Էլմիրա Առաքելյանին հանդիպեցի Նոր Նորքի թիվ 3 շտապօգնության հիվանդանոցում: Դեռ դեկտեմբերին, Ստեփանակերտում, արյան ճնշման տատանման հետեւանքով ընկել եւ կոտրել էր կողոսկրերը, վնասել ողնաշարի ներվը: Պաշտպանության նախարար Սերյան Օհանյանի միջնորդությամբ հունվարին տեղափոխվել է Երեւան՝ բուժումը շարունակելու նպատակով: «Ես հանդիսանում եմ Արցախի պատերազմի վետերան, ունեմ երրորդ կարգի հաշմանդամություն, 9 տարի՝ 1991-1999թթ., ծառայել եմ Արցախյան պատերազմում, արժանացել եմ չորս մեդալի: Գաբրիելս 13-14 տարեկանից ինձ հետ մասնակցում էր պատերազմին»,- հիշում է Էլմիրան: Գաբրիելը նրա միակ որդին է, պատերազմից հետո զինվորական կրթություն է ստացել Հունաստանում՝ ավարտելով ռազմական ակադեմիա, այնուհետեւ վերադարձել է հայրենի Արցախ եւ ծառայության անցել Ասկերանում՝ որպես սպա: «Գաբրիելին սպանեցին 2010թ. հուլիսի 8-ին եւ դագաղը հուլիսի 9-ին՝ իմ ծննդյան օրը, «նվեր» բերեցին»,- արտասվում է Էլմիրան:

Սպանության շրջանառվող վարկածն այն է, որ ավագ լեյտենանտ Գաբրիելը բարձրացել է մարտական հենակետեր՝ ստուգայցի, եւ հերթապահ զինվորը սպանել է նրան, քանի որ նշանաբառը չի իմացել: Իսկ հերթապահող զինվորը պայմանագրային ծառայող 21-ամյա, նախկինում երկու անգամ դատապարտված Վլադիմիր Սաքոյանն է եղել: «Պետպատվեր ա Մոսիի կողմից»,- որդու սպանության առիթով ասում է Էլմիրան եւ զարմանում. «Նշանաբառի հրամանը ինքն ա ստանում, գալիս զինվորներին ասում ա, որ էս բառն ա, ո՞նց կարա ինքը չասի»: Նույն զարմանքով ու դառնությամբ շարունակում է. «Երկու անգամ դատված մարդուն ավտոմատը դավերյա են անում-ուղարկում են առաջին գի՞ծ»:

Մոսի ասելով՝ Էլմիրան նկատի ունի ԼՂՀ պաշտպանության նախարար Մովսես Հակոբյանին: Նրա եւ Գաբրիելի տարաձայնությունը սկսվել է դեռ 2000 թվականից, երբ վերջինս Հունաստանից արձակուրդ է եկել, իր հետ բերելով նամակ, որի համաձայն, պետք է կրթությունը շարունակեր՝ Հունաստանում վեց ամիս սովորելով «Կոմանդոս» դասընթացներում, եւ անհրաժեշտ էր ԼՂՀ պաշտպանության նախարարության երաշխավորագիրը: «Մոսին ասել ա՝ էդ էշն ո՞վ ա, որ քեզ ուղարկել ա Հունաստան: Իսկ Գաբրիելը պատասխանել ա՝ ափսոս, որ մենք մի պաշտոնի չենք, թե չէ զրույցն ուրիշ ձեւ կունենար»,- պատմում է Էլմիրան եւ ավելացնում, որ խոսակցության վերջում Հակոբյանն ասել է, թե ավարտես-գաս, որտե՞ղ ես ծառայելու, Հունաստանի ակադեմիան կապ չունի մեր բանակի հետ. «Ակադեմիան ավարտելուց հետո 5 տարի ծառայել ա, եւ 5 տարի Մոսին մառալնի սպանել ա որդուս: Մոսին բոլորին թունավորել եւ լարել էր Գաբրիելի դեմ: Երկու բարձրագույն էր ավարտել, յոթ լեզու գիտեր: Մոսին նախանձում էր Գաբրիելին, բացի այդ, կոնֆլիկտ կար նրանց մեջ: Միլիոն տոկոսով համոզված եմ, որ Մոսին է կազմակերպել Գաբրիելի սպանությունը»:

Միակ որդուն կորցրած Էլմիրան, արտասուքը սրբելով, շարունակում է պատմել, որ հրազենի փամփուշտը կտրել է Գաբրիելի ազդրի զարկերակը. «Երեք ժամ երեխուս թողել են, որ արնաքամ լինի, օգնություն ցույց չեն տվել, ժամանակին չեն հասցրել հիվանդանոց: Առաջին գծում գտնվող մեքենան անսարք ա եղել, իսկ մինչեւ հոսպիտալ մեկ ժամվա ճանապարհ ա: Եթե ժամանակին հասցնեին, երեխաս կփրկվեր: Հոսպիտալում որ ընդունել են, ասում ա՝ շունչ կար, բայց արդեն արյուն չկար օրգանիզմումը: Ծածկել ա, էդ լրիվ Մոսին փողով ծածկել ա»:

Էլմիրայի պատմելով, Հակոբյանի քույրը՝ Էդեման, որ Ասկերանի զորամասի կադրերի բաժնի պետն էր, նույնպես լարված հարաբերությունների մեջ է եղել Գաբրիելի հետ. «Մոսին քրոջը լարել էր երեխուս հանդեպ: Երբ հարցեր էր լինում, մոտենում էր, որ կադրերի բաժնի հետ որոշեն, նա էլ կոպտում էր՝ ասելով, թե էս զորամասը տղամարդու տեղ ա, քո տեղը չի»:

Իսկ 2009թ. կապիտանի կոչում են շնորհել Գաբրիելին: «Երեք ամիս հետո ասել են, թե 2 հազար դոլար պիտի մուծես, թե չէ կոչումազրկում ենք: Գնացի Մոսիի տեղակալ Ղահրամանյան Արմենի մոտ, ասեցի՝ դուք թեկուզ գեներալներ եք, բայց օրենքը չեք իմանում, որ վեց ամսից շուտ իրավունք չունեք կոչումազրկեք: Հետո նրանք հետ տվին հրամանը, երեք ամիս էլ սպասեցին, նոր կոչումազրկեցին: Գումարտակի հրամանատար Սանյա Գրիգորյանը, որ փող էր հավաքում, Գաբրիելը չէր տալիս, դրանից վրդովված՝ բողոք ա գրել Մոսիին, որ վատ ա ծառայում, նա էլ կոչումազրկել ա»,- շարունակում է Էլմիրան:

Որդեկորույս մայրն ուզում է, որ դատավճիռը վերանայվի, գործը բացվի. «Դատավորն աշխատում էր ցմահի վրա, փողն առել ա, ցմահ չի տվել: Իմ դատապաշտպանն էլ՝ Արկադին, աշխատել ա նրանց օգտին: Երբ գանգատվում էի Մոսիից ու հրամանատարից, ինձ անընդհատ ասում էր՝ խանգարում ա մեր գործին: Ասում էր՝ ես ամեն ինչ կանեմ, բայց ոչինչ էլ չարեց, փողը վերցրեց, նրանց անուններն էլ չթողեց, որ տամ: Դրա փոխարեն երկու ամսվա ծառայող տղային բանակից ազատեց»:

Էլմիրա Առաքելյանը համոզված է, որ որդու՝ ավագ լեյտենանտ Գաբրիել Առաքելյանի սպանությունը հատուկ ծրագրված է եղել, հատկապես, որ դատավարության ժամանակ սպանության համար մեղադրվող Վլադիմիր Սաքոյանը հայտարարել է. «Ես եմ խփել, բաց սպանողն ուրիշ էր»:

Ֆելիքս Եղիազարյան

ԱՄԵՆԱԿԱՐԴԱՑՎՈՂ ՆՅՈՒԹԵՐԸ

• Ինչո՞ւ ենք հայտնվել այս գորշ իրավիճակում: Երբ պատերազմի բովով անցածներն անցնում են իշխանության գլուխ, դա ամենավտանգավորն է: Իշխանության մեջ ներմուծում են ամեն գնով հաղթելու, ճնշելու , պատժելու պատերազմական դաժան գործողությունները: Նման փաստի առաջ կանգնեց Հայաստանը, երբ Ռոբերտ Քոչարյանը, այնո...
• Նոր շներ են գալիս` նոր ախորժակներով: ԱԺ ընտրությունների, դրանց արդյունքների, հետընտրական գործընթացների շուրջ այս անգամ փորձեցինք զրուցել թատերական աշխարհի ու մի շարք թատրոնների գեղարվեստական ղեկավարների հետ, որոնց մեծ մասը չցանկացավ խոսել այս թեմայի շուրջ, բացառությամբ երկուսի՝ Ստանիսլա...
• Մաքուր մարդիկ ՀՀԿ-ին պետք չեն: Վիկտոր Դալլաքյանին երեկ չհաջողվեց բողոքարկել ընտրությունների արդյունքները եւ հասնել այն բանին, որ անվավեր ճանաչվի անկուսակցական փաստաբան Էդմոն Մարուքյանի պատգամավորությունը: Նման պահանջով նա երեկ դիմել էր թիվ 30 ընտրատարածքային հանձնաժողով՝ պատճառաբա...
• Ընտրակաշառք (լուսանկար): «Ֆեյսբուքի» օգտատեր Վարդինե Գրիգորյանն այս լուսանկարն է տարածել` հետեւյալ մեկնաբանությամբ. «Պարտք, որ վճարելու ենք բոլորս ու դեռ շաաատ երկար»...
• Էդիկ ջան, մի օր հերթը քեզ էլ կհասնի: Լրագրող Ծովինար Նազարյանը անդրադարձել է Էդուարդ Շարմազանովի հայտարարությանը, որը ներկայացնում ենք ստորեւ: Իմ վաղեմի բարեկամ Էդվարդ Շարմազանովը այսպիսի հայտարարություն է արել. «Բոլոր նրանք, ովքեր փորձում են իրենց պաշտպանության տակ առնել մեր հասա...