան Սծյոպիկին դիր թևիդ տակ, գնա «1in.am» ու ինչքան ուզում ես հարցազրույց տուր Արման Բաբաջանյանին՝ ո՞վ քեզ բան կասի: Այլապես ուզում ես, որ «Հայելի ակումբի» Անժելա Թովմասյանը քեզնից հարցազրույց վերցնի: Դա լինելո՞ւ բան է: Քեզ ոտքերդ առաջ դուրս կբերեն ակումբից ու… Անժել ջան, դե արի, հակակոռուպցիոնին պատասխան տուր… Սաթիկի մոտ կգնա՞ս, Ալեն: Երբ դու եւ Սիսակն արդեն դատախազությանը հանձնարարել եք ժուռնալիստների միության տունն ազատել Սաթիկից, շենքն էլ խլել Միությունից: Գնա, խնդրեմ, հարցազրույց տուր Սաթիկին: Սծյոպիկին էլ տար հետդ, եթե վախենում ես: Իսկ գուցե փորձես «Հրապարակի՞ն» հարցազրույց տալ: Լավ էլ առաջատար ընդդիմադիր լրատվամիջոց է, եվրոպաներում ու ռուսաստաններում իշխանական շրջանակներն են նույնիսկ «Հրապարակ» ցիտում: Դու և շեֆդ «Հրապարակի» էջերում հայտնվել սիրում եք, չէ՞, պարբերաբար հայտնվում եք… Մի սկանդալ ավել, մեկը՝ պակաս, ի՞նչ նշանակություն ունի ձեզ համար:
Ալեն, ընդդիմադիր լրատվամիջոցներին ու ալիքներին հարցազրույց տալու քո ցանկության հետ կապված՝ մի լուրջ դժվարություն էլ կա, որ, կարծում եմ, հաշվի չես առել: Բանն այն է, որ քո, Նիկոլի և առհասարակ ՔՊ-ի հետ ամեն շփում, որ բնագավառն էլ վերցնենք, համարվում է դավաճանություն, իսկ ձեզ հետ շփվողներին էլ իսկույն դավաճան են անվանում: Ինչին ձեռնահասություն եք ունենում՝ մունդռում եք, փչացնում, մարդկանց աչքից գցում: Ասա ինձ, Ալեն, ի՞նչ մեղք էին գործել «Արմքոմեդիի» տղաները, որ ներխուժեցիր նրանց տաղավար ու «զրուցեցիր» հետները: Ինչո՞ւ պիտի քո պատճառով ես նրանց հաղորդումներն այլևս չնայեմ, «դիսլայք» անեմ նրանց ալիքը, հաղորդաշարն անվանեմ «թուրքքոմեդի»:
Արդեն շատ լրջացրիր՝ կասի ընթերցողը, Ալենն էր, մի բան ասաց, հո չարե՞ց: Ճիշտ ես, հարգելի ընթերցող, ես էլ առանձնապես վստահ չեմ, որ Ալենը սկսելու է ընդդիմադիր լրատվամիջոցների դռները ջարդել հարցազրույցի համար: Ուղղակի՝ սա այն դեպքն է, որ պետք է մի քիչ զգույշ լինել: Ամբողջ թիմով խայտառակվել են՝ ուզում են ընդդիմադիր լրատվամիջոցների ուժերով ռեաբիլիտացվել… Սա է խնդիրը:
Հ.Գ. Մի անգամ հարգարժան Գալուստ Գրիգորիչին «հանդիմանեցի», թե պարոն Սահակյան, Դուք իսկի շրջահայաց չեք, ում պատահի՝ հարցազրույց եք տալիս, նրանք էլ Ձեր խոսքն աղավաղում ու այդպես տպում են: Ասաց՝ ճիշտ ես ասում, երբ ինձնից հարցազրույց են ուզում, ես նույնիսկ չեմ էլ հարցնում՝ որ լրատվամիջոցից է, տալիս եմ, բոլորը գրչի մարդիկ են, իսկ գրչի մարդիկ սովորաբար բարի են լինում…
