Խաչատուրովը տորթն է մորթել, Լիսկան՝ «տաքացել»

ՀԵՂԻՆԱԿ՝ Հրապարակ
31/01/2012 | ՀԱՅԱՍՏԱՆՈՒՄ

Հայոց բանակի կազմավորման 20-ամյակի առթիվ տեղի ունեցած պաշտոնական արարողությունից հետո, հունվարի 28-ի երեկոյան, քաղաքական վերին էշելոնը տեղափոխվել է «Փարվանա» ռեստորան՝ քեֆ անելու: Իսկ նման քեֆերի ժամանակ, որպես կանոն, խիստ ու ազդեցիկ դեմքերով պաշտոնյաները «բացվում են», կոկոները տաքացնում ու քեֆ անում: Մեզ հասած տեղեկություններով, քեֆի ժամանակ իր վարքով աչքի է ընկել Սյունիքի մարզպետ Լիսկան՝ Սուրիկ Խաչատրյանը: Մեր աղբյուրի փոխանցմամբ, երբ նրա քեֆը լավացել է, սկսել է իրեն ազատ զգալ դահլիճում, մոտեցել է պատահած մարդկանց ու պինդ-պինդ գրկել-համբուրել, ապա տեղ-տեղ թեթեւ վիճաբանության բռնվել որոշ օլիգարխների հետ: Թեեւ լուրջ միջադեպ չի եղել, սակայն Սերժ Սարգսյանի հայտնվելուց հետո նրան քաղաքավարի դուրս են հրավիրել: Խնջույքի ուշագրավ հատվածներից է եղել նաեւ դեսերտը: Ներկաների համար շատ անակնկալ՝ Սեյրան Օհանյանը հայտարարել է, որ տորթը պետք է «մորթի» գենշտաբի պետ Յուրի Խաչատուրովը:

Վերջինս էլ ուրախ-զվարթ ընդունել է առաջադրանքն ու «մորթել» «զինվորներով» զարդարված տորթը: Ինչ վերաբերում է հրավիրյալներին, դե, երեւի արդեն ոչ մեկի համար զարմանալի չէ, որ ԲՀԿ-ից ներկայացուցիչ չի եղել: Համենայնդեպս ԲՀԿ դեմքերից: Ասում են՝ կուսակցապետ Գագիկ Ծառուկյանը եւ կարկառուն ԲՀԿ-ականները թեեւ հրավիրված են եղել, սակայն չեն մասնակցել: Ներկա չեն գտնվել նաեւ ԱԺ նախկին նախագահ Հովիկ Աբրահամյանն ու նախկին ոստիկանապետ Ալիկ Սարգսյանը: