«Եվրատեսիլը» եվրոպացիների համար է

ՀԵՂԻՆԱԿ՝ Հրապարակ
22/02/2012 | ՄՇԱԿՈՒՅԹ/ԳԻՏՈՒԹՅՈՒՆ

Հարցազրույց «Դորիանս» խմբի կրեատիվ մենեջեր, «Եվրատեսիլին» Հայաստանը ներկայացնելու հավակնորդ «This is our world» երգի խոսքերի

հեղինակ Վարդան Զադոյանի հետ

- «Եվրատեսիլին» մասնակցելը զուտ եվրոպական տեսանկյունից շատ ճիշտ դեմոկրատական քայլ կլինի: Բոլոր սխալները հիմա կարող է թույլ տալ միայն Ադրբեջանը: Մենք ոչ մի սխալ չենք կարող թույլ տալ: Ամբողջ Եվրոպան հիմա ուշադրությամբ հետեւում ա, թե Ադրբեջանն ինչ ռեակցիա կտա հայերի այնտեղ գտնվելուն: Եթե իրանց վատ պահեն, դա շատ վատ կդիտվի, թե Եվրոպական Միության եւ թե Եվրոպայի կողմից: Գնալը որոշ չափով ցույց կտա նաեւ այն, որ մենք արվեստը չենք ընդգրկում պատերազմական հարաբերությունների մեջ: Պատերազմը կապ չունի արվեստի հետ: Արվեստագետը պետք է ելույթ ունենա ամեն տեղ: Եթե միջոցառումը միջազգային բնույթ է կրում, դա նշանակում է, որ տարբեր ազգեր ցանկալի է եւ կարող են մասնակցել:

- Հայերը համարում են, որ ադրբեջանցիներն անցյալ տարի մեծ գումար ծախսելու շնորհիվ հաղթեցին:

- Դա նորմալ է: Գումար ծախսել են PR-ի վրա: Երբ «Եվրատեսիլի» մասնակցի PR-ի վրա մեծ գումար է ծախսվում, դա նշանակում է, որ պետությունը մեծ հույս է կապում իր մասնակցի հետ, լուրջ է վերաբերվում իր կատարողին:

- Որպես «Դորիանսի» մենեջեր՝ անհանգստանո՞ւմ եք տղաների անվտանգության համար: Գուցե պատվիրակության մեջ պլանավորել եք թիկնապահնե՞ր ընդգրկել:

- Ես չգիտեմ ինչ է պլանավորել մեր պետությունը: Կողքից մեկ լսում եմ, որ ոչ մեկը չի մեկնելու, մեկ՝ որ որոշումն արդեն կայացված է, մեկ Թաթայի գնալն են սկսում քննարկել, մեկ ինչ-որ Լուսիա Մունի: Ինչպես ես, այնպես էլ «Դորիանսը» գտնվում ենք խառնաշփոթի մեջ եւ նույնիսկ չգիտենք՝ Հայաստանը մարդ ուղարկո՞ւմ է այդ մրցույթին, թե՞ ոչ: Եթե պետությունը որոշի, որ ոչ մեկին չի ուղարկելու ու տեր չի կանգնելու մեր մասնակիցներին, մենք, բնական է, չենք մեկնի:

- Կարծում եք «Դորիանսի» մեկնելու դեպքում երգն այնքան լավն է, որ կարո՞ղ ենք հաղթանակի հավակնել:

- Խոսքը տեղի մասին չէ, այլ մասնակցության՝ որպես ճիշտ դեմոկրատական քայլի: Միայն ցույց տալու համար, որ մենք ձեզանից չենք վախենում: Եթե երգը գրավի լավ տեղ, կստացվի, որ մենք լավ դեմոկրատական երկիր ենք ու պլյուս դրան Ադրբեջանում գրավեցինք, ասենք, առաջին տեղ:

- «Դորիանսի» ներկայացրած երգի եւ նախանցյալ տարի Ուկրաինան ներկայացրած Ալյոշայի կատարումների միջեւ նմանություն նկատե՞լ եք:

- Ես չգիտեմ Ալյոշան ով ա ու չեմ էլ հետեւում այդ երգերին: Նախորդ տարիներից հիշում եմ միայն հայերի ելույթները եւ հիշում եմ, թե ոնց Գորան Բրեգովիչը եկավ հյուր «Եվրատեսիլին»: Մեկ էլ մի երգ կար՝ դուրս եկավ, կարծեմ «Տորներո» անունով:

- Հայերի նախորդ տարիների ելույթների մասին ի՞նչ կասեք:

- Բոլորի ելույթներն իրենց մեջ վախ ու անհանգստություն էին պարփակում: Ոչ թե վախ պարտվելուց, այլ զուտ բեմից: Կարող ա պատասխանատվությունն ա մեծ լինում: Ուղղակի մենք չպետք է գնանք ինչ-որ տեղ՝ նախօրոք մտածելով, թե ոնց անենք, որ խայտառակ չլինենք: Մենք պետք է գնանք հաղթելու, մտածենք, որ գնանք, նորմալ ելույթ ունենանք-գանք:

Մրցույթի ժամանակ յուրաքանչյուր բազմոցի նստած է մի երկիր ներկայացնող պատվիրակություն՝ իր դրոշներով: Նայելով նրանց՝ տեսնում ես, որ այդ մարդիկ իրոք եկել են իրենց երկիրը ներկայացնելու, մասնակցելու, ուրախանալու: Նրանց համար լրիվ հետին տեղ ա զբաղեցնում տեղը, որովհետեւ երբ հայտարարում են՝ Ռումինիա 8, Ռումինիան ուրախանում ա նենց, ոնց ուրախանում ա 12 ստանալիս, եւ նրանք ուղղակի ողջունում են էն մարդկանց, ով իրենց հավանեց ու էդքան բալեր տվեց:

Եթե հաղթենք, շատ լավ ա, եթե չհաղթենք, լավ ա, որ գոնե մասնակցեցինք: Ի վերջո «Եվրատեսիլը» կատարողների համար առիթ ա, որ նրանց նկատեն պրոդյուսերներ, որեւէ կազմակերպություններ:

Մենք պետք է հաշվի առնենք, որ եթե այս տարի չգնանք «Եվրատեսիլ», պետք է մի տարի սպասենք, իսկ, շատ ներողություն, եթե հանկարծ այս տարի հաղթի Թուրքիան: Ի՞նչ սերիա ենք մտնելու: Հիմա էլ գենոցիդ: Իսկ եթե Թուրքիայում էլի հաղթի Ադրբեջանը: Էդ կնշանակի, որ «Եվրատեսիլի» դռները Հայաստանի համար փակ են: «Եվրատեսիլը» կշարունակի ամուր քայլերով գնալ առաջ, Հայաստանը, իր ամբիցիաներից ելնելով, կմնա իր տեղում:

- Տղաները չե՞ն վախենում, որ նրանց ելույթը կխանգարեն:

- 2010 թվականին Իսպանիայի ելույթի ժամանակ բեմ բարձրացավ երկրպագուներից մեկը, եւ մասնակիցը երկրորդ անգամ կատարեց իր երգը: Ենթադրենք մեր տղաների ելույթի ժամանակ ինչ-որ բան նետեն բեմ կամ անջատեն ձայնը, մենք էլ երկրորդ անգամ կերգենք, երկու անգամ կխանգարեն՝ երեք անգամ կերգենք: Էնքան կերգենք, մինչեւ մեզնից զզվեն: Գոռի ձայնը չեն կարող կտրել, Գոռն իսկական երգող ա, եթե հանկարծ ինչ-որ բան գցեն նրա բաժակի մեջ, որ ձայնը փչացնեն, դրա մասին անմիջապես ինտերնետի եւ լրատվամիջոցների միջոցով կիմանա ողջ աշխարհը:

- Հայաստանի կողմից կազմակերպիչները Ձեր ներկայացրած մասնակցության հայտին արձագանքե՞լ են:

- Մեր երկրի վատ կողմերից է նաեւ այն, որ բարձր կարգի մարդիկ, չինովնիկները մանրանում են այնքան, որ իջնում են «Եվրատեսիլի» մակարդակի եւ որոշում են, թե ով պիտի գնա: Ոչ մի երկրում բարձր աստիճանի չինովնիկ այդպիսի որոշում չի ընդունում. դա որոշում է երիտասարդությունը եւ ժողովուրդը: Ես հաստատ վստահ եմ, որ Դիմա Բիլանին Պուտինը չի ուղարկել, ու նույնիսկ Ռուսաստանի առաջին ալիքի տնօրենը չի այդ որոշումը կայացրել, որովհետեւ նրանք այդ ամեն ինչից վեր են:

Շարունակելի

Մարիամ Մարգարյան