Խաղի կանոնը նույնն է

ՀԵՂԻՆԱԿ՝ Մարինե Խառատյան
14/02/2012 | ՀԱՅԱՍՏԱՆՈՒՄ

Խորհրդարանական ընտրություններին ընդառաջ Հրազդանի ընտրությունները յուրօրինակ կատալիզատոր էին` ցույց տալու համար, թե ինչ ընտրություններ են սպասվում առաջիկայում: Պատահական չէր, որ Հրազդանի ընտրությունների արդյունքներին սպասում էին քաղաքական գրեթե բոլոր ուժերը: Պետք էր հասկանալ` փոխե՞լ է իշխանությունը, մասնավորապես Հանրապետականը, ընտրություն անցկացնելու խաղի կանոնը, թե՞ ոչ:

Ուշագրավ է, որ կոալիցիոն գործընկեր ԲՀԿ-ն չի շտապում շնորհավորել վերընտրված ՀՀԿ-ական թեկնածուին: Ավելին` երեկ մեր հարցին ի պատասխան, ԲՀԿ մամուլի խոսնակ Բաղդասար Մհերյանը խուսափեց քաղաքական գնահատական տալ ընտրությանը` հայտարարելով. «Մենք սպասում ենք վերջնական արդյունքների ամփոփմանը, հնարավոր է լինեն բողոքներ, քրեական գործեր կամ ձեռքի տակ եղած այլ փաստեր»: Կոալիցիոն մյուս գործընկեր ՕԵԿ-ը Հրազդանի ընտրությունները նորմալ է համարում: «Հրազդան քաղաքի ընտրությունները սովորական ընտրություններ են եղել, որքան որ մեր կուսակցականները տեղեկացել են, ընտրություններն անցել են նորմալ»,- մեզ հետ զրույցում ասաց Հեղինե Բիշարյանը` ընտրակաշառքների բաժանման հետ կապված հայտարարելով, թե ինքն «ընտրակաշառք բաժանելուց ներկա չի եղել, չի կարող ասել»: Կարելի՞ է ասել, որ ՕԵԿ-ը ողջունում է այս ընտրությունները, Հեղինե Բիշարյանը խուսափեց ուղիղ պատասխանից. «Հրազդան քաղաքի քաղաքացիներն ասում են, որ ընտրություններն անցել են նորմալ, ընտրել են նրան, ում ուզել են, ես ի՞նչ կարող եմ ասել»:

«Գործի է դրվել ընտրակաշառքի մեխանիզմը»,- Հրազդանի ընտրությունների առթիվ երեկ հայտարարեց «Ժառանգության» պատգամավոր Ստյոպա Սաֆարյանը` հավելելով. «Դուք հաղթեցիք եւ ընտրությունը, եւ ժողովրդին, եւ ամեն ինչ»: Ուշագրավ է, որ «խիստ ընդդիմադիր» Դաշնակցությունը չի սատարել ընդդիմության թեկնածուին Հրազդանում: Հանրապետականը հիացած է ընտրություններով: ՀՀԿ-ական Կարեն Ավագյանը երեկ հայտարարել է, թե Սասուն Միքայելյանի շտաբը չի բողոքարկում ընտրությունները, ուստի ընտրակաշառքների վերաբերյալ հայտարարությունները բամբասանք են, կոնկրետ ֆիքսված խախտումներ չեն եղել: «Իսկ եթե չեն կարողանում ապացուցել, դա իրենց խնդիրն է»,- ասել է Կարեն Ավագյանը: «Իշխանությունների կողմից կատարվել է հերթական ընտրագողությունը, աղավաղվել է ժողովրդի կամքի արտահայտությունը, ի չիք են դարձել ազատ, արդար եւ օրինական ընտրություններ անցկացնելու մասին խոստումները»,- երեկ իր գնահատականն է ներկայացրել ՀԱԿ-ը, ուստի Կոնգրեսը դատապարտում է «հերթական ընտրագողությունը, պահանջում անվավեր ճանաչել ընտրությունների արդյունքները բոլոր 39 համայնքներում եւ պատժել ԿԸՀ-ի եւ ԸԸՀ-ների ընտրակեղծարարներին»: