«Ազատություն լրագրող Հայկ Գեւորգյանին». այսպիսի գրառումներով լի էր «Ֆեյսբուքը» երեկ երեկոյան, եւ եթե Հայկին այսօր ազատ չարձակեն, ապա սոցիալական ցանցում ավելի շատ գրառումներ կլինեն նրա մասին: «Հայկական ժամանակ» օրաթերթի լրագրողի անսպասելի ձերբակալությունը զարմացրել ու բարկացրել է շատերին: «Անհասկանալի պատճառներով եւ առայժմ բավականին մութ պատմություն է: Հայկն իմ ճանաչած ամենապայծառ եւ բարի մարդկանցից է: Թե ինչ է կատարվել իրականում, կարծում եմ, շուտով կիմանանք»,- գրել է Հրանտ Աբրահամյանը: Կարդալ ամբողջությամբ

«Հայկական ժամանակ» օրաթերթի թողարկման պատասխանատու Հայկ Գեւորգյանի կալանավորումը թերթի գլխավոր խմբագիր Նիկոլ Փաշինյանը եւ ամբողջ խմբագրակազմը երեկ որակեցին որպես «իշխանության վերնախավի, մասնավորապես ոստիկանապետ Վովա Գասպարյանի կողմից հրահանգավորված ապօրինի եւ լկտի հետապնդում»: Հիշեցնենք, որ Հայկ Գեւորգյանը երեկ առավոտյան, ժամը 11-ի սահմաններում, աշխատանքի գնալիս կալանավորվել է եւ տեղափոխվել «Նուբարաշեն» քրեակատարողական հիմնարկ: Նրա նկատմամբ քրեական գործ է հարուցվել Քրօր. 242 հոդվածի 1-ին մասի (Ավտոմեքենա կամ մեխանիկական այլ տրանսպորտային միջոց վարող անձի կողմից ճանապարհային երթեւեկության կամ տրանսպորտային միջոցների շահագործման կանոնները խախտելը, որը մարդու առողջությանն անզգուշությամբ պատճառել է ծանր կամ միջին ծանրության վնաս) եւ 244-րդ հոդվածի (Ճանապարհատրանսպորտային պատահարի վայրը թողնելը տրանսպորտային միջոց վարող եւ ճանապարհային երթեւեկության կամ տրանսպորտային միջոցների շահագործման կանոնները խախտած անձի կողմից) հատկանիշներով:

Չնայած ոստիկանությունը շատ վարպետորեն բեմադրել է մի զավեշտալի վթարի դրվագ, ըստ որի՝ Հայկ Գեւորգյանը Մհեր Մկրտչյան փողոցում վրաերթի է ենթարկել մի քաղաքացու եւ դեպքի վայրից դիմել փախուստի, սակայն Փաշինյանը համոզված է, որ Հայկի կալանավորումը կապված է բացառապես նրա մասնագիտական՝ լրագրողական գործունեության հետ: Մասնավորապես «Հայկական ժամանակի» վերջին մի քանի համարներում ոստիկանապետին առնչվող հրապարակումների հետ: Փաշինյանի կարծիքով, ոստիկանապետը սրանով անձնական վրեժ է լուծում լրագրողից: «Հայկ Գեւորգյանի ձերբակալությունը եւ շինծու քրեական հետապնդումը հրահանգավորված են անձամբ ՀՀ ոստիկանության պետ Վովա Գասպարյանի կողմից: Ենթադրում ենք, որ վերջինիս նյարդերը վերջնականապես տեղի են տվել, երբ սրտի կսկիծով երեկվա մեր համարում կարդացել է մեկ ուրիշ հրապարակում, որը վերաբերում էր ՊԵԿ-ի նախագահ Գագիկ Խաչատրյանի 150 հազար դոլարանոց նվերին՝ «G» դասի «Մերսեդես» ավտոմեքենային»,- ասաց Փաշինյանը: Նշենք նաեւ, որ մինչ այդ Հայկը հանդես էր եկել «Եվ Աստված ասաց՝ Վովա» ու մի քանի այլ հրապարակումներով, որոնք բոլորն էլ առնչվում էին ոստիկանապետին:

Վթարի մանրամասներն անգամ փաստում են այն մասին, որ կատարվածի ոստիկանական շարադրանքը եւ մեղադրանքը խիստ կասկածելի են: Փաշինյանի փոխանցմամբ, տուժողը՝ Աշոտ Ֆրանգուլյանը, մեկին (Փաշինյանն առայժմ չցանկացավ նշել, թե ում) պատմել է վթարի մանրամասները, նշելով, որ «մեքենան դիպչել է իր ոտքին, որի վրա ինքը ջիլ ունի, որ եթե այդ ջիլին մատով էլ կպնեն, ինքը վատանում է: Դրանից հետո գնացել է, նստել է մոտակա բորդյուրին, որից հետո գլուխը խփել է պատին»: Մինչդեռ, Փաշինյանի խոսքով, Հայկն իրենց հավաստիացրել է, որ իր մեքենայի եւ այդ մարդու միջեւ կոնտակտ չի եղել, այսինքն մեքենան որեւէ կերպ չի հարվածել, չի կպել այդ մարդուն: «Այսպիսի բան կարող էր բեմադրել միայն Վովա Գասպարյանի նման մարդը, որը, կարծում եմ՝ որոշակի առողջական պրոբլեմներ ու որոշակի կախվածություններ ունի: Եվ այս գործի շրջանակներում լավ կլինի նրան ենթարկել դատահոգեբուժական փորձաքննության: Այս կարգի ոստիկանության պետ ունենալը վտանգավոր է ՀՀ յուրաքանչյուր քաղաքացու եւ ընդհանրապես ՀՀ-ի համար»,-զայրույթով նշեց Փաշինյանը: Դեպքից հետո՝ մի քանի օր անց, նախ ծանուցագիր է ուղարկվել Փաշինյանի կնոջ՝ Աննա Հակոբյանի անունով, քանի որ մեքենան գրանցված է վերջինիս անունով: Փաշինյանը կապվել է քննիչի հետ՝ դրա հետ կապված պարզաբանումներ ստանալու, նշել է, որ ծանուցագրում Աննայի կարգավիճակը հստակեցված չէ, եւ խնդրել է պատշաճ  ծանուցում ուղարկել: Դրանից հետո ծանուցագիր է ուղարկվել Հայկ Գեւորգյանի անունով, ինչից հետո Հայկը եւս կապվել է քննիչի հետ եւ նորից խնդրել հստակեցնել իր կարգավիճակը, որից հետո մինչ երեկ՝ Հայկի անսպասելի կալանավորումը, որեւէ ձայն չի եղել ոստիկանության կողմից: Նշենք նաեւ, որ երեկ, ոստիկանության բաժանմունք  տեղափոխելուց, ապա նաեւ կալանավորելուց հետո, Փաշինյանի խոսքով, Հայկին հնարավորություն չեն տվել զանգ կատարել, ինչպես նաեւ բավական երկար ժամանակ հարազատներին տեղյակ չի պահվել նրա գտնվելու վայրի մասին, ինչն օրենքի կոպիտ խախտում է: Կարդալ ամբողջությամբ

Երեկ մենք տեղեկացանք, որ առողջական վիճակի կտրուկ վատացման պատճառով «Նաիրի» բժշկական կենտրոն է տեղափոխվել զինդատախազ Գեւորգ Կոստանյանը: Ըստ որոշ լուրերի, նա ինսուլտ է ստացել: Երեկոյան նա դեռ գտնվում էր հիվանդանոցի վերակենդանացման բաժանմունքում: Կոստանյանի առողջական վիճակի մասին հիվանդանոցից հրաժարվեցին որեւէ տեղեկություն հայտնել: Մեզ միայն հաջողվեց ճշտել, որ վիճակը կայուն է եւ կյանքին վտանգ չի սպառնում:

ԵԱՀԿ երեւանյան գրասենյակը հայտարարել է 2012 եւ 2013 թթ. ՀՀ խորհրդարանական եւ նախագահական ընտրությունների ընթացքում լրատվամիջոցների մոնիտորինգի մրցույթ, որին կարող են մասնակցել տեղական հասարակական կազմակերպությունները: Մրցույթը հայտարարված է Եվրամիության կողմից ֆինանսավորվող «Հայաստանի քաղաքացիական հասարակության արտոնում հետեւյալ ընտրական գործընթացներին» ծրագրի շրջանակներում: Սակայն մրցույթի հայտարարության ձեւն արդեն իսկ լուրջ կասկածների տեղիք է տալիս, թե որքանով է այն լինելու թափանցիկ եւ արդար ու որքանով է իրապես ուղղված հայաստանյան հասարակական կազմակերպությունների ներգրավմանն ընտրական գործընթացներին: Հայտարարությունը տրվել է միայն WWW.careercenter.am էլեկտրոնային կայքում, որը հասարակական կազմակերպությունների տեղեկացման համար ամենալավ հարթակը չէ: Մրցույթի մասին որեւէ տեղեկատվություն չկա նաեւ գրասենյակի պաշտոնական վեբ-կայքում: Կարդալ ամբողջությամբ

Երեկ Աբովյան փողոցում, ժամը 15-ի սահմաններում վթար է տեղի ունեցել: Իրար են բախվել երկու տաքսի մեքենաներ, որոնցից մեկը շարժման մեջ է եղել, իսկ մյուսը մեջտեղի շարքից կտրուկ հատել է ճանապարհը եւ հարվածել շարժման մեջ գտնվող տաքսիին: Ապա դեպքի վայր է ժամանել վթարի պատճառ դարձած մեքենայի տերը եւ անմիջապես զանգահարել պետավտոտեսչություն՝ ասելով, որ իրենք խնդիր չունեն «Գայիի» հետ: Մինչ կժամաներ պետավտոտեսչությունը, տուժած վարորդը՝ Աշոտը (մեքենայի համարանիշներն են՝ 29 ՍԼ 184), զանգահարել է «Ռոսգոսստրախ» ապահովագրական ընկերություն: Դեպքի վայր ժամանած պետավտոտեսուչները միանգամից սկսել են մեղադրել վթարի ենթարկված մեքենայի վարորդին: Կարդալ ամբողջությամբ

Հնարավո՞ր է արդյոք փոքրիկ մի սյունակի մեջ ամփոփել կնոջ, ում անունը չգիտեմ, մարմնի բոլոր շարժումները, նրա զգացմունքները, բայց ծածուկները, բնակարանը` իր սենյակի լռությունը, մահճակալի տխրությունն ու բերկրանքը: Ես չեմ կարող, երբեք չեմ կարող, բայց շարունակում եմ չկարողանալ ու գրել: Իմ սյունակն ասես օդի մեջ լինի, գալիս է սպիտակ անկշռությունից ու գնում տարածություն, բայց ներսը պիտի լիքը լինի, պիտի լցված լինի ավազահատիկներով` կպչուն: Կարդալ ամբողջությամբ

Հայաստանի ազգային հերոս, Շվեյցարիայում ՀՀ արտակարգ եւ լիազոր դեսպան տիար Շառլ Ազնավուրին

Պատվարժան մաեստրո

Օրերս Ֆրանսիայի Սենատի կողմից օրինականացված Հայոց ցեղասպանության ժխտման քրեականացումը ոչ միայն արդարության ու քաղաքակրթության հաղթանակ է, այլեւ հայկական կազմակերպությունների ու անհատների տեւական պայքարի արդյունք, որի մեջ անգնահատելի է նաեւ Ձեր ներդրումը։ Սակայն այդ նույն քաղաքակրթական արժեքները՝ խոսքի ու հավաքների ազատությունները, որոնք հնարավոր են դարձնում  արդարության հաստատումն ընդհանրապես, ցայսօր Հայաստանում մնում են բանտարկված: Կարդալ ամբողջությամբ

Երեկ ՀՀ սփյուռքի նախարարությունը հաղորդագրություն էր տարածել, որ փետրվարի 21-ին ԵՊՀ ժուռնալիստիկայի ֆակուլտետի հետ համատեղ պատրաստվում է գիտաժողով անել՝ «Հեռուստատեսությունը եւ հասարակությունը» խորագրով: «Կքննարկվեն հայկական հեռուստաեթերում հայերենի անաղարտությանը, հեռուստատեսային ծրագրերի էթիկական խախտումներին, ոչ պատշաճ եւ ոչ որակյալ հաղորդումներ պատրաստելուն առնչվող խնդիրներ: Գիտաժողովին կմասնակցեն հայկական հեռուստաընկերությունների ղեկավարներ, առաջատար լրագրողներ եւ այլ շահագրգիռ անձինք»,- ասված է հաղորդագրության մեջ:

«Հայաստանում «Պուտին» ակումբների բացումը ստեղծագործող մարդկանց իսկական ոգեշնչման աղբյուր է դարձել: Վարպետ Օնիկը, օրինակ, մի շարք հատուկ ֆոտոներ է ստեղծել այս կապակցությամբ, իսկ ԱՊՀ երիտասարդական խորհրդի նախագահ Անդրանիկ Նիկողոսյանի` մեր թերթին տված հարցազրույցը մեծ աղմուկ էր առաջացրել «Ֆեյսբուք» սոցիալական ցանցում: Ներկայացնում ենք վարպետ Օնիկի պատրաստած լուսանկարը եւ «Ֆեյսբուքի» օգտատեր Օֆելի Մինասյանի նամակը` ուղղված Անդրանիկ Նիկողոսյանին: Կարդալ ամբողջությամբ

Կենտրոն եւ Նորք-Մարաշ վարչական շրջանների ընդհանուր իրավասության դատարանում ընթացող դատավարության ժամանակ ՀՀ ճանապարհային ոստիկանության նախկին պետ Մարգար Օհանյանի դեմ երեկ հնչեց առաջին մեղադրական ցուցմունքը: «Երբ ես պարոն Օհանյանին ասացի, որ քիչ քանակությամբ բենզին ենք ստանում, պարոն Օհանյանը պատասխանեց, որ ինքը տեղյակ է դրանից»,- դատարանում իր ցուցմունքի ժամանակ հայտնեց գործով վկա, 2-րդ սպայական գումարտակի հրամանատար Արսեն Արշակյանը: Նա նշեց, որ բենզինի ստացման գործընթացը կանոնակարգված չի եղել, եւ հաշվետվություններում ստացածից միշտ ավել քանակություն են ցույց տվել: Կարդալ ամբողջությամբ