Գագիկ Բեգլարյանի «մարդուն» էլ պաշտոնանկ արեցին

ՀԵՂԻՆԱԿ՝ Գայանե Սարիբեկյան
14/02/2012 | ՀԱՅԱՍՏԱՆՈՒՄ

Թեեւ Տարոն Մարգարյանը երեք ամիս էլ չկա, ինչ քաղաքապետի պաշտոնն է ստանձնել, սակայն արդեն երրորդ վարչական շրջանի ղեկավարն է փոխվում: Երեկ աշխատանքից ազատվել է Կենտրոն վարչական շրջանի ղեկավար Գագիկ Գյանջումյանը: Նշենք, որ նա համարվում է Գագիկ Բեգլարյանի մարդը եւ այդ պաշտոնը զբաղեցնում էր Բեգլարյանի՝ քաղաքապետ դառնալուց հետո: Թեեւ նա ղեկավարն էր, սակայն դե ֆակտո կենտրոնը կառավարում էր Բեգլարյանը: Հիշեցնենք, որ Գյանջումյանից առաջ, դեկտեմբերին, զբաղեցրած պաշտոնից հեռացվեց Շենգավիթ վարչական շրջանի ղեկավար Սերգեյ Հովհաննիսյանը՝ Կադիլակ Սերոժը: Իսկ դրանից առաջ հեռացվեց Արաբկիրի ղեկավարը, որին փոխարինեց Տարոն Մարգարյանի մտերիմ Հրայր Անտոնյանը: Ինչպես նախորդների, այնպես էլ Գյանջումյանի դեպքում պաշտոնանկությունը ձեւակերպվեց, թե սեփական դիմումի համաձայն է ազատվել:

Իսկ իրականում ինչ պատճառներով է նա լքել աթոռը, փորձեցինք պարզել Գյանջումյանից, սակայն վերջինս ընդհատակ էր անցել ու մինչեւ ուշ գիշեր չէր պատասխանում հեռախոսազանգերին: Սակայն մենք պարզեցինք, որ Գյանջումյանն առավոտյան, սովորականի պես, աշխատանքի է գնացել, նույնիսկ մասնակցել էր քաղաքապետարանի գործակարգավարական նիստին, որը տեղի է ունենում ամեն երկուշաբթի: Թեեւ պարբերաբար շրջանառվում էին նրա պաշտոնանկության մասին լուրերը, սակայն իր մտերիմները մեզ հետ զրույցում վստահեցրին, որ ինչպես իրենց, այնպես էլ Գյանջումյանի համար անակնկալ է եղել հեռացվելը: Գործակարգավարական նիստին պաշտոնանկության մասին խոսք անգամ չի եղել: Խորհրդակցության ավարտից հետո նա հանդիպում է ունեցել քաղաքապետի հետ եւ այլեւս նախկին թաղապետի կարգավիճակով լքել քաղաքապետարանը: Գյանջումյանի գործընկերներից մի քանիսը մեզ հետ զրույցում վստահեցրին, որ այդ մասին տեղեկացել են արդեն իրենց վարչական շրջաններ վերադառնալուց հետո: Ի դեպ, Գյանջումյանի պաշտոնանկության ֆոնին ուշագրավ է երեկվա խորհրդակցության թեման: Տարոն Մարգարյանը ներկայացրել է վարչական շրջանների հունվար ամսվա աշխատանքների պատշաճ իրականացման պատկերը, ըստ որի՝ առաջին եռյակում են Ավան, Դավիթաշեն, Քանաքեռ-Զեյթուն շրջանները: Ապա ներկայացվել է վերջին վատագույն եռյակը՝ Կենտրոնը, Նուբարաշենը եւ Շենգավիթը:

Թերեւս այս ցուցանիշները հաշվի առնելով, Գյանջումյանի որոշ գործընկերներ ենթադրում էին, որ նա դարձավ ձյան մաքրման աշխատանքներին ուղղված այս օրերի քննադատության զոհը: Ոչ պատշաճ կատարելով պարտականությունները՝ նա ստվերել է Տարոն Մարգարյանի անբասիր անունը, եւ կասկածի տակ է դրվել նրա ամենակարող լինելը: Նույնիսկ շշուկներ տարածվեցին, թե նրան հնարավոր է ընդգրկեն ՀՀԿ համամասնական ցուցակում, սակայն սա ՀՀԿ-ականներն անհավանական համարեցին:

Իհարկե, նախընտրական պատրաստությունների այս եռուն շրջանում բոլորին հայտնի է, թե ընտրական գործընթացներում ինչ մեծ դեր ունեն նաեւ վարչական շրջանների ղեկավարները: Չի բացառվում, որ վերջիններիս փոփոխությունն էլ ընտրություններին պատրաստվելու համատեքստում է արվում: Ինչ վերաբերում է Գյանջումյանի իրավահաջորդի անձին, նրա անունը դեռ հայտնի չէ: Քաղաքապետարանի լրատվության վարչությունից մեզ հայտնեցին, թե առաջիկա երկու օրում պարզ կլինի: